Paliya Bible
1 थीसलुनीकीयो 5
ईसु पासो आवहे एतरे तीयार रेवो
हाव ए भायु, अने बेन्या आहयी वात नी जरवत नी हय के टेम अने दाड़ा ना बारा मे तमारी जुगु अळी लीखु। 1काहाके तमु आह़फा बी वारु जाणो के जेम राते चोट्टु आवे, तेमेत मालीक नो दाड़ो आव्वा वाळो से। जत्यार माणहु केहे, “वारला से, अने कंय बी बीक नी हय” ता तीमनी पोर एक वाहराय गरा आय पड़हे, जेम भारेपोगे बयर पोर आय पड़े, अने तीहया कानी बी रीते नी बचे। पण ए भायु, अने बेन्या तमु ते अंदारला मे नी हय के तीहया दाड़ा तमारी पोर चोट्टान तेम आय पड़े। काहाके तमु आखा वीजाळु नी अने दाड़ा नी अवल्यात से, आपणु नी ते रात हय अने नी ते अंदारलु ना हय। आनीन करते आपणु आखा बीजा नी तेम ह़ुवता ना रेवो, पण जागता अने चेतीन रेवो। काहाके जे ह़ुवे तीहया आखा रातेत ह़ुवे, अने जे छाके तीहया रातेत छाके। 2पण जे आपणु दाड़ा ना से, भरहा अने मोंग नी ढाळ पेरीन अने छुटकारा नी आह नी टोपी पेरीन चेतीन रेवो। काहाके भगवान आपणु ने रीह जुगु नी, पण आनी लेदे बणावलो से के आपणु आपणा मालीक ईसु मसी नी लारे छुटकारो हात करया। ईसु आपणी जुगु आहया कारण सी मर्यो के आपणु जत्यार बी मरया अने जीवया, ता आखा मेळीन तीनीत ह़ाते रीया। एम करीन एक-बीजा ने सांती आपो, अने एक-बीजा नी लेदे फायदा नो कारण बणो, जेम तमु करी बी र्या।
मंडळी ने ह़ीकापण
ए भायु, अने बेन्या आमु तमारी पांह रावण्या करया के मालीक मे जे तमारा अगवाय करन्या से, अने तमने ह़ीकापण आपे, तीमनी ईज्जत करो। अने तीमना काम नी लेदे मोंग भेळ तीमने घण-जबर ईज्जत करो। अने तमु आखा हेळी-मेळीन रेवो।
ए भायु, अने बेन्या तमने ह़मजाड़या के जे वारु चाल नी चाले तीमने ह़मजाड़ो, ओगज्या ने चेतावो, कमजोर ने ह़माळो, अने आखा ह़ाते टेकीन रेवा नी ताखत देखाड़ो, अने चेतीन रेवो! कोय बी कोय ह़ाते बुराय ना बदले बुराय ना करो; पण जलम भलाय करवा तीयार रेवो, आपणु आखा अने बीजा ह़ाते बी भलाय नी वात करो।
जलम खुसी मे रेवो। आखी टेमे वीन्ती करता रेवो। आखी वात मे घणा वारु से केता रेवो; काहाके तमारी जुगु ईसु मसी मे भगवान नी आहयीत मरजी से।
आत्मा ने ना ओलवो। भगवान वगे गेथी केदली वात ने गलत ना ह़मजो। आखी वात ने पारखो; जे वारु से तीने ह़मळता रेवो। आखी भाती नी कुहराय सी बचीन रेवो।
आखरी बरकत
सांती नो भगवान आह़फोत पुरी रीती सी तमने चोखो करे; अने तमारी आत्मा ने जीव अने डील आपणा मालीक ईसु मसी ने आवते तक पुरा-पुरा वण-गुनाळ्ळा अने बचीन रेवो। तमारो बोलाव्वा वाळो भरहो करे एवो से, अने तीहयो एमेत करहे।
ए भायु, अने बेन्या, अमारी जुगु वीन्ती करो।
आखा भाय-बेन्या, ने आवही अने आवजो केवो।
मे तमने मालीक ना हक सी केम, के आहयी चीट्ठी आखा भरहो करन्या भाय-बेन्या ने ह़मळावजो।
आपणा मालीक ईसु मसी नी दया तमारी ह़ाते रेय।
Source notes (2)
- Cross-reference मत्ती 24:43; लुका 12:39; 2 पतरस 3:10
- Cross-reference ईफीसीयो 6:13-17
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.