Paliya Bible
वेवस्थावीवरन 25
“कदी माणेह नी वचे कानो झगड़ो हय, ता तीहया नीयाव कराव्वा कोरट मे जाय, अने तीहया तीमनो नीयाव करे, ता वण-गुनाळ्ळा ने वण-गुनाळ्ळो अने गुनाळ्ळा ने गुनाळ्ळो ठेरावे, अने गुनाळ्ळो माणेह मार खावा नी लायक ठेरे, ता नीयाव करवा वाळो आह़फा सामने तीने जेम गुनो हय तेम गणी-गणीन ह़ड़का देवा जोवे। तीहयो तीने चाळीह ह़ड़का लग दी सकत्लो, आनी सी जादा नी देवाड़ सकत्लो; आनी सी जादा ह़ड़का देवाड़वा सी तारो भाय तारी नींगा मे बदनाम हयहे।
“मेर नीकाळवा नी टेमे बोळद्या ना मोडे कंडल्या नी बांदजे।
मरला भाय नी लेदे जपापदारी
“जत्यार बे भाय एक्ठा रेता हय, अने तीनी मे सी एक अवल्यात वगर नो मर जाय, ता तीनी रंडायली बयर ना बीजा कुळ मे वेवा नी करे; तीना लाडा नो भाय तीनीन्तां जाय्न तीनी सी वेवा कर लेय, अने तीनी बयर सी लाडा नो भाय सच्चाय नो पाळण करे। अने जे पेल्लो सोरो पयदा हये तीहयो तीहया मरला भाय ना नाम सी ठेरे, जीनी सी के तीनु नाम ईस्रायल मे सी नी मीटे। कदी तीहयी बयर ना लाडा ना भाय ने तीनी सी वेवा करवा नी गमे, ता तीहयी बयर ह़ेर ना फाटा पोर डायला माणहु नी पांह जीन केय, ‘मारा लाडा नो भाय आह़फा ना भाय ना नाम ने बणावीन राखवा सी मना कर देदलो से, अने मार सी लाडो नो भाय नो सच्चाय पाळण करवा नी हींडतो।’ तत्यार तीहया ह़ेर ना डायला माणहु तीहया अदमी ने बोलावीन ह़मजाड़्या; अने कदी तीहयो आह़फा नी वात पोर अड़ीन रेय, अने केय, ‘मने आनी सी वेवा करवा नी गमतु,’ ता तीना भाय नी लाडी तीहया डायला माणहु नी सामने तीनीन्तां जाय्न तीना पोग मे गेथा खाहड़ा नीकाळे, अने तीना मोडा पोर थुप देय; अने केय, ‘जे अदमी आपणा भाय नी अवल्यात ने अगी नी बड़ाव्वा हींडे तीनी ह़ाते आसवोत वेहवार करहे।’ तत्यार ईस्रायल मे तीहया अदमी ना घोराणा नु आहयु नाम पड़हे, मतलब ‘खाहड़ा नीकाळ्ळा अदमी नु घोराणु।’
बीजा नेम
“कदी बे अदमी आह़फा झुमाता हय, अने तीमनी मे सी एक नी लाडी आह़फा लाडा ने देवा वाळा ना हात सी बचाड़वा नी लेदे, ह़ाते आवीन बीजा अदमी ना ह़तायला अंग ने धरीन ज्योरेत डाब देय, ता तीहयी बयर ना हात वाड देजे; तु तीनी पोर दया नी करजे।
“तु आह़फा नी कोथळी मे बे भाती ना बाट नी राखजे। तु आह़फा ना घोर मे बे भाती ना माप, एक मोट्लो अने एक नान्लो, नी राखजे। तारा बाट अने माप पुरा-पुरा अने बराबर रेवा जोवे, जीनी सी तीहया देस मे तारी उमर वदु हय सके जीने तारो भगवान यहोवा तने आपे। काहाके जे माणेह नाप-तोल मे लुच्चाय करे तीहयो भगवान यहोवा नी नींगा मे गलत से।
अमालेकीयो ने खत्तम करवा नो हुकम
“फोम राख के जत्यार तु मीस्र देस सी नीकळीन आव्वा बाज र्यो हतो तत्यार अमालेक तारी ह़ाते वाट्ये ह़ु कर्यु, अमालेकी माणहु ने भगवान नी बीक नी हती; आहया कारण सी तीहयु जत्यार तु वाट्ये थाकलो-मांदलो हतो, तत्यार तारी पोर चड़ाय करीन कमजोर हयवा ना कारण आखा गेथा पछळ हता तीमने आखाम ने मार नाख्यु। एतरे जत्यार तारो भगवान यहोवा तीहया देस मे, जे तीहयो तारो हीस्सो करीन तारा हक मे कर देय, अने च्यारो-मेर ना आखा दुस्मनु सी आराम आपे, तत्यार अमालेक नु नाम धरती पोर सी मीटाड़ देजे; अने तमु आहयी वात ने नी भुलजो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.