Paliya Bible
वेवस्थावीवरन 4
मुसा नी ह़ीकापण
हाव, ए ईस्रायल, जे रीती अने नेम अने हुकम में तमुने ह़ीकाड़वा हींडु तीने ह़मळ ले, अने तीनी पोर चालो; जीनी सी तमु जीवत्ला रेवो, अने जे देस तमारा आड़ा-बुड़ा नो भगवान यहोवा तमुने आपे तीनी मे जीन तीना अदीकार्या हय जावो। जे हुकम में तमने ह़मळावु तीनी मे नी ते कंय बड़ावजो, अने नी ते कंय घटावजो; तमारो भगवान यहोवा नो जे-जे हुकम तमने ह़मळावलो से तीने तमु मानजो। तमु ते आह़फाम ना डोळा सी देखला से के बालपोर ना कारण यहोवा ह़ु कर्यो; मतलब जेतरा माणहु बालपोर देवता नी पछळ हय जेला हता आखाम ने तमारो भगवान यहोवा तमारी वच मे गेथो खत्तम कर नाखलो; पण तमु जे आह़फाम ना भगवान यहोवा ह़ाते जोड़ायला र्या, आखान आखा आज तक जीवत्ला से,
ह़मळो, में ते आपणा भगवान यहोवा ना हुकम नी अनसारे तमुने हुकम अने नेम ह़ीकाड़लो से, के जे देस नो अदीकारी हयवा जाय तीनी मे तीनी अनसारे चालो। एतरे तमु तीनी अनसारे काम करजो अने पाळजो; काहाके बीजा देसु ना माणहु नी सामने तमारी अक्कल अने ह़मज आनी सी उजन्ती हयहे, मतलब तीहया आहयी आखी रीतीम ने ह़मळीन केहे, के पक्कु आहयु मोट्लु राज्य अक्कल वाळु अने ह़मजदार से।
एवु कानु मोट्लु राज्य से, जीनो देवता तीनी ह़ाते रेतो हय, जीसम अमारो मालीक भगवान अमारी ह़ाते रेय। जत्यार-जत्यार आमु तीने आड़या, तीहयो अमारी वीन्ती ह़मळे। अळतेण एवु कानु मोट्लु देस से जीनी पांह एवी संय रीती अने नेम हय, जीसम के आहयी आखी वेवस्था जीने में आज तमारी सामने मेलु ? “आहयु घणु जरुड़ी से के तमु आपणा बारा मे सोचता रेवो, अने आपणा मन नी वारु चोकसी करो, कंखर माय्न आसम नी हये के जे-जे वातु तमु आह़फाम ना डोळा सी देख्या तीने भुल जावो, अने तीहयी जलम नी लेदे तमारा मन सी जत रेय; पण तमु तीने आह़फाम सोरा अने तीमना सोरा ना सोरा ने ह़ीकाड़जो। खास करीन तीहया दाड़ा नी वातु जीनी मे तमु होरेब नी पांह आपणा भगवान यहोवा नी अगळ उबा हता, जत्यार यहोवा मार सी केदो हतो, ‘तीहया माणहु ने मारी पांह एक्ठो कर के मे तीमने आपणी वात ह़मळावु, जीनी सी तीहया ह़ीके, काहाके जेतरा दाड़ा तीहया धरती पोर जीवत्ला रेय तेतरा दाहड़ा मारी बीक मान्ता रेय, अने आपणा सोरा-सोरी ने बी आहयुत ह़ीकाड़े।’
“तत्यार ह़ाते जाय्न तीहया बड़ान हेटा उबा हया, तत्यार बड़ो आक्ठा सी धप उठ्यो, अने तीनी आच ह़रग लग पुग जी, अने तीनी च्यारो-मेर अंदारलु हतु, अने वादळु, अने घणु अंदारलु छवायलु हतु। तत्यार यहोवा तीहया आक्ठा नी वच मे सी वात कर्यो; तमु तीनी वात नो बोल ते ह़मळ्या, पण कोय रुप नी देखायो, नीस्तो बोलेत ह़मळाय पड़्यो। अने तीहयो तमुने आह़फा ना वायदा ना दहोव बोल देखाड़ीन तीमने मानवा नो हुकम आप्यो; अने तीमने दगड़ा ना बे पट्या पोर लीख देदो। अने मने यहोवा तीहयी टेमे तमने रीती अने नेम ह़ीकाड़वा नो हुकम आप्यो, एतरे जे देस ना हकदार्या हयवा नी लेदे तमु पार जवा पोर से तीनी मे तमु तीने मान्या करो।
मुर्ती पुजा ना वीरोद मे चेतावणी
“एतरे तमु खुद जादा चेतीन रेजो। काहाके जत्यार यहोवा तमारी ह़ाते होरेब बड़ा पोर आक्ठा ना वच मे सी वात कर्यो तत्यार तमने कोय रुप नी देखाव पड़्यो, कंय माय्न आसम नी हये के तमु बगड़ीन अदमी नीता बयर ना, नीता धरती पोर चालवा वाळा काना जानवर, नीता ह़रग मे उडवा वाळा काना चड़ा ना, नीता धरती पोर पेट ना भरहे चालवा वाळा काना जन्तु, नीता धरती पोर ना पाणी मे रेवा वाळी कानी माछली ना रुप नी कानी मुर्ती घड़ीन बणाय लेवो, नीता आसम नी हये के जत्यार तमु ह़रग भणी डोळा उचा करीन दाहड़ु, चांद, अने ताराम ने, मतलब ह़रग नी आखी तारा मंडळी ने देखो, तत्यार भटकीन तीमने वांदीन तीमनी सेवा करवा बाज जावो जीमने तमारो भगवान यहोवा धरती पोर ना आखा देस वाळा जुगु मेकलो से। अने तमने यहोवा लुहड़ा ना भाटा ह़रका मीस्र देस सी नीकाळीन ली आवलो से, आनीन करीन के तमु तीना माणहु ना रुप मे वाटो ठेरो, जीसम आज उजन्तु से। अळतेण तमारा कारण यहोवा मारी सी रीह करीन आहयी ह़ाम खादो, ‘तु यरदन नंदी पार नी जाय सके, अने जे वारु देस ईस्रायली माणहु नो भगवान यहोवा तीमने तीमनो वाटो करीन आपलो से तीनी मे तु भराय नी सके।’ मने आहया देस मे मरवा से, में यरदन नंदी पार नी जाय सकतो; पण तमु पार जीन तीहया वारला देस ना अदीकारी हय जहु। आनीन करीन खुद चेतीन रेवो, कंखर माय्न आसम नी हये के तमु तीहया वायदा ने भुलीन, जे तमारो भगवान यहोवा तमारी सी करलो से, कानी अळी चीज नी मुर्ती घड़ीन बणावो, जीने तमारो भगवान यहोवा तमने मना करलो से। काहाके तमारो भगवान खत्तम करवा वाळु आक्ठु से; तीहयो रीह राखवा वाळो भगवान से।
“कदी तीहया देस मे रेते-रेते ढेरेत दाड़ा वीत जवा पोर, अने खुद ना सोरा अने सोरा ना सोरा पयदा हयवा पोर, तमु बगड़ीन कानी चीज ना रुप नी मुर्ती घड़ीन बणावो, अने आहयी रीते आह़फाम ना भगवान यहोवा नी लेदे बुराय करीन तीने खीजवाड़ देवो, ता में आज ह़रग अने धरती ने तारी वीरोद मे गवा देवा बोलावु: तमु तीहया देस मे गेथा सोटात खत्तम हय जहु जां तमु यरदन नंदी पार करीन अदीकार करवा नी लेदे जवा बाज र्या। तमु तीनी पोर जादा दाड़ा तक जीवत्ला नी री सको, पण पुरात मर जहु। यहोवा तमने बीजा देसु मे तीतर-बीतर कर देहे। जां मालीक तमने लीन जहे, तीहया देसु नी वचे तमु थोड़ाकेत री जहु। तां तमु माणहु ना हात सी बणावला लाकड़ा अने दगड़ा ना देवताम नी चाकरी करहु, जे नी देख सके, नी ह़मळ सके, नी खाय सके, अने नी ह़ुंग सके। पण तां तमु आपणा भगवान यहोवा ने ह़ोदहु, अने कदी तमु आपणा पुरा मन सी तीने ह़ोदहु ता तमु तीने हात कर लेहु। जत्यार तमु वेला मे पड़हु, अने आखरी दाड़ा मे आहयी आखी वातु जे में केदलो से तमारी ह़ाते हयहे, तत्यार तमु आह़फाम ना मालीक भगवान भणी फीरहु, अने तीनी मानहु; काहाके तमारो मालीक भगवान दयाळ्ळो भगवान से। तीहयो तमने नी ते छोड़े, नी ते खत्तम करे; जे वायदो तीहयो तमारा आड़ा-बुड़ा ह़ाते ह़ाम खाय्न करलो हतो तीने तीहयो नी भुले।
“वीत्या दाड़ा नी हेर करो, जे तमारी ह़ाते तीहया दाड़ा मे हयलु से जत्यार भगवान धरती पोर पयदा करलो हतो, आहयो सवाल पुछजो: ह़ु ह़रग नी एक काकड़ सी बीजी काकड़ तक कदी आसवी मोट्ली घटना घटली से? ह़ु कदी आसवी कंय वात ह़मळवा मे आवली से? ह़ु बीजा माणहु आक्ठा नी वचे सी जीवत्ला भगवान ने बोलत्लो ह़मळ्ळा से जीसम तमु ह़मळो, अने ते बी जीवत्ला र्या? जीसम तमारो मालीक भगवान मीस्र देस मे तमारा डोळा अगळ करलो हतो, ह़ु तेम कानो बीजो भगवान आवीन पारख, सेलाणी, जुदा कामु, लड़ाय, ताखत वाळा हात, मोट्ला जुदा कामु अने छुटकारा नी लेदे फेलला हातु सी काना देस ने आपणी लेदे, बीजा देसु नी वचे सी टाळवा नु हीम्मत नु काम करलो से? ए ईस्रायल ना माणहु! आहयु तने आनीन करीन देखाड़लु हतु के तने मालम हय जाय के यहोवा भगवान से; आने छोड़ीन बीजो भगवान नी हय। ह़रग मे गेथो तीहयो तने तीनी अवाज ह़मळायो के तने ह़ीकापण आपे; अने धरती पोर तीहयो तने आह़फा नु मोट्लु आक्ठु देखाड़्यो। अने तने खुद तीना बोल आक्ठा नी वचे गेथा आवत्ला ह़मळाय पड़्या। तीहयो तारा आड़ा-बुड़ा ह़ाते मोंग करलो हतो, एतरे तीहयो तीनी बाद तीना कुळ ने टाळ्यो, अने तीनी हजुरी सी, आह़फा नी मोट्ली सक्ती सी तीहयो तने मीस्र देस सी नीकाळ लायो। के तारी सी जादा मोटु अने ताकत वाळु देस ने तारी सामने सी नीकाळीन तीना जागा मे तने वहाड़े, बाह ना हक नी लेदे तीमनु देस तने आपे; जीसम आज बी से। एतरे आज तु आहयु जाण ले, अने तीने तारा मन मे बहाड़ ले के उपर ह़रग मे अने हेटो धरती पोर मालीकेत भगवान से; तीने छोड़ीन बीजो भगवान नी हय। एतरे तु नेम अने हुकमु नो पाळण करजे जीनो हुकम में आज तने आपवा बाज र्यो, जीनी सी तारु अने तारी अवल्यात नु भलु हये, अने तु तीहया देस मे ढेरेत दाड़ा जीवतो रेय, जीने तारो भगवान सदा नी लेदे तने आपवा बाज र्यो।”
यरदन नंदीन उगवणी ह़ोड़ आसरा ना ह़ेर
तत्यार मुसा यरदन नंदीन ह़ेली पार, उगवणी भणी तीन ह़ेर अलग कर्या, एतरे के जे कोय जाण्या वगर अने पेले सी वेर राख्या वगर आपणा काना ह़ाते वाळा ने मार नाखे, तीहयो तीनी मे काना ह़ेर मे नाहीन आपणा जीव ने बचाड़ सके। रुबेनीयो नु बेसेर ह़ेर जे जंगल ना बराबर ना जागा ना देस मे से, अने गाद ना घोराणा नी लेदे गीलाद देस मे रामोत, अने मनस्से ना घोराणा नी लेदे बासान ना देस मे गोलान।
भगवान ना कायदा नी ओळखाण
जे कायदा मुसा ईस्रायल ना माणहु नी वचे ठेरावलो हतो, तीहया आहया से। आहया ते चेतावणी अने नेम से जीने मुसो ईस्रायल ना माणहु ने तीहयी टेमे ह़मळावलो हतो, जत्यार तीहया मीस्र देस मे गेथा नीकळीन आवला हता, अने यरदन नंदीन पार, बेतपोर नी सामने नी वारली जागा मे, एमोरी ना राजा सीहोन, जे हेसबोन ना ह़ेर मे रेतो हतो। जत्यार मुसो अने ईस्रायल ना माणहु मीस्र देस सी नीकळीन आवला हता तत्यार तीहया राजा सीहोन ने हरावला हता। तीहया तीमना देस अने बासान ना राजा ओग ना देस पोर बी अदीकार कर लेदा। आहया एमोरी ना बेम राजा यरदन नंदी नी ह़ेली पार, उगवणी भणी नी जागा मे रेता हता। तीहया अरोएर ह़ेर सी, जे अर्नोन नी टेकड़ी नी छेव पोर से, सीय्योन नो मोट्लो बड़ो मतलब हेर्मोन तक अने यरदन नंदी नी उगवणी भणी ना आखा अराबा ना जागा सी अराबा नी दर्या तक, मतलब पीसगा ना टेकड़ान हेटा तक, आखा देस पोर हक कर लेदला हता।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.