Paliya Bible
वेवस्थावीवरन 24
लाडी छोड़वा अने पासो वेवा करवा
“कदी कानो अदमी कानी बयर सी वेवा कर लेय, अने तीनी बाद तीनी मे कंय लाज नी वात देखीन तीनी सी खुस नी हये, ता तीहयो तीनी जुगु एक सोड़वा नी चीट्ठी लीखीन तीना हात मे आपीन तीने घोर सी नीकाळ देय, अने जत्यार तीहयी घोर सी नीकळ जाय, तत्यार बीजा नी लाडी बण सके। पण कदी तीहयी बयर बीजा अदमी ने बी नी गमे, अने तीहयो बी तीनी जुगु सोड़वा नी चीट्ठी लीखीन तीना हात मे आपीन तीने आह़फा ना घोर सी नीकाळ देय, नीता तीहयो बीजो अदमी जे तीने आह़फा नी बयर करीन लावलो हतो मर जाय, ता तीनो पेल्लो लाडो, जीने तीहयो नीकाळ देदलो हय, तीने वीटळ जवान बाद तीने आह़फा नी लाडी नी बणाव्वा जोवे काहाके आहयु यहोवा नी अगळ गलत वात से। आहयी रीते तु तीहया देस ने जीने तारो भगवान यहोवा तारो हीस्सो करीन तने आपे तीने पापी नी बणावजे।
बीजा नेम
“जे अदमी ना हमणेत वेवा हया हय, तीहयो सेना भेळ नी जाय अने नी काना ना काम नो भार तीनी पोर नाखवा जोवे; तीहयो साल भर छुट्लो रीन आह़फा नी लाडी ने खुस करतो रेय।
“जत्यार तमु काना ने उदार आपो, ता गीरवे घट्टी नो पोड़ नी लेजो; काहाके आसम करवा ते मानो तीना जीव ने गीरवे राखवु से।
“कदी कानो आह़फा ना काना ईस्रायली भाय ने गुलाम बणाव्वा नीता वेचवा ना वीच्यार सी चोरी करत्लो धराय जाय, ता आसवा चोट्टा ने मार नाखो; आसवी बुराय ने आपणी वच मे सी सेटी करजो।
“कोड़ नी खतरनाक बीमारी सी चेतीन रेजो, अने जे कंय लेवी पुंजारा तमने ह़ीकाड़े तीनी अनसारे काम करवा मे चोकसी करजो; जीसम हुकम मे तीमने आपलो से तेमेत करवा मे चोकसी करजो। फोम राख के तारो भगवान यहोवा, जत्यार तु मीस्र सी नीकळीन आव्वा बाज र्यो हतो, तत्यार वाट मे मरीयम ह़ाते ह़ु कर्यो।
“जत्यार तु आह़फा ना काना भाय ने कंय उदार आपे, तत्यार गीरवी नी चीज लेवा करीन तीना घोर ना मोय नी भरायजे। तु घोर नी बारो उबो रेजे, अने जे अदमी ने तु उदार आपलो से तीहयोत गीरवी नी चीज ने तारी पांह बारो लीन आवहे। पण तीहयो अदमी गरीब हय, ता तीनी गीरवे मेकली चीज लीन नी ह़ुवजे। जत्यार दाहड़ु बुडवा बाज जाय तत्यार तीनु लुगड़ु पक्को तीने पासो आप देजे, आनीन करते के तीहयो आह़फा नु लुगड़ु ओडीन ह़ुय सके अने तने बरकत आपे; अने आहयु तारा भगवान यहोवा नी नींगा मे सच्चाय नु काम ठेरहे।
“कानो दाड़क्यो जे गरीब अने कंगाल हय, चाहे तीहया तारा भायु मे सी हय चाहे तारा देस ना ह़ेरु ना मोय मे रेवा वाळा बीजा देस वाळा मे ना हय, तीमने वेला नी पाड़जे। आहयु जाणीन, के तीहयो गरीब से अने तीनु मन दाड़की करवा मे लागलु रेय, दाड़की करवा ना दाहड़े दाहड़ु बुडवा सी पेले तु तीने दाड़की आपजे; आसम नी हये के तीहयो तारी कारण यहोवा ने आड़े अने तु पापी ठेरे।
“सोरा ना पाप नी लेदे बाह ने नी मारजो, अने नी बाह ना पाप ना कारण सोरा ने मारजो; जे पाप करलो हय तीनेत पाप ना कारण मारजो।
“काना बीजा देस वाळा माणेह नीता नमल्या नो नीयाव नी बगाड़जो, अने नी कानी रंडायली बयर ना लुगड़ा गीरवी राखजो; अने आने फोम राखजे के तु मीस्र देस मे गुलाम हतो, अने तारो भगवान यहोवा तने तां गेथो छोड़ाय लावलो से; आहया कारण मे तने आहयु हुकम आपत्लो से।
“जत्यार तु आह़फा ना खेतर मे नी पाकली मेर ने वाडे, अने एक पुळो खेतर मे छुट जाय, ता तीने लेवा करीन पासो नी जजे; तीहयो बीजा देस वाळा, नमल्या, अने रंडायली नी लेदे पड़लो रेवा देजे; आनीन करते के भगवान यहोवा तारा आखा कामु मे तने बरकत आपे। जत्यार तु आह़फा ना जेतुन झाड़ ना फोळ ने हीलावीन तोड़े, तत्यार डाळ ने बीजी कावा नी हीलावजे; तीहया बीजा देस वाळा, नमल्या, अने रंडायली नी लेदे रेवा देजो। जत्यार तु अंगुर नी वाड़ी ना अंगुर तोड़े, ता बीजी कावर तीना फोळ नी तोड़जे; तीहया बीजा देस वाळा, नमल्या,अने रंडायला नी लेदे रेवा जोवे। अने आने फोम राखजे के तु मीस्र देस मे गुलाम मे हतो; आहया कारण मे तने आहयो हुकम आपु।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.