Paliya Bible
2 थीसलुनीकीयो 2
पाप नो अदमी मतलब खत्तम हयवा वाळु नो सोरो
ए भायु, अने बेन्या, हाव आमु आपणा ईसु मसी ने आव्वा ना, अने तीनीन्तां एकठा हयवा ना बारा मे तमारी पांह वीन्ती करया। अने कानी भगवान नी खबर, नीता बोलु, नीता चीट्ठी नी लारे मान लेवो जे अमारीन्तां गेथी हय अने आहयु ह़मजाड़े के मालीक ना दाड़ा आय ज्या ता तमारा मन मे उचकाहलात कमजोर नी हयजो अने नी दुखी हय जो। कानी बी रीते कोयना धोका मे नी आवजे, काहाके जत्यार तक भगवान ना वीरोद मे आखरी वीरोद नी हये तां तक, अने तीहया वेरी माणहे ने नरक मे नाखीन खत्तम नी कर देय, तीहयो उजन्तो नी हये। तीहयो वेरी भगवान नो भक्ती नी चीज नो वीरोद करे, अने आखा माणहु ने चोखलो नीता भगवान केवाड़े, नीता आह़फा ने मोटो बणावे, आञे तक के तीहयो भगवान ना मंदीर मे बहीन आह़फा ने भगवान बणावे।
ह़ु तमने मालम नी हय, जत्यार मे तमारी ह़ाते हतो, ता तमने आहयी वात कीया करतो हतो। तमु तीहयी वात ने जाणो। के जे वेरी ने हजु लग आव्वा सी उजन्तो हयवा सी रोक री। काहाके वेरी नी ह़तायली सक्ती हमणे बी काम करती जाय री, पण हजु एक रोकवा वाळो से, अने जत्यार तक तीहयो सेटो नी हय जाय तीहयो रोकी राखहे। ता तीहयो वेरी उजन्तो हयहे, पण जत्यार ईसु मसी आवहे ता आह़फा ना मोडा नी फुक सी मार नाखहे, अने तीना आव्वा ना तेज सी रोखड़ो बणाय देहे। 2तीहया वेरी नु आवणु भुतड़ा ना काम नी अनसारे आखी भाती नी झुटी ताखत, अने सेलाणी अने घणा जुदा-काम नी ह़ाते; आवहे। अने खत्तम हयवा वाळा जुगु तीहयो तीमने फसाड़वा करीन वण-धरम ना कामु करहे; काहाके तीहया सच्चाय ह़ाते मोंग नी कर्या जीनी सी तीमनो छुटकारो हयवा वाळो हतो। आनीन करते भगवान तीमनीन्तां भटकाड़वा वाळी सक्ती ने मोकल्हे अने तीहया झुट नी मानहे। काहाके जेतरा माणहु सच्चाय ने नी माने अने अधरम सी खुस हये, तीमने आखा ने डंड जड़हे।
वातड़ा रेवो
ए भायु, अने बेन्या अने मालीक ना मोंगाळ्ळा माणहु, आमु तमारा बारा मे जलम भगवान ने घणो वारु से केता रीया, काहाके भगवान सुरु गेथो तमने टाळ लेदलो से; के आत्मा नी लारे चोखला बणीन, अने सच्चाय ने मानीन छुटकारो हात करो, जीनी जुगु तीहयो तमने अमारा खुस-खबर नी लारे बोलावलो से, के तमु मालीक ईसु मसी ना बड़ाय मे साजल्या बणो। आनीन करते ए भायु, अने बेन्या वातड़ा रेवो, अने जे-जे वात अने बोलु नीता अमारी चीट्ठी नी लारे ह़ीकला से, तीने मान्ता रेवो।
आपणो मालीक ईसु मसी आह़फोत, अने आपणो बाह भगवान, जे आपणी ह़ाते मोंग कर्यो अने दया सी जलम नो बड़ावो अने आखा गेथी वारु आह आपलो से। तमारा मन मे बड़ावो आपे अने तमने आखा वारला काम अने भगवान ना बोलु मे वातड़ो करे।
Source notes (2)
- Cross-reference 1 थीसलुनीकीयो 4:15-17
- Cross-reference मत्ती 24:24
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.