Paliya Bible
वेवस्थावीवरन 20
लड़ाय पोर जवा ना नेम
“जत्यार तु आपणा दुस्मनु ह़ाते लड़ाय करवा जाय, अने घोड़ा, घोड़ा-गाडी, अने आपणी सी जादा सेना ने देखे, तत्यार नी बीहजे, तारो भगवान यहोवा जे तने मीस्र देस सी नीकाळीन लावलो से तीहयो तारी ह़ाते से। अने जत्यार तमु लड़ाय करवा दुस्मनु नी ह़ाते जावो, तत्यार पुंजारो सेना नी ह़ाते आवीन केय, ‘ए ईस्रायल ना माणहु ह़मळो, आज तमु आपणा दुस्मन सी लड़ाय करवा ह़ाते आवला से; तमारु मन कमजोर नी हये; तमु बीहो ना, अने नी कापजो अने तीमनी बीक नी राखजो; काहाके तमारो भगवान यहोवा तमारा दुस्मनु सी लड़ाय करवा अने तमने बचाड़वा नी लेदे तमारी ह़ाते-ह़ाते चाले।’
“अळतेण अदीकारी सीपायड़ा सी आहयु केय, ‘तमारी मे सी कोय से जे नवलु घोर बणावलु हय अने तीहया घोर ने चोखु नी कर्यो हय? ता तीहयो आह़फा ना घोर पाछो जत रेय, कंखर आसम नी हये के तीहयो लड़ाय मे मर जाय अने बीजो तीना घोर चोखु करे। अने कोय से जे अंगुर नी वाड़ी लगाड़्यो हय, पण तीना फोळ नी खादो हय? तीहयो बी आह़फा ना घोर पाछा जत रेय, आसम नी हये के तीहयो लड़ाय मे मर जाय अने बीजो तीना फोळ खाय। अळी कोय से जे कानी बयर सी वेवा नी वात कर्यो हय, पण तीनी सी वेवा करीन घोर नी लायो हय? तीहयो बी आह़फा घोर पाछो जत रेय, आसम नी हये के तीहयो लड़ाय मे मर जाय, अने बीजो माणेह तीनी बयर सी वेवा कर लेय।’
“अने अदीकारी सीपायड़ा सी आहयु बी केय, ‘कोय-कोय माणेह से जे हगरा अने मन मे कमजोर हय, तीहया बी आह़फाम ना घोर पाछा जत रेय, आसम नी हये के तीने देखीन तीमना भाय नी बी हीम्मत कम हय जाय।’ अने जत्यार अदीकार्या सीपायड़ा सी आहयी वात कर लेय, तत्यार तीमनी पोर अगवाय करवा नी लेदे एक मुख्या सीपायड़ा ने टाळे।
“जत्यार तु काना ह़ेर सी लड़ाय करवा करीन तीनी ह़ाते जाय, तत्यार पेले तीनी सी ह़मजोतो करवा करीन खबर आपजे। अने कदी तीहयो ह़मजोतो करवा करीन मान लेय अने तारी जुगु आह़फा ना झापला उगाड़ देय, तत्यार जेतरा तीहया ह़ेर मे हय तीहया आखा तारा हक मे हय्न तारु काम करवा वाळा अने चाकरी करवा वाळा ठेरे। पण कदी तीहया तारी सी ह़मजोतो नी करे, अने तार सी लड़ाय करवा हींडे, ता तु तीहया ह़ेर ने घेरवी लेजे; अने जत्यार तारो भगवान यहोवा तीने तारा हात मे सोप देय तत्यार तीहया ह़ेर मे ना आखा अदमी ने तलवार सी मार नाखजे। पण बयरा अने सोरा-सोरी, अने जानवरु अने जेतरी लुट तीहया ह़ेर मे हय तीने आह़फाम नी जुगु मेक लेजे; अने तारा दुस्मनु नी लुट जे तारो भगवान यहोवा तने आपे तीने काम मे लगाड़जे। तु आसमेत तीहया ह़ेरु ना माणहु सी करजे तारी सी ढेरेत नाम्बे से, अने आहया कुळ ना माणहु ना देस नी हय।
“पण जे ह़ेर आहया माणहुम ना से, जीमनो अदीकारी तारो भगवान यहोवा तने ठेराव्वा पोर से, तीमनी मे सी कोयने बी जीवत्लो नी छोड़जे, पण तीहया आखा माणहुम ने खत्तम करजे, मतलब हीत्तीयो, एमोरीयो, कनानीयो, परीज्जीयो, हीब्बीयो, अने यबुसीयो ने जीसम के तारो भगवान यहोवा तने हुकम आपलो से; तीमने मार नाखो, आसम नी हये के जेतरा गलत काम तीहया आह़फा देवता नी चाकरी मे करता आवला से तेमेत करवा तमने बी ह़ीकाड़े, अने तमु आपणा भगवान यहोवा ना वीरोद मे पाप करवा लागो।
“जत्यार लड़ाय करतो जाय्न काना ह़ेर ने जीकवा करीन तीने ढेरेत दाड़ा लग घेरवी रेय, तत्यार तीमना झाड़ु ने कुराड़ी वेर वाडीन नी खत्तम करजे, काहाके तीमना फोळ तारा खावा मे काम आवहे, एतरे तीमने नी वाडजे। ह़ु चोवगान ना झाड़ु बी माणहु से के तु तीमने बी घेरवीन राखे? पण जे झाड़ु ना बारा मे तु जाण ले के आना फोळ खावा लायक नी हय, ता तीमने वाडीन खत्तम कर देजे, अने तीहया ह़ेर ना वीरोद मे तीहयी टेम लग घेरवीन राखजे जत्यार लग तीहयो तारा हक मे नी आय जाय।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.