Paliya Bible
नीरगमन 7
ता यहोवा मुसा ने केदो, “ह़मळ, मे तने फीरोन जुगु भगवान ने तेम ठेरावु; अने तारो भाय हारुन तारो भगवान वगे गेथी वात केवा वाळो ठेरहे। जे-जे हुकम मे तने आपु तीहयात तु केजे, अने हारुन तीहया फीरोन ने केहे, जीमनी सी तीहयो ईस्रायली माणहु ने आह़फा ना देस मे गेथा नीकळ जवा देय। पण मे फीरोन ना मन ने काठु कर देही, अने मारा ढेरेत सेलाण्या अने चमत्कार मीस्र देस मे देखाड़ही।1 ते बी फीरोन तमारी वात नी ह़मळे; अने मे मीस्र देस पोर मारो हात बड़ावीन मीस्री माणहु ने भारी डंड आपीन मारी सेना मतलब मारा ईस्रायली माणहु ने मीस्र देस मे गेथा नीकाळ लेही। अने जत्यार मे मीस्र पोर मारो हात बड़ावीन ईस्रायली माणहु ने तीमनी वच मे गेथो नीकाळही, ता मीस्री माणहु जाण लेहे के मे यहोवा से।” ता मुसो अने हारुन यहोवा ना हुकम नी अनसारेत कर्या। जत्यार तीहया फीरोन ह़ाते वात करवा बाज ज्या, तीहयी टेमे मुसो अस्सी साल नो, अने हारुन तीर्यासी साल नो हतो।
हारुन नी लाकड़ी
अळतेण यहोवा मुसा ने अने हारुन ने आसम केदो, “जत्यार फीरोन तमने केय, ‘तमारी सेलाणी नु कंय चमत्कार देखाड़ो,’ ता तु हारुन ने केजे, ‘तारी लाकड़ी लीन फीरोन नी अगळ नाख दे के तीहयी गड़हो बण जाय।’” ता मुसो अने हारुन फीरोन ने तां जाय्न यहोवा ना हुकम नी अनसारे कर्या; अने जत्यार हारुन आह़फा नी लाकड़ी फीरोन अने तीना अदीकार्या अगळ नाख देदो, ता तीहयी लाकड़ी गड़हो बण जी। ता फीरोन पुंजारा अने जादु-टोना करवा वाळा ने बोलायो; अने मीस्र ना जादुगर माणहु आवीन आह़फा-आह़फाम ना मंतर सी तेमेत कर्या।2 तीहया बी आह़फा-आह़फाम नी लाकड़ी नाख देदा, अने तीहयी बी गड़हो बण जी। पण हारुन नी लाकड़ी तीमनी लाकड़ी ने गळ जी। पण फीरोन नु मन अळी बी काठु हय ज्यु, अने यहोवा केदलो तेम तीहयो मुसा अने हारुन नी वात ने नी मान्यो।
मीस्र पोर गरा: खुन
ता यहोवा मुसा ने केदो, “फीरोन नु मन काठु हय जेलु से अने तीहयो मारा माणहु ने जवा नी देय। एतरे ह़वारे नी टेमे जत्यार फीरोन नील नंदी भणी बाहर आवहे; ता तु तीनीन्तां जजे, अने जे लाकड़ी गड़हो बण जेली, तीने हात मे लीन नंदी नी धेकड़ पोर तीनी वाट जोवजे। अने तीने आहयी रीते केजे, ‘ईब्रानीम नो भगवान यहोवा मने आहयु केवा करीन तारीन्तां मोकल्लो से के मारा माणहु ने जवा दे, जीनी सी तीहया मारी जंगल मे भक्ती करे; अने हजु तक तु मारु केणु नी मान्यो। यहोवा आसम केय, तु आहयी वात सी जाणही के मे भगवान से; देख मे मारा हात मे नी लाकड़ी ने नील नंदी ना पाणी पोर देही, अने तीहयु लोय बण जहे,3 अने जे माछला नील नंदी मे से तीहया मर जहे, अने तीनु पाणी गंदायवा बाज जहे, अने नंदी नु पाणी पीवा नी लायक नी रेय।’” अळतेण यहोवा मुसा ने केदो, “हारुन ने के आह़फा नी लाकड़ी लीन मीस्र देस मे जेतरु पाणी से, मतलब तीनी मे वाळा नंद्या, नेहरु, तळाव, अने ढाबरा ने टेकव के तीनु पाणी लोय बण जाय; अने आखा मीस्र देस मे जे लाकड़ा ना अने दगड़ा ना बेम भाती ना पाणी भरवा ना ठाहरा मे लोयेत लोय बण जहे।” ता मुसो अने हारुन यहोवा ना हुकम नी अनसारे कर्या, मतलब हारुन लाकड़ी चुटीन फीरोन अने तीना अदीकार्या नी देखणते नील नंदी ना पाणी पोर देदो, अने नंदी नु आखु पाणी लोय बण ज्यु।4 अने नील नंदी ना आखा माछला मर ज्या; अने तीनु पाणी गंदायवा बाज ज्यु, अने मीस्री माणहु नंदी नु पाणी नी पी सक्या; अने आखा मीस्र देस मे लोयेत लोय हय ज्यु। ता मीस्र ना जादुगर माणहु बी आह़फाम ना जादु-वीद्या सी तेमेत कर्या; ता फीरोन नु मन काठु हय ज्यु, अने यहोवा केदलो तेम तीहयो मुसा अने हारुन नी वात नी मान्यो। फीरोन आहयी वात पोर बी धीयान नी देदो, अने आह़फा ना घोर जत र्यो। अने आखा मीस्री माणहु पीवा नु पाणी जुगु नील नंदी नी आड़े-धेड़े खोदवा बाज ज्या, काहाके तीहया नंदी नु पाणी नी पी सकता हता।
यहोवा नील नंदी ने देदलो ते दाड़े गेथा ह़ात दाड़ा हय जेला हता।
Source notes (4)
- Cross-reference नेवताळा ना काम 7:36
- Cross-reference 2 तीमुथीयुस 3:8
- Cross-reference परकासीतवाक्य 16:4
- Cross-reference भजन सहीता 78:44; 105:29
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.