Paliya Bible
नीरगमन 36
“बसलेल अने ओहोलीवाब अने आखा अक्कल वाळा जीमने यहोवा एवी अक्कल अने ह़मज आपलो से के तीहया यहोवा ना आखा हुकम नी अनसारे चोखला जागा नी सेवा जुगु आखी भाती ना काम करवा जाणे, तीहया आखा आहयु काम करहे।”
माणहु नी लारे ढेरेत भेट
ता मुसो बसलेल अने ओहोलीवाब अने आखा अक्कल वाळा ने जीमना मन मे यहोवा अक्कल अने ह़मज आपलो, मतलब जीमने-जीमने ह़ाते आवीन काम करवा नु मन हयलु तीमने आखा ने बोलायो; अने ईस्रायली माणहु जे-जे भेट चोखला जागा नी सेवा ना काम अने तीने बणाव्वा जुगु लावला हता, तीने तीहया माणहु मुसा ना हात मे गेथु ली लेदा। ते बी माणहु दाड़ीक ह़वारे तीनीन्तां भेट आह़फाम नी मरजी सी लावता र्या; अने जेतरा अक्कल वाळा माणहु चोखला जागा नु काम करता हता तीहया आखा आह़फा-आह़फाम नु काम छोड़ीन मुसान्तां आया, अने केवा बाज ज्या, “जे काम ने करवा नो हुकम यहोवा आपलो से तीनी जुगु जेतरु जोवे तीनी गेथु वदु ह़मान माणहु ली आवला से।” ता मुसो आखा पड़ावा मे आहया हुकम नो परच्यार करायो, “आखा अदमी, अने बयरा, कोय बी चोखला जागा जुगु अळी भेट नी लावजो।” आहयी रीते माणहु अळी भेट लाव्वा बंद हय ज्या; काहाके आखु चीज बणाव्वा जुगु जेतरु ह़मान जोवतु हतु, तीनी गेथु वदु ह़मान बणाव्वा वाळान्तां हय जेलु हतु।
भगवान नी हजुरी नु तम्बु बणावणु
(नीरगमन 26:1-37)
काम करवा वाळा जेतरा अक्कल वाळा कारीगर माणहु हता तीहया रेवा ना जागा जुगु पातळ्ळु सुती नु बणावलु कापड़ु ना, अने नीळ्ळा, जामण्या अने रात्ला रंग नु कापड़ु ना दह पड़दा पोर करुबु ना फुटक्या बणावीन ह़जाड़्या। एक-एक पड़दा नी लम्बाय अट्ठावीस हात1 अने चवड़ाय च्यार हात2 हती; आखा पड़दा एकीत माप ना बण्या। बसलेल पांच पड़दा ने एक-बीजा ह़ाते जोड़ देदो, अने बीजा पांच पड़दा बी एक-बीजा ह़ाते जोड़ देदो। अने जां ह़ारीक आहया पड़दा जोड़ला हता तां नी बेम कोर पोर नीळ्ळा-नीळ्ळा छेवड़ा लगाड़्यो। तीहयो बेम कोर्ये पचाह-पचाह छेवड़ा आहयी रीते लगाड़्यो के तीहया एक-बीजा नी आम्बा-साम्बा हता। अने तीहयो ह़ोना ना पचाह आकड़ा बणायो, अने तीनी लारे पड़दा ने एक-बीजा ह़ाते आसम जोड़्यो के रेवा नो जागो पुरो एक बण ज्यो। अळतेण रेवा ना जागा ना तम्बु पोर ढाकवा करीन तीहयो बोकड़ी ना नीम्बाळा ना ग्यारे पड़दा बणायो। एक-एक पड़दा नी लम्बाय तीस हात अने चवड़ाय च्यार हात नी हती; अने ग्यारोव पड़दा एकीत माप ना हता। आमनी मे गेथा तीहयो पांच पड़दा अलग अने छो पड़दा अलग जोड़ देदो। अने जां बेम ने जोड़्यो तां नी कोर्ये तीहयो पचाह-पचाह फांद लगाड़्यो। अने तीहयो पड़दा ने जोड़वा करीन पीतळ ना पचाह आकड़ा बी बणायो जीनी सी पुरु तम्बु एक हय जाय। अने तीहयो तम्बु जुगु रात्ला रंग वेर रंगली गाडरा नी खाल नु एक ओडाड़वा नु अने तीनी उपर जुगु सुईसो नाम नी मोट्ली माछली नी खाल नु बी एक ओडवा नु बणायो। अळतेण तीहयो रेवा ना जागा जुगु बाबळ्या ना लाकड़ा ना चोवखट ने उबा रेवा करीन बणायो। एक-एक चोवखट नी लम्बाय दह हात अने चवड़ाय डेड़ हात नी रेवा जोवे। एक-एक चोवखट मे एक-बीजा ह़ाते जोड़ायला बे-बे खाचा बणायो, रेवा ना जागा ना आखा चोवखट ने तीहयो आहयी रीते बणायो। तीहयो रेवा ना जागा नी दखणाव ह़ोड़ जुगु वीह चोवखट बणायो; आहया वीह पुरा चोवखट तळे चांदी ना चाळीह पाञा, मतलब एक-एक चोवखट तळे तीना बे खाचा जुगु तीहयो बे पाञा बणायो। अने रेवा ना जागा नी बीजी ह़ोड़, मतलब धुराव ह़ोड़ जुगु बी तीहयो वीह चोवखट बणायो; अने ईमनी जुगु बी तीहयो चांदी ना चाळीह पाञा, मतलब एक-एक चोवखट तळे बे-बे पाञा बणायो। अने रेवा ना जागा नी पाछली ह़ोड़, मतलब बुडणली ह़ोड़ जुगु तीहयो छोव चोवखट बणायो; अने पाछला हीस्सा मे रेवा ना जागा ना खुणा जुगु तीहयो बे चोवखट बणायो। तीहया हेटा गेथा बे हीस्सा ना बणला हता, अने बेम हीस्सा उपर ना मुंडे तक एक-एक कड़ा मे भेसकायला हता; तीहयो बेम चोवखट ने एक ह़रकात बणायो। आहयी रीते आंठ चोवखट हय ज्या, अने तीमना ह़ोळ्ळे चांदी ना पाञा हय ज्या; मतलब एक-एक चोवखट तळे बे-बे पाञा हया।
अळतेण तीहयो बाबळ्या ना लाकड़ा ना डांडा बणायो, मतलब रेवा ना जागा नी एक ह़ोड़ ना चोवखट जुगु पांच डांडा, अने रेवा ना जागा नी बीजी ह़ोड़ ना चोवखट जुगु पांच डांडा, अने रेवा ना जागा नी कोर जे बुडणली ह़ोड़ भणी पासली ह़ोड़ हती तीनी जुगु बी पांच डांडा बणायो। तीहयो खाचा नी वचा-वच, वचे वाळा डांडा ने आसम बणायो के तीहयो रेवा ना जागा नी एक कोर गेथा बीजी कोर तक पुग्या। अने चोवखट ने तीहयो ह़ोनु वेर पालीस कर्यो, अने डांडा ना घोर ना काम मे आव्वा वाळा कड़ा ने ह़ोनु ना बणायो, अने डांडा ने बी ह़ोनु वेर पालीस कर्यो। अळतेण तीहयो नीळ्ळु, जामण्यु अने रात्लु रंग नु कापड़ु नो, अने पातळ्ळु सुती नु बणावलु कापड़ु नो वचे वाळो पड़दो बणायो; तीहयो तीनी पोर वारु रीते करुब ना फुटक्या बणावीन ह़जाड़्यो। तीहयो तीनी जुगु बाबळ्या ना लाकड़ा ना च्यार खम्बा बणायो, अने तीमने ह़ोनु वेर पालीस कर्यो; अने तीमना हेकड़ा ह़ोना ना हता, अने तीहयो तीमनी जुगु चांदी ना च्यार पाञा बणायो। तीहयो तम्बु ना झापला जुगु बी नीळ्ळा, जामण्या अने रात्ला रंग नु कापड़ु नो, अने पातळ्ळु सुती नु बणावलु कापड़ु नो ह़जाड़लो पड़दो बणायो; अने तीहयो हेकड़ा भेळ तीना पांच खम्बा बी बणायो, अने तीमना मुंडा अने जोड़वा ना पट्या ने ह़ोनु वेर मुड़्यो, अने तीमना पांच पाञा पीतळ ना बणायो।
Source notes (2)
- Footnote अट्ठावीस हात बारे मीटर
- Footnote च्यार हात बे मीटर
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.