Paliya Bible
वेवस्थावीवरन 23
यहोवा नी बठक मे भरायवा मना
“जीना आंड्या कुच देदा हय नीता लवड़ी नी फतरी वाड देदी हय तीहयो यहोवा नी सबा मे नी आव्वा जोवे।
“कानो छीनाळा सी पयदा हयलो यहोवा नी सबा मे नी आव्वा जोवे; पण दह पीड़ी लग तीना घोराणा नो कानो बी यहोवा नी सबा मे नी आव्वा जोवे।
“कोय अम्मोनी नीता मोवाबी यहोवा नी सबा मे नी आव्वा जोवे; तीमनी दहवी पीड़ी लग कानो यहोवा नी सबा मे कदी नी आव्वा जोवे; काहाके जत्यार तु मीस्र देस सी नीकळीन आवलो हतो तत्यार वाटे तारी ह़ाते रोट्ला अने पाणी लीन नी आया, तीहया तने सराप आपवा नी लेदे मेसोपोटामीया देस ना पतोर ह़ेर ना बोर ना सोरा बीलाम ने पय्हा आपीन बोलावला हता। पण तमारो भगवान यहोवा बीलाम नी ह़मळ्यो; पण तारा भगवान यहोवा तारी ह़ाते तीना सराप ने बरकत मे बदल देदो, आनीन करते के तारो भगवान यहोवा तारी सी मोंग राखतो हतो। तु जीवत्लो रेय तांह तक तीमनु वारु हये एम अने भलु हये एम कदी नी वीच्यार करजे।
“तु एदोमी ना माणहु सी ह़ीगी नी करजे, काहाके तीहयो तारो भाय से; तु मीस्र मे रेवा वाळा सी बी ह़ीगी नी करजे, काहाके तीना देस मे तु बीजा देस वाळो हय्न रेलो हतो। ईमना सोरा जे तीसरी पीड़ी मे पयदा हयहे, तीहया यहोवा नी सबा मे आय सके।
डेरा ने चोखलो राखवा
“जत्यार तु दुस्मन सी लड़ाय करवा जाय अने पड़ावो नाखे, ता आखी भाती नी बुराय सी आह़फा ने सेटो राखजे। कदी तमारी वचे कानो अदमी आसवो से जीनु पाणी पड़वा सी वीटळी ज्यो हय, ता तीहयो पड़ावा ना मोय नी आव्वा जोवे; पण तीहयो ह़ाती वेळा उंगळे, अने जत्यार दाहड़ु बुड जाय ता पड़ावा मे आवे।
“तु पड़ावा नी बारो एक बारथो बहवा नो जागो बणावजे, अने बारथो बहवा तांत जीया करजे; तु आह़फा ना हत्यार मे पावड़ु बी राखजे, जत्यार तु बारथो बहवा बारो जाय तत्यार पावड़ा सी कादो खोदीन आह़फा ना हगार ने ढाक देजे। काहाके तारो भगवान यहोवा तने बचाड़वा अने तारा दुस्मन पोर तने जीताड़वा करीन तारा पड़ावा नी वचे फीरतो रेहे, आनीन करते तारो पड़ावो चोखलो रेवा जोवे, आसम नी हये के तीहयो तारी वचे वीटळ्ळी चीज देखीन तारी ह़ाते गेथो पासो जत रेय।
बीजा नेम
“जे पावर्यो आह़फा ना मालीक नी ह़ाते गेथो नाहीन तारीन्तां आवे तीने तीना मालीक ना हात मे नी धरावजे; तीहयो तारी वचे जे ह़ेर तीने वारु लागे तीनी मे तारी ह़ाते रेवा जोवे; अने तीनी ह़ाते तु गलत वेहवार नी करजे।
“ईस्रायली सोर्या मे गेथी कानी छीनाळु करवा वाळी नी रेवा जोवे, अने ईस्रायलीम नी मे सी कानो अदमी आसम बुरु काम करवा वाळो नी रेवा जोवे। तु मान्ता ना चड़ावा नी लेदे आह़फा ना मालीक भगवान ना घोर मे छीनाळा नी कमाय नीता गलत अदमी नी कमाय नी लावजे; काहाके तारा भगवान नी ह़ाते आहया बेम नी कमाय ह़ीगी करे एवी से।
“तु आह़फा ना काना भाय ने वीयाज पोर करजो नी आपजे, चाहे तीहया रुप्या हय, चाहे खावा नी चीज हय, चाहे कानी बीजी चीज हय जे वीयाज पोर आपता हय, तीने वीयाज पोर नी आपजे। तु बीजा देस वाळा ने वीयाज पोर उदार ते आप सकत्लो, पण आह़फा ना भाय ने वीयाज पोर नी आपजे, तत्यार तारो मालीक भगवान तीहया देस मे, जीनी पोर तु हकदार्यो हयवा करीन जाय र्यो, तारा आखा काम धंदा मे बरकत आपहे।
“जत्यार तु आह़फा ना भगवान यहोवा नी लेदे मान्ता माने, ता तीने पुरी करवा मे वार नी लगाड़जे; काहाके तारो भगवान यहोवा तीने जरुड़ तारी पांह सी ली लेहे, अने वार लगाड़वा सी तु पापी ठेरही। पण कदी तु मान्ता नी माने, ता तारो कोय पाप नी हय। जे कंय तारा मोडा सी बोल नीकळे तीने पुरो करवा मे चोकसी करजे; तु आह़फा ना मोडा सी बोल आपीन आपणी मरजी सी आपणा भगवान यहोवा नी जीसम मान्ता माने, तेमेत छुट्लो रीन तीने पुरी करजे।
“जत्यार तु काना बीजा नी अंगुर नी वाड़ी मे जाय, तत्यार तारी मरजी हय तेतरु पेट भरीन खाजे, पण आह़फा नी टोपली मे कंय नी मेकजे। अने जत्यार तु काना बीजा नी उबली मेर ना खेतर मे जाय, तत्यार तु हात मे उंब्या तोड़ सकत्लो, पण काना बीजा ना उबली मेर ना खेतर मे दातळु वेर नी वाडजे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.