Paliya Bible
एस्तर 3
यहुदी माणहु ने खत्तम करवा नी हामान नी लारे चाल
आहयी वात हयवान अळतेण राजो सयर्स अगाग कुळ ना हम्मदाता ना सोरा हामान ने तीनी बड़ोत्री करीन आखा सी उचो पद आप्यो, राजा ना आखा काम करवा वाळा जे राजवाड़ा ना झापले रीया करता हता, तीहया हामान अगळ ढुंगा वळीन वांद्या करता हता काहाके राजो तीना बारा मे आसमेत हुकम आपलो हतो; पण मोर्दके नी ते ढुंगो वळतो हतो अने नी वांदतो हतो। ता राजा ना काम करन्या जे राजवाड़ा ना झापले रीया करता हता, तीहया मोर्दके ने पुछ्या, “तु राजा ना हुकम ने काहा नी मान्तो?” जत्यार तीहया दाड़ीन तीने आसमेत केता र्या, अने तीहयो तीमनी एक बी वात नी मान्यो, ता तीहया आहयु देखवा नी ईच्छा सी के मोर्दके नी आहयी वात मानहे के नी, करीन हामान ने देखाड़ देदा; तीहयो तीमने देखाड़ देदलो हतो के मे यहुदी से। जत्यार हामान देख्यो के मोर्दके ढुंगो नी वळतो, अने मने नी वांदतो, ता हामान घणो खीजवाय आयो। तीहयो मोर्दके ने एतरोत देवा वारु नी ह़मज्यो। काहाके तीहया हामान ने की देदला हता के मोर्दके कानी जाती नो से, एतरे हामान सयर्स ना देस मे रेवा वाळा आखा यहुदीम ने बी मोर्दके नी जाती जाणीन, खत्तम कर देवा हींडतो हतो।
राजा सयर्स ना बारवा साल ना नीसान नाम ना पेल्ला मयना मे, हामान अदार नाम ना बारवा मयने तक ना एक-एक दाड़े अने एक-एक मयना जुगु “पुर” मतलब आह़फा अगळ चीट्ठी नखाड़्यो।
ता हामान राजा सयर्स ने केदो, “तारा राज्य ना आखा देस मे रेवा वाळा देस-देस ना माणहु नी वचमे अलग-अलग जागे खोळवायला माणहु से, जीना नेम बीजा माणहु ना नेम करते अलग से; अने तीहया राजा ना नेम पोर नी चालता, करीन तीमने रेवा देवा राजा नी करते फायदो नी हय। कदीम राजा ने वारु लागे ता तीमने खत्तम करवा नो हुकम लीखे, अने मे राजा ना गोदाम रखवाळ्या ना हात मे राजवाड़ा मे पुगाड़वा करीन, दह हजार चांदी ना सीक्का आपही।”
ता राजो आह़फा नी वीटी आह़फा नी आंगळी मे गेथी काडीन, अगाग कुळी ना हम्मदाता ना सोरा हामान ने, जे यहुदीम नो वेरी हतो आप देदो; अने राजो हामान ने केदो, “आहया माणहु अने तीमना पय्हा तारा हात मे से; अने तीमनी ह़ाते जेम तारु मन करे तेवोत वेहवार करे।”
ता तीहयात पेल्ला मयना ना तेरवा दाड़े राजा ना लीखण्या ने बोलाया, अने हामान ना हुकम नी अनसारे राजा ना आखा मंत्री, अने आखा देस ना मुख्या, अने देस-देस ना अदीकार्या जुगु चीठ्या, एक-एक देस ना अक्कर मे, अने एक-एक देस ना माणहु नी भासा मे राजा सयर्स ना नाम सी लीख्या; अने तीनी मे राजा नी वीटी नो सीलटप्पो लगाड़ देदा। राज्य ना आखा देसु मे आहया नेम ना चीठ्या ने, चीठ्या लीजवा वाळा नी लारे ली मोकल्या के एकीत दाड़ा मे, मतलब अदार नाम ना बारवा मयना ना तेरवा दाड़े, ह़ु जुवान, ह़ु डायला, ह़ु बयरा, ह़ु सोरा, आखा यहुदीम ने मार नाखे, अने तीमने खत्तम कर देय; अने तीमना माल-धन ने लुट लेय। तीहया हुकम लीखली चीट्ठी ना नकल ने आखा देस मे खुल्ला ली मोकल्या अने देखाड़्या के आखा देस ना माणहु तीहया दाड़ा जुगु तीयार हय जाय।
आहयो हुकम सुसन नाम ना कीला मे आप्यो, अने चीट्ठी वयवा वाळा राजा ना हुकम सी तत्यारुत नीकळ ज्या। राजो अने हामान ते पीवा बह ज्या, पण सुसन ह़ेर मे घबराट फेल जी।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.