वेवस्‌थावीवरन 3

राजा ओग नी हार

(गीनती 21:31-35)

1“तत्‌यार आमु अगा बड़ला, अने बासान नी वाट भणी ज्‌या; अने बासान नो ओग नाम नो राजा आह़फा नी आखी सेना भेळ अमारो सामनो करवा नी लेदे नीकळ आयो, के एद्‌रेई मे लड़ाय करे। 2तत्‌यार यहोवा मने केदो, ‘तीनी सी ना बीहे; काहाके में तीने आखी सेना अने देस भेळ तारा हात मे कर देम; अने जीसम तु हेसबोन मे रेवा वाळा एमोरीयो ना राजा सीहोन ह़ाते कर्‌यो तेमेत तीनी ह़ाते बी करजे।’

3“आहयी रीते अमारो भगवान यहोवा आखी सेना भेळ बासान ना राजा ओग ने बी अमारा हात मे कर देदो; अने आमु तीने आञे तक मारता र्‌या के तीमनी मे गेथु कोय बी नी बच्‌यु। 4तीहयीत टेमे आमु तीमना आखा ह़ेर ने ली लेदा, अने कानु आसम ह़ेर नी र्‌यु जीने आमु तीमनी पांह गेथु नी लेदा हय, आहयी रीते अर्‌गोब नु आखु देस, जे बासान मे ओग ना राज्‌य मे हतु अने तीमनी मे साट ह़ेर हता, तीहयु अमारा हक मे आय ज्‌यु। 5आहया आखा ह़ेर कीला वाळा हता। ईमना उचा-उचा भीतड़ा अने झापला, अने डांडा हता, अने ईमने छोड़ीन भीतड़ा वगर ना बी ढेरेत ह़ेर हता। 6अने जीसम आमु हेसबोन ना राजा सीहोन ना ह़ेर ह़ाते करला हता तेमेत आमु आहया ह़ेर ह़ाते बी कर्‌या, मतलब आखा वहला ह़ेरु ने बयरा अने सोरा-सोरी भेळ खत्‌तम कर देदा। 7पण आखा पाळ्‌ळा जानवरु अने ह़ेरु नी लुट आपणी कर लेदा।

8“आमु तीहयी टेमे यरदन नी आहयी धेड़े रेवा वाळा एमोरी ना बे राजाम ना हात सी अर्‌नोन ना कोतड़े गेथा लगाड़ीन हेर्‌मोन बड़ान्‌तां तक ना देस ली लेदा। 9हेर्‌मोन ने सीदोनी माणहु सीर्‌योन, अने एमोरी माणहु सनीर केय। 10समथर देस ना आखा ह़ेर, अने आखु गीलाद, अने सलका, अने एद्‌रेई तक जे ओग ना राज्‌य ना ह़ेर हता, आखु बासान देस ली लेदा।”

11बासान नो राजा ओग रपाय नो आखरी जीवत्‌लो माणेह हतो। तीनु खाट्‌लु जे वारला दगड़ा नु से तीहयु अम्‌मोनीयो ना रब्‌बा ह़ेर मे मेकलु से, माणहुन हात ना हीसाप सी तीनी लम्‌बाय च्‌यार मीटर अने बे मीटर चवड़ु से।

देस ना जागो नु वाटणु

(गीनती 32:1-42)

12“जे देस आमु तीहयी टेमे अमारा अदीकार मे ली लेदा तीहया आहया से, मतलब अर्‌नोन ना कोतड़ा ना धेड़े वाळा अरोएर ह़ेर सी लीन आखा ह़ेरु भेळ गीलाद ना बड़ा ना देस नो आदो वाटो, जीने मे रुबेनीयो अने गादीयो ने आप देदो, 13अने गीलाद नो बचलो वाटो, अने आखु बासान, मतलब अर्‌गोब नु आखु देस जे ओग ना राज्‌य मे हतु, आने मे मनस्‌से ना आदा कुळ ने आप देदो।”

आखु बासान ते रपाईयो नु देस केवायतु हतु। 14मनस्‌से नो सोरो याईर गसुरीया अने माका मे रेवा वाळा नी काकड़ तक अर्‌गोब नु आखु देस ली लेदा, अने बासान ना ह़ेरु नु नाम आह़फा नाम पोर हब्‌बोयाईर पाड़्‌यो, अने तीहयुत नाम आज लग बणलु से।

15“अने मे गीलाद देस माकीर ने आप देदो, 16अने रुबेनीयो अने गादीयो ने मे गीलाद सी लीन अर्‌नोन ना कोतड़े लग नु देस आप देदो, मतलब तीहया कोतड़ा ना वचे तीनी काकड़ ठेरायो, अने यब्‌बोक नंदी तक जे अम्‌मोनीयो नी काकड़ से; 17अने कीन्‌नेरेत सी लीन पीसगा ना आड़खान हेट्‌ला अराबा ना दर्‌या लग, जे खारली दर्‌या बी केवाय, अराबा अने यरदन नंदी नी उगवणी भणी ना आखा देस बी में तीमने आप देदो।

18“तीहयी टेमे में तमने आहयो हुकम आप्‌यो, तमारो भगवान यहोवा तमने आहयु देस आपलो से के तीने आपणा हक मे राखो; तमु आखा लड़ायन्‌या आखा हत्‌यार लीन आपणा भाय ईस्‌रायली नी अगळ-अगळ पार चालो। 19पण तमारा बयरा, अने सोरा-सोरी, अने जानवरु, जीमने में जाणु के ढेरेत से, तीहया आखा तमारा ह़ेरु मे जे में तमुने आपलो से री जाय। 20अने जत्‌यार यहोवा तमारा भायुम ने तेम अराम आपे जीसम के तीहयो तमने आपलो से, अने तीहया ते देस ना अदीकार्‌या हय जाय जे तमारो भगवान यहोवा तीमने यरदन नंदी नी पार आपे; तत्‌यार तमु बी आपणा-आपणा अदीकार नी जागा पोर जे में तमने आपलो से पाछा आवहु।

21“अळतेण में तीहयी टेमे यहोसु ने चेतावीन केदो, ‘तु तारा डोळा सी देखलो से के तारो भगवान यहोवा आहया दाहड़ा मे राजाम नी ह़ाते ह़ु-ह़ु करलो से; तेमेत यहोवा तीहया आखा राज्‌य ह़ाते करहे जीमनी मे तु पार हय्‌न जही। 22तीनी सी नी बीहजो; काहाके जे तमारी भणी गेथो लड़ाय करवा वाळो से तीहयो तमारो भगवान यहोवा से।’

मुसा ने कनान देस मे भरायवा सी नीकारो करवु

23“तीहयीत टेमे में यहोवा पांह वीन्‌ती कर्‌यो, 24‘ए मालीक यहोवा, तु आह़फा ना चाकर्‌या ने आह़फा नी बड़ाय अने ताखत वाळा हात देखाड़वा बाज जेलो से; ह़रग मे अने धरती पोर एवो कानो देव से जे तारी पांह काम अने हीम्‌मत नु काम कराय सके? 25एतरे मने पार जवा दे के यरदन नंदी ना ह़ेली धेड़े ना वारला देस ने, मतलब तीहया वारला बड़ा अने लबानोन ने बी देख सकु।’

26“पण यहोवा तारा कारण मारी ह़ाते नराज हय जेलो से, अने मारी नी ह़मळ्‌यो; पण यहोवा मने केदो, ‘हेतरुत; आना बारा मे अळी कदी मार ह़ाते वात नी करजे। 27पीसगा बड़ा नी चोट्‌ली पोर चड़ जा, अने उगण, बुडण, धुराव, दखणाव च्‌यारो मेर नींगा करीन तीहया देस ने देख ले; काहाके तु आहयी यरदन नंदी नी पार नी जाय सकतो। 28अने यहोसु ने हुकम आप दे, अने तीने हीम्‌मत आपीन वातड़ो कर; काहाके आहया माणहु नी अगळ-अगळ तीहयोत पार जहे, अने जे देस तु देखही तीने तीहयो तीनो खुद नो वाटो कर देहे।’

29“तत्‌यार आमु बेतपोर नी सामने नी घाटी नी जागा मे री जेला हता।”