Paliya Bible
वेवस्थावीवरन 21
हत्या नो नी भागवा वाळो झगड़ो
“कदी तीहया देस ना चोवगान मे जे तारो भगवान यहोवा तने आपे काना मरला माणेह नु धोड़ पड़लु जड़े, अने तीने कोय मार नाखलु से आहयु पतो नी चाले, ता तारा डायला अने नीयाव करन्या नीकळीन तीहया धोड़ सी च्यारो-मेर ना एक-एक ह़ेर नी लम्बाय मापे; तत्यार जे ह़ेर तीहया धोड़ नी ह़ाते हय, तीमना डायला एक एवी वाछड़ी लेय, जीनी सी कंय काम नी लेदु हय, अने तीने हजु लग वळा मे जोप्या नी हय। तत्यार तीहया ह़ेर ना डायला तीहयी वाछड़ी ने बारे मयना वये तीहयी नंदी नी वारली जागा मे जीने नी जोप्या अने नी वेर्या, लीन जाय, अने तीहयी वारली जागा मे तीहयी वाछड़ी नु गळु तोड़ देजो। अने लेवी पुंजारा बी ह़ाते आवे, काहाके तारो भगवान यहोवा तीमने टाळ लेदलो से के तीमनी सेवा चाकरी करे अने तीमना नाम सी बरकत आप्या करे, अने तीमनी केवा नी अनसारे हरेक झगड़ा अने देवा-झुमायवा ना मुकदमा नो नीयाव हये। अळतेण जे ह़ेर तीहया धोड़ नी आखा गेथु ह़ाते हय, तीमना आखा डायला तीहयी वाछड़ी नी उपर जीनु गळु तोड़ला से आपणा-आपणा हात धोवीन, तीहया केय, ‘आहयु खुन आमु नी कर्या, अने नी आहयु अमारा डोळा ह़ामने हयलु काम से। एतरे, ए यहोवा, आपणा ईस्रायल ना माणहु ने जीने तु गुलामी मे सी छोड़ाय्न लावलो से माफ कर, अने आमने माफ कर दे वण-गुनाळ्ळा ना खुन ना लेदे आमने जीम्मेदार ना ठेरावे।’ जत्यार तु यहोवा नी नींगा मे वारलु काम करही तत्यार तु वण-गुनाळ्ळा नो खुन नो गुनो आह़फा ना वचे सी छेटो करजे।
लड़ाय मे धरायला बयरा ह़ाते वेवा
“जत्यार तु आपणा दुस्मनु सी लड़ाय करवा जाय, अने तारो भगवान यहोवा तीमने तारा हात मे कर देय, अने तु तीमने बंदी बणाय लेय, तत्यार तु बंदी मे कानी बयर ने देखीन तीनी पोर तारु मन आय जाय, अने तीनी सी वेवा करवा हींडे, ता तीने आपणा घोर ना मोय लीन आवजे, अने तीहयी आहयी नु मुंडु बोड़ावे, नखड़्या तोड़ावे, अने आपणा बंदी ना लुगड़ा उतारीन तारा घोर मे मयनो भर रीन आह़फी ना आह्य-बाहा नी लेदे दुखी हयती रेय; तीनी बाद तु तीनी ह़ाते जजे, अने तु तीनो लाडो अने तीहयी तारी लाडी बणे। अळतेण कदी तीहयी तने वारु नी लागे, ता जां तीहयी जवा हींडे तां तीने जवा देजे; तीने रुप्या लीन नी वेचजे, अने तीने तु तारी लाडीन तेम राखलो से, करीन पावर्याण ने तेम वेहवार नी करजे।
पेलो सोरो हयवा नो अदीकार
“कदी काना अदमी ना बे लाड्या हय, अने तीने एक गमे अने बीजी नी गमती हय, अने तीहयी बेम जणी सोरा पयदा करे, पण मोट्लो सोरो नी गमे तीनो हय, ता जत्यार तीहयो आह़फा ना बेम सोरा ने आह़फा ना धन नो वाटो पाड़ीन आप देय, तत्यार कदी नी गमती हय तीनो सोरो मोट्लो से कदी जीवत्लो हय, ता तीहयो गमे तीहया सोरा ने मोट्लो हयवा नो हक नी आपे; तीहयो आपणा पेल्ला सोरा ने आपणा धन नो बे गुना हीस्सो आपवा बाज र्यो, भले तीहयो आपणी गमती लाडी नो सोरो नी हय, एक अदमी ने आपणा पेला सोरा ने मानवा जोवे अने तीने तीहयो हीस्सो आपवा जोवे जे तीहयो नेम ना रुप सी हकदार से।
एक-हेट्यो सोरो
“कदी काना अदमी नो एक-हेट्यो अने झगड़ो करवा वाळो सोरो हय, जे आह़फा ना आह्य-बाहा नी वात नी माने, पण वेला पाड़वा पोर बी तीमनी नी ह़मळे, ता तीना आह्य-बाहा तीने धरीन आपणा ह़ेर गेथा बारा झापला नी ह़ाते ह़ेर ना डायलाम नी पांह ली जाय, अने तीहया ह़ेर ना डायलाम ने केय, ‘अमारो आहयो सोरो एक-हेट्यो अने झगड़ो करन्यो से, आहयो अमारी नी ह़मळतो; आहयो पय्हा उजाड़ करन्यो अने दारकुट्टो से।’ तत्यार तीहया ह़ेर ना आखा अदमी तीने दगड़ा दीन मार नाखे, ईसम तु आपणी वचमे सी आसवी बुराय ने छेटी करजे, तत्यार आखा ईस्रायल ना माणहु ह़मळीन बीहहे।
बीजो नेम
“बाद मे कदी कानो माणेह आसम पाप कर्यो हय, जे नीयाव नी नींगा मे मोत ना डंड नी लायक से, अने तीहया माणहे ने मोत नो डंड जड़्यो हय, तीने एक झाड़ पोर टांग देय, ता तीहयु धोड़ राते झाड़ पोर टांगलु नी रेय, तु तीहयात दाड़े तीने गाड़ देजे, काहाके जे टांगलु हय तीहयु भगवान भणी गेथु गरा वाळु ठेरहे; एतरे जे देस तारो भगवान यहोवा तारो हीस्सो करीन आपे तीहया जागा ने वीटाळजे नी।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.