Paliya Bible
1 युहन्ना 4:7
Verse 7 is marked below, with the whole chapter around it. Read from the start
भगवान नी आत्मा अने वीटळ्ळी आत्मा
ए मोंगाळ्ळा भायु, आखी आत्मा पोर भरहो ना करो: पण आखी आत्मा ने पारखो, के तीहयी भगवान ने तां गेथी से के नी हय; काहाके ढेरेत झुटा भगवान वगे गेथी वात केण्या माणहु कळी मे नीकळ पड़ला से। भगवान नी आत्मा तमु आहयी रीते ओळख सकत्ला, के जे कोय आत्मा मान लेय, के ईसु मसी डील मे हय्न आवलो से तीहयी भगवान ने तां गेथी से। अने जे कोय आत्मा ईसु ने नी माने, तीहयी भगवान ने तां गेथी नी हय; अने तीहयीत ते मसी ना वीरोद नी आत्मा से; जीना बारा मे तमु ह़मळी र्या, के तीहयो आव्वा वाळो से: अने हमणे बी आहयी कळी मे से।
ए सोरा, तमु भगवान ना से: अने तमु तीनी पोर जीक जेला से; काहाके जे तमारी मे से तीहयु तीनी सी जे कळी मे से, मोटो से। तीहया आहयी कळी ना से, करीन तीहया आहयी कळी नी वात बोले, अने कळी ना माणहु तीमनी ह़मळे। आमु भगवान ना से: जे भगवान ने जाणे, तीहया आपणी ह़मळे; अने जे भगवान ने नी जाणे तीहया आपणी नी ह़मळे; आहयीत रीते आपणु सच्चाय नी आत्मा ने अने भटकाड़वा वाळी आत्मा ने ओळख लीया।
भगवान मोंग से
ए मोंगाळ्ळा, आपणु एक-बीजा ह़ाते मोंग राखो; काहाके मोंग भगवान भणी गेथो से: अने जे कोय मोंग करे, तीहयो भगवान सी पयदा हयलो से; अने भगवान ने जाणे। जे मोंग नी करे, तीहयो भगवान ने नी जाणतो, काहाके भगवान मोंग से। जे मोंग भगवान आपणी ह़ाते कर र्यो, तीहयु आनी सी उजन्तु हयु, के भगवान आह़फा ना एक-खोळ्या सोरा ने आहयी कळी मे मोकल्लो से, के आमु तीनी लारे जीवाय हात करया। मोंग आनी सी नी के आमु भगवान ह़ाते मोंग कर्या, बाखीन आनी मे से के भगवान अमारी सी मोंग कर्यो, अने अमारा पापु ना पछतावा ना जुगु आह़फा ना सोरा ने मोकल्यो।
ए मोंगाळ्ळा, जत्यार भगवान आपणी सी एवो मोंग कर्यो, ता आपणु ने बी एक-बीजा ने मोंग करवा जोवे। 1भगवान ने कारु बी कोय नी देख्यु; कदीम आपणु एक-बीजा ह़ाते मोंग करया, ता भगवान आपणी मे बणीन रेय; अने तीनो मोंग आपणी मे पुरो हय जेलो से।
आनी सी आपणु जाणया, के आपणु तीनी मे बणीन रीया, अने तीहयो आपणी मे, काहाके तीहयो तीनी आत्मा आपणु ने आप देदलो से। अने आपणु देख बी लेदा अने गवाय दीया, के बाह बेटा ने आहयी कळी नो छुटकारो आपवा वाळो बणावीन मोकल्लो से। जे कोय आहयु मान लेय, के ईसु भगवान नो सोरो से: भगवान तीनी मे बणीन रेय, अने तीहयो भगवान मे बणीन रेय।
अने जे मोंग भगवान आपणी सी करे, तीने आपणु जाण ज्या, अने आमने तीनो भरहो से; भगवान मोंग से: जे मोंग मे बणीन रेय, तीहयो भगवान मे बणीन रेय; अने भगवान तीनी मे बणीन रेय। आनी सी मोंग आपणी मे पुरु हयु, के आमु नीयाव ना दाड़े हीम्मत राख सकया; काहाके जेम मसी से तेमेत आमु बी आहयी कळी मे से। मोंग मे बीक नी रेय, पण पुरो मोंग बीक ने सेटो कर देय, काहाके बीक सी डंड नी सण्का रेय, अने जे बीहे, तीहयो मोंग मे पक्को नी हयो।
आमु आनीन करते मोंग करया, के पेले तीहयो आपणी ह़ाते मोंग कर्यो। कदीम कोय केय, के मे भगवान सी मोंग करु; अने आह़फा ना भाय सी वेर राखे; ता तीहयो झुटो से: काहाके जे आह़फा ना भाय सी जीने तीहयो देखलो से, मोंग नी करे, ता तीहयो भगवान सी बी जीने तीहयो नी देख्यो, मोंग नी कर सकतो। करीन आपणु ने मसी सी आहयो हुकम जड़लो से, के जे कोय भगवान सी मोंग करे, तीहयो आह़फा ना भाय सी बी मोंग करे।
Source notes (1)
- Cross-reference युहन्ना 1:18
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.