Paliya Bible
एस्तर 1
वसती राणी राजा सयर्स नी बेजती करे
सयर्स नाम ना राजा ना राज ना दाड़ा मे आहयी वात हयी: आहयो तीहयोत सयर्स से, जे एक ह़ो सत्तावीस देस पोर मतलब भारत देस सी लगाड़ीन कुस देस1 तक राज करतो हतो। राजा सयर्स ना राज करवा ना दाड़ा मे राजवाड़ु सुसन नाम ना कीला मे हतु तां राजगादी पोर बहीन तीहयो राज करतो हतो।
ता तीहयो आह़फा ना राज करवा ना तीसरा साल मे आह़फा ना अदीकार्या ने अने काम करन्या ने खाणु खवाड़्यो। फारस अने मादे देस ना सीपायड़ा ना मुख्या अने देस-देस ना मुख्या अने अदीकार्या बी तां हता। तीहयो तीमने घणा दाड़ा मतलब छो मयना तक आह़फा ना राजवाड़ा नु माल-धन अने बड़ाय नु कीमती ह़मान देखाड़तो र्यो।
आहया दाड़ा पुरा हयवान अळतेण राजो आखा नान्ला-मोट्ला तीहया आखा ने बी जे सुसन नाम ना कीला मे एक्ठा हयला हता, राजवाड़ा ना बगीचा नु आंगणु मे ह़ात दाड़ा तक खाणु खवाड़्यो। तां ना पड़दा धोळ्ळा अने लील्ला सुती ना हता, अने हीर अने जामण्या रंग नी दोरी वेर चांदी ना छल्ला मे, संगमरमर ना खम्बा मे लागला हता; अने तां ना बहवा ना पाट्ला ह़ोनु-चांदी ना हता; अने रात्ली अने धोळ्ळी अने पीळ्ळी अने काळ्ळी संगमरमर नी बणली फरसी पोर मेकला हता तीहया खाणु नी पंगात मे राजा नी लायक अंगुर नु ह़रु भाती-भाती ना ह़ोना ना ठाहरा मे घालीन राजा ना सोक सी घणु जादा पीयाड़्या। पीवा ते नेम नी अनसारे हयतु हतु, काहाके राजो आह़फा ना आखा खाणु-पीणु आपवा वाळा ने हुकम आपलो हतो, के जे पोरणु जेम चाहे तेमेत तीनी ह़ाते वेहवार करे।
राणी वसती बी राजा सयर्स ना घोर मे बयरा ने खाणु खवाड़ी।
ह़ातवा दाड़े, जत्यार राजा नु मन अंगुर नु ह़रु मे खुस हतु, ता तीहयो महुमान, बीजता, हर्बोना, बीगता, अबगता, जेतेर अने कर्कस नाम ना ह़ातोव गतराड़ा ने जे सयर्स राजा नी अगळ सेवा-चाकरी कर्या करता हता, हुकम आप्यो, के राणी वसती ने राज-मुकुट पेरलीत राजा नी अगळ ली आवो; जीनी सी के देस-देस ना माणहु अने अदीकार्या अगळ घटाळ्ळी देखाय सके; काहाके तीहयी देखायवा मे घटाळ्ळी हती। गतराड़ा नी लारे राजा ना आहया हुकम ने ह़मळीन राणी वसती आव्वा सी नीकारो कर देदी। आनी पोर राजो घण जबर खीजवाय पड़्यो।
ता राजो टेम-टेम ना बारा मे जाणवा वाळा पुंजारा ने पुछ्यो, राजो ते नेती अने नीयाव ना आखा अक्कल वाळा सी आसमेत कीया करतो हतो। तीनी पांह कर्सना, सेतार, अदमाता, तर्सीस, मेरेस, मर्सना, अने ममुकान नाम ना फारस अने मादे देस ना ह़ात मुख्या हता, जे राजा नो दरसन करता हता, अने राज्य मे मुख्या-मुख्या जागा पोर टाळला हता। राजो पुछ्यो, “राणी वसती राजा सयर्स ना, गतराड़ा नी लारे आपला हुकम ने नी मानी, ता नेम नी अनसारे तीनी ह़ाते ह़ु करवा जोवे?”
ता ममुकान, राजा अने अदीकारी नी अगळ आहयो जपाप आप्यो, “राणी वसती जे गलत काम करली से, तीहयु राजा ह़ाते एतरुत नी पण आखा अदीकार्या ह़ाते अने तीहया आखा देस ना माणहु ह़ाते बी करली से; जे राजा सयर्स ना आखा देस मे रेय। काहाके राणी ना आहया काम नी वात आखा बयरा मे हयहे अने जत्यार आहयु केहे, ‘राजो सयर्स राणी वसती ने आह़फा अगळ ली आव्वा नो हुकम आप्यो पण तीहयी नी आवी,’ ता तीहया बी तीमना घोरवाळाम ने हेटा ह़मजवा बाज जहे। आज ना दाड़े फारसी अने मादे देस ना अदीकार्या ना लाड्या जे राणी नी आहयी वात ह़मळला से, तीहया बी राजा ना आखा अदीकार्याम ने आसमेत केवा बाज जहे; आहयी रीते घण-जबर ह़ीगी अने रीह पयदा हयहे। कदीम राजा ने वारु लागे, ता आहयो हुकम नीकाळे, अने फारस अने मादे देस ना नेम मे लीखी बी देय, जीनी सी कदी बी बदल नी सके, के राणी वसती राजा सयर्स नी अगळ अळी कदी आव्वा नी जोवे, अने राजो पटराणी नो जागो कानी बीजी ने आप देय जे तीनी गेथी वारु हय। जत्यार राजा नो आहयो हुकम तीना आखा राज्य मे ह़मळावहे, ता आखा लाड्या आह़फा-आह़फाम ना घोरवाळा नी ईज्जत करहे, भले गरीब हय के अमीर।”
आहयी वात राजा ने अने अदीकार्या ने गम जी अने राजो ममुकान नी ह़ला ने मान लेदो अने आह़फा ना राज्य मे, मतलब आखा देस नी भासा ना आकड़ा मे आखी जाती नी बोली मे चीठ्या ली मोकल्यो, के आखा अदमी आह़फा-आह़फाम ना घोर मे अदीकार चलाड़े, अने आह़फाम नी जाती नी बोली बोल्या करे।
Source notes (1)
- Footnote कुस देस कुस देस नु पेले ईथीफीया हतु
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.