Paliya Bible
एस्तर 2
एस्तर नु राणी बणनु
आहयी वात हयवान अळतेण जत्यार राजो सयर्स नी रीह कम हय जी, ता तीहयो राणी वसती नी, अने जे काम तीहयी करली हती, अने तीना बारा मे हुकम नीकाळ्ळो हतो तीनी फोम कर्यो। ता राजा ना पावर्या जे तीनी चाकरी करता हता, केवा बाज ज्या, “राजा जुगु घटाळ्ळा अने कुवार्या सोर्या ह़ोदो। अने राजो आह़फा ना आखा देस मे माणहु ने आनीन करते टाळे के तीहया आखा घटाळ्ळा कुवार्या सोर्या ने सुसन नाम ना कीला मे राण्या रेवा ना जागा मे एक्ठा करे अने राजा जुगु राणी नो जुगाड़ करवा वाळा हेगे ने जे राजा नो गतराड़ो हतो ह़ोप देय; अने ह़ींगारवा नु ह़मान तीमने आप देय। ता तीमनी मे गेथी जे कुवारी राजा नी नींगा मे वारु ठेरे, तीने राणी वसती ना जागा पोर राणी बणावहे।” आहयी वात राजा ने वारु लागी अने तीहयो तेमेत कर्यो।
सुसन नाम ना कीला मे मोर्दके नाम नो एक यहुदी रेतो हतो, जे कीस नाम ना एक बीन्यामीन जाती वाळा नो सोरा ना सोरा नो सोरो, सीमी ना सोरा नो सोरो अने याईर नो सोरो हतो। तीहयो तीहया धरायला माणहु ह़ाते यरुसलेम गेथो धराय्न जेलो हतो, जीमने बेबीलोन नो राजो नबुकदनेस्सर, यहुदा ना राजा यकोन्याह नी ह़ाते बांदीन लीजलो हतो। तीहयो हदस्सा नाम नी आह़फा नी बीजी आय्ह नी बेनेह ने, जे एस्तर बी केवायती हती, पाळलो-पोहलो हतो; काहाके तीना आय्ह-बाहा नी हता, अने तीहयी सोरी घटाळ्ळी अने सीकाळ्ळी हती, अने जत्यार तीना आय्ह-बाहा मर ज्या, ता मोर्दके तीने आह़फा नी सोरी करीन पाळ्यो।
जत्यार राजा ना हुकम अने नेम ह़मळाया, अने घण ढेरका सोर्या, सुसनगड़ मे हेगे ना अदीकार मे एक्ठी करीन ह़ोप देदा, ता एस्तर ने बी राजवाड़ा मे बयरा ना जुगाड़ करवा वाळा हेगे ना अदीकार मे ह़ोप देदी। एस्तर तीनी नींगा मे वारु लागी अने तीहयो तीनी सी खुस हयो, ता तीहयो वार लगाड़्या वगर तीने राजवाड़ा मे गेथु चोखु करवा नु ह़मान, अने तीनु खाणु, अने तीनी जुगु टाळली ह़ात दोस्तीदार्याण बी आप्या, अने तीने अने तीनी दोस्तीदार्याण ने राणी ना रेवा ना जागा मे आखा गेथो वारु रेवा नो जागो आप्या।
एस्तर नी ते आह़फी नु घोराणु ना बारा मे देखाड़ी अने नी आह़फी नो कुळीवेलो, काहाके मोर्दके तीने हुकम आपलो हतो के तीने नी देखाड़जे। मोर्दके दाड़ीक राणी ना रेवा ना जागा ना आंगणान अगळ माय्न आनीन करते सरक्या करतो हतो के एस्तर केवी से अने तीनी ह़ाते ह़ु हयहे?
जत्यार एक-एक सोरी नी वारी आयी, के तीहयी सयर्स राजान्तां जाय अने आहयु तीहयी टेमे हयु जत्यार तीनी ह़ाते बयरा जुगु ठेरावला नेम नी अनसारे बारे मयना तक वेहवार करला हता; मतलब तीमना ह़ींगार करवा ना दाड़ा आहयी रीते वीत ज्या के छो मयना गंदायण्या रोह नु तेल चोपड़ता हता, अने छो मयना तक गंदायण्यो मसालो, अने बयरा ने ह़ींगारवा नु बीजु ह़मान लगाड़ता हता। आहयी रीते तीहया सोर्या जत्यार राजान्तां जता हता, ता जे कंय तीहयी राणी ना रेवा ना जागे गेथु राजवाड़ा मे लीजवा हींडे, तीहयु ह़मान तीने आपता हता। ह़ांती ते तीहयी जती हती अने ह़वारे तीहयी पासी आवीन राणी ना रेवा ना जागा ना बीजा घोर मे जाय्न रखेल ना जुगाड़ लगाड़वा वाळा राजा ना गतराड़ा सासगज ना अदीकार मे हय जता हता, अने राजान्तां अळी नी जती हती, कदीम राजो तीनी सी खुस हय जतो हतो, ता तीने नाम लीन बोलावता हता।
जत्यार मोर्दके ना काका अबीहेल नी सोरी एस्तर, जीने मोर्दके सोरी मानीन पाळलो हतो, तीनी वारी आयी के तीहयी राजान्तां जाय, ता जे कंय बयरा नो जुगाड़ लगाड़वा वाळो राजा नो गतराड़ो हेगे तीनी जुगु ठेरावलो हतो, तीनी गेथु जादा तीहयी अळी कंय बी नी मांगी। जेतरा एस्तर ने देख्या, तीहया आखा तीनी सी खुस हया। एस्तर ने राजवाड़ा मे राजा सयर्स ने तां तीना राज ना ह़ातवा साल ना तेबेत नाम ना दहवा मयना मे ली ज्या, राजो एस्तर ने बीजा बयरा गेथो जादा मोंग कर्यो, अने बीजा आखा कुवार्या सोर्या करते बरकत अने दया नी नींगा तीनीत पोर हयी, करीन तीहयो तीना मुंडा पोर राज-मुकुट पेरायो अने तीने वसती ना जागा पोर राणी बणायो। ता राजो आह़फा ना आखा अदीकार्या अने काम करवा वाळा ने घणु जादा खाणु खवाड़्यो, अने तीने एस्तर नु खाणु केदो; अने देस मे छुट्टी आप्यो अने दया नी लायक ईलाम बी वाट्यो।
मोर्दके नु राजा नो जीव बचाड़नु
आहयी टेमे राजो मोर्दके ने आह़फा नी सरकारी सेवा करवा टाळ लेदलो हतो, एस्तर आह़फी ना माणहु अने कुळ ना बारा मे देखाड़ली नी हती, काहाके मोर्दके तीने आसम हुकम आपलो हतो के नी देखाड़जे; अने एस्तर मोर्दके नी वात आसम मान्ती हती जेम के तीनीन्तां तीने पाळवा-पोहवा नी टेमे मान्ती हती।
तीहयात दाड़ा मे जत्यार मोर्दके राजा ना राजवाड़ा ना झापले बह्या करतो हतो, ता राजा ना गतराड़ा जे झापले पेहरो देण्या बी हता, तीमनी मे गेथा बीगतान अने तेरेस नाम ना बे जणा राजा सयर्स ह़ाते रीहाय्न तीने मारवा नो वीच्यार कर्या। आहयी वात मोर्दके ने मालम हयी, अने तीहयो एस्तर राणी ने आहयी वात देखाड़्यो, अने एस्तर राणी मोर्दके नु नाम लीन राजा ने चेताय देदी। ता पुसतास करीन आहयी वात ह़ाचली नीकळी अने तीमने बेम जणा ने झाड़कु पोर टांग देदा, अने आहयी काहणी ने राजा अगळ खांदानी नी कीताप मे लीख लेदा।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.