Paliya Bible
2 थीसलुनीकीयो 1
मे पोलुस सीलवानुस अने तीमुथीयुस ह़ाते आहयी चीट्ठी लीखु, आपणा बाह भगवान अने मालीक ईसु मसी ना माणहु ने जे थीसलुनीकीयो नी मंडळी मे से।
आपणा बाह भगवान अने मालीक ईसु मसी भणी गेथी तमने दया अने सांती जड़ती रेय।
नीयाव नो दाड़ो
ए भायु, अने बेन्या तमारा बारा मे आमने आखी टेमे भगवान ने घणो वारु से केवा जोवे, अने आहयु वारु से। आनीन करते के तमारो भरहो घण-जबर अगो वदतो जाय, अने तमारो आखा नो मोंग आखा तमारी ह़ाते घण-जबर वदतो जाय। आञे तक के आमु भगवान नी मंडळी मे तमारा बारा मे मोटाय बी करया के जेतरा दुख अने वेला तमु धीरा रीन झेले, तीमनी आखा मे गम खावा नी सक्ती अने भरहो उजन्तो हये।
आहयी भगवान ना खरला नीयाव नी वारु गवा से के तमु भगवान ना राज मे जाय एवा ठेरो, जीनी जुगु तमु दुख बी झेलो। भगवान ने तां आहयो नीयाव से जे तमने दुख आपे तीमने बदला मे दुख आपो। अने तमु दुख झेलवा वाळा ने अमारी ह़ाते अराम आपो; जत्यार मालीक ईसु जोरभर्या ह़रगदुत ह़ाते होळो-होळो आक्ठु मे गेथो उजन्तो आवहे। अने जे भगवान ने नी ओळखता अने आपणा ईसु मसी नी खुस-खबर ने नी मान्ता तीमनी ह़ाते बदलो लेहे। तीहया मालीक नी अगळ गेथा अने तीनी सक्ती नु वीजाळु सी सेटा हय जहे अने जलम खुट जवा नो डंड झेलहे। अने आहयु तीहया दाड़े हयहे, जत्यार तीहयो आह़फा ना चोखला माणहु मे बड़ाय देखवा अने आखा भरहो करवा वाळा माणहु मे वहरायवा नु कारण हयवा मे आवहे, काहाके तमु अमारी गवाय पोर भरहो करला से।
आनीन करते आमु तमारी जुगु दाड़ीन वीन्ती बी करया के अमारो भगवान तमने बोलायो तीनी लायक ह़मजे, अने भलाय नी आखी मरजी अने भरहा ना आखा काम ने ताखत भेळ पुरा करे। काहाके आपणा भगवान अने मालीक ईसु मसी नी दया नी अनसारे आपणा मालीक ईसु नु नाम तमारी मे बड़ाय देखे, अने तमु तीनी मे देखे।
Source notes (1)
- Cross-reference नेवताळा ना काम 17:1
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.