Paliya Bible
वेवस्थावीवरन 22
“कदी तु आपणा भाय नो बोळद्यो नीता गाडरा-बोकड़ा ने कंखर चरत्ला देखे ता तीमने नी देख्यो हय एम नी करजो, तीने पाछो तारा भाय ने तां ली आवजे। पण कदी तारो तीहयो भाय ह़ाते नी रेतो हय, नीता तु तीने नी जाणतो हय, ता तीहया जानवर ने आह़फा ना घोर ना मोय ली आवजे, अने जत्यार लग तारो तीहयो भाय तीने ह़ोद नी लेय तत्यार लग तीहयो तारी पांह रेय; अने जत्यार तीहयो ह़ोद लेय तत्यार तीने आप देजे। अने तीना गदड़ा नीता लुगड़ा ना बारा मे, तीनी कानी चीज काहा नी हय, जे तीनी पांह सी खोवाय जेली हय अने तने जड़ली हय, तीना बारा मे बी आसमेत करजे; तु मदत करवा सी मोडु नी फीरवजे।
“तु आह़फा ना भाय नो गदड़ु नीता बोळद्या ने वाट पोर पड़लो देखीन देख्योत नी हय एम नी करजे; तीने बठो करवा मे तीनी मदत करजे।
“कानी बी बयर अदमी ना लुगड़ा नी पेरे, अने कोय अदमी बयरा ना लुगड़ा नी पेरे; काहाके आसवा काम करवा वाळाम सी भगवान यहोवा ह़ीगी करे।
“कदी झाड़ नीता भोय्मे तारी अगळ वाट्ये काना चड़ा नो पोतरो जड़े, चाहे तीनी मे बच्चा हय चाहे ईंडा, अने तीहया बच्चा पोर नीता ईंडा पोर तीमनी आह्य बहली हय, ता बच्चा भेळ आह्य ने नी लेजे; बच्चा ने आपणी लेदे ली ते लेय, पण आह्य ने पक्को सोड़ देजे; आनीन करते के तारु भलु हये, अने तारी उमर ना दाड़ा ढेरेत हये।
“जत्यार तु घोर बणावे तत्यार तीनी छत जुगु मुंडवरी बी बणावजे, आसम नी हये के कानो छत पोर सी हेटो पड़े, अने तीना खुन नो गुनो तार पोर लागे।
“तु आपणी अंगुर नी वाड़ी मे बे भाती ना बीज नी लगाड़जे, आसम नी हये के तीनी आखी मेर, मतलब तारु चोपलु बीज अने अंगुर नी वाड़ी नी मेर बेम वीटळ्ळी ठेरे। बोळद्या अने गदड़ा बेम ने एक्ठा जोपीन होळ नी गेरजे। हीर अने ह़ोण सी भेसकाय्न बणला लुगड़ा नी पेरजे।
“जे चादरु तु ओडे तीना च्यारोव खुणा मे फुंदा लगाड़जे।
ह़ुदला नेम
“कदी कोय अदमी कानी बयर सी वेवा करे, अने तीनी ह़ाते जवा नी टेमे तीहयी नी गमे, अने तीहयो तीहयी बयर नी बदनामी करे, अने आहयु कीन तीनी पोर गलत काम नो गुनो लगाड़े, ‘आहयी बयर सी मे वेवा कर्यो, अने जत्यार में तीनी ह़ाते ज्यो तत्यार तीनी मे मने कुवारली ना गुण नी जड़्या,’ ता तीहयी सोरी ना आह्य-बाहा तीनी कुवारली नी सेलाणी लीन ह़ेर ना डायला माणहुन्तां झापलान बारा जाय; अने तीहयी सोरी नो बाह डायला माणहुम सी केय, मे मारी सोरी आहया अदमी ने वेवा करीन आप देदो, अने तीहयी तीने नी गमती; अने तीहयो ते आहयु कीन तीनी पोर गलत काम नो गुनो लगाड़े, के मने तारी सोरी मे कुवारली ना गुण नी जड़्या। पण मारी सोरी नी कुवारली से आनी सेलाणी से। तत्यार तीना आह्य-बाहा ह़ेर ना डायला माणहुम नी अगळ तीहया चादरु ने आथरे। तत्यार ह़ेर ना डायला तीहया अदमी ने धरीन ह़ड़का लगाड़े; अने तीने चांदी ना ह़ोव सीक्का नो डंड बी लगाड़ीन तीहयी सोरी ना बाह ने आपे, आनीन करते के तीहयो एक ईस्रायली सोरी नी बदनामी करलो से; अने तीहयी तीनी लाडी बणीन रेहे, अने तीहयो जीवते लग तीहयी बयर ने नी छोड़े। पण कदी तीहयी सोरी नी कुवारली नी सेलाणी नी जड़े, अने तीहया अदमी नी वात ह़ाचलीन नीकळे, ता तीहयी सोरी ने तीना बाह ना घोर ना झापला पोर लीन जाय, अने तीहया ह़ेर ना अदमी तीहयी बयर ने दगड़ाटीन मार नाखे; तीहयी ते आह़फा ना बाह ना घोर मे रंडी नु काम करीन बुराय करली से; आसम तु आपणी वच मे सी आसवी बुराय ने सेटी करजे।
“कदी कानो अदमी बीजा अदमी सी वेवा करली बयर नी ह़ाते ह़ुवत्लो धराय जाय, ता जे अदमी तीहयी बयर ह़ाते ह़ुयो हय तीहयो अने तीहयी बयर बेम ने मार नाखो; आहयी रीते तु आसवी बुराय ने ईस्रायल मे सी सेटी करजे।
“कदी कानी कुवारली सोरी नी वेवा नी वात हयली हय, अने कानो बीजो अदमी तीने ह़ेर मे हात करीन गलत काम करे, ता तमु तीहया बेम ने तीहया ह़ेर ना झापला ना बारा ली जाय्न तीमने दगड़ाटीन मार नाखजो; तीहयी सोरी ने ते आनीन करते के तीहयी ह़ेर मे रेती जाय्न बी आड़ी नी, अने तीहया अदमी ने आहया कारण के तीहयो आह़फा ह़ाते वाळा नी कुवारली बयर नी ह़ाते ज्यो; आहयी रीते तु आह़फाम ना वच मे सी आसवी बुराय ने सेटी करजे।
“पण कदी कानो अदमी कानी सोरी ने जीनी वेवा नी वात हयली हय चोवगान मे धरीन जबरजस्ती गलत काम करे, ता नीस्ता तीहया अदमी ने मार नाखो जे तीहयी सोरी सी गलत काम करलो हय। अने तीहयी सोरी सी कंय नी करजो; तीहयी सोरी नो पाप मोत नो डंड नी लायक नी हय, काहाके जीसम कोय आपणा ह़ाते वाळा पोर चड़ाय करीन तीने मार नाखे, तेमेत आहयी वात बी रेहे; के तीहयो अदमी तीहयी सोरी ने चोवगान मे जड़ी, अने तीहयी आड़ी ते खरी, पण तीने बचाड़वा वाळो नी जड़्यो।
“कदी काना अदमी ने कुवारली सोरी जड़े जीनी वेवा नी वात नी हयी हय, अने तीहयो तीने धरीन तीनी ह़ाते गलत काम करे, अने तीहया धराय जाय, ता जे अदमी तीनी सोरी सी गलत काम कर्यो हय तीहयो तीहयी सोरी ना बाह ने पचाह चांदी ना सीक्का आपे, अने तीहयी तीनी लाडी हये, तीहयो तीने जबरजस्ती कर्यो, आहया कारण तीहयो जीवते लग तीने नी छोड़वा जोवे। “कानो बी अदमी आपणा बाह नी लाडी ह़ाते नी जाय करीन आपणा बाह नी नामबद्दी नी करे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.