Paliya Bible
1 युहन्ना 3
देखो बाह आपणी ह़ाते केवो मोंग करलो से, के आपणु भगवान नी अवल्यात केवाड़या, अने आपणु से बी: एम करीन आहयी कळी ना माणहु आपणु ने नी ओळखता, काहाके तीहया भगवान ने बी नी ओळख्या। ए मोंगाळ्ळा, हाव आपणु भगवान नी अवल्यात से, अने हजु तक आहयु उजन्तु नी हयु, के आमु केवा रेहु! पण आतरुत मालम से, के जत्यार तीहयो उजन्तो हयहे ता आपणु बी तीनी ह़रका रेहु, काहाके तीने तेवोत देखहु जेवो तीहयो से। अने जे कोय बी तीनी पोर आहयी आह राखे, तीहयो आह़फा ने तेमेत चोखलो बणावे, जेम मसी चोखलो से।
जे कोय पाप करे, तीहयो कायदा नो वीरोद करे; अने पाप ते कायदा नो वीरोद से। 2अने तमने ते मालम से, मसी ईसु नु उजन्तु हयवा आनीन करते हयु के तीहयो पाप ने खत्तम कर देय अने तीनी मे जरीक बी पाप नी हय। जे बी तीनी मे बणीन रेय, तीहयो पाप नी करे: जे कोय पाप करे, तीहयो नी ते तीने देख्यो, अने नी ते तीने ओळख्यो।
ए सोरा, कोय बी तमने भटकाड़वा नी जोवे, जे धरमी काम करे, तीहयोत मसीन तेम धरमी से। जे कोय पाप करे तीहयो भुतड़ा भणी गेथो से, काहाके भुतड़ो सुरु गेथोत पाप करतो आय र्यो: भगवान नो सोरो आनीन करते उजन्तो हयो, के भुतड़ा ना कामु ने खत्तम कर देय।
जे कोय भगवान सी पयदा हयलो से तीहयो पाप नी करे; काहाके भगवान नो बीज तीनी मे बणलो रेय: अने तीहयो कदी पाप करी नी सके, काहाके भगवान सी पयदा हयलो से। आनीत सी भगवान नी अवल्यात, अने भुतड़ा नी अवल्यात ओळखाय जाय; जे कोय धरम नु काम नी करे, तीहयो भगवान सी नी हय, अने नी ते तीहयो जे आह़फा ना भाय ह़ाते मोंग नी राखे।
एक-बीजा ने मोंग करो
काहाके जे खबर तमु सुरु गेथा ह़मळला से, तीहयी आहयी से, के आमु एक-बीजा ह़ाते मोंग करया। अने केन ने तेवा ना बणो जे तीहया वेरी मे गेथो हतो, अने जे आह़फा ना भाय ने मार नाखलो। अने तीहयो तीने ह़ुका मार नाखलो? आनीन करते के तीना काम गलत हता, अने तीना भाय ना काम वारु हता।
ए भाय-बेन्या कदीम आखी कळी ना माणहु तमारी ह़ाते वेर राखे ता वहरायजो नी। 4आमु जाणया, के आमु मोत सी पार हय्न जीवाय मे पुग जेला से; काहाके आमु भाय-बेन्या ह़ाते मोंग करया: जे मोंग नी करे, तीहयो मोत नी हालत मे रेय। जे कोय आह़फा ना भाय-बेन्या ह़ाते वेर राखे, तीहयो हत्यारो से; अने तमु जाणे ते खरा, के काना बी हत्यारा मे अमर जीवाय नी रेय। आपणु मोंग आनीत सी जाण्या के तीहयो आपणी जुगु आह़फा नो जीव आप देदो; अने आपणु ने बी भाय-बेन्या जुगु जीव आपवा जोवे। पण जे कोय पांह बी कळी नु धन हय अने तीहयो आह़फा ना भाय ने गरीब देखीन तीनी पोर दया नी करवा हींडे, ता तीनी मे भगवान नो मोंग कीसम बणीन रेहे? ए सोरा, भगवान नो बोल अने जीप सी नी, पण काम अने सच्चाय नी लारे बी मोंग करे।
मोंग नी अगळ हीम्मत
आनीत सी आपणु जाणहु, के आमु सच्चाय ना से; अने जत्यार बी आपणु मन आपणु ने गुनो लगाड़हे, तीना बारा मे आपणु तीनी अगळ आपणा-आपणा मन ने हीम्मत आप सकहु। कदीम आपणु मन आपणो वाक काडे, ता आमु जाणया के भगवान आपणा मन गेथो मोटो से; अने आखु कंय जाणे। ए मोंगाळ्ळा, कदीम आपणु मन आपणु ने गुनो नी लगाड़े, ता आपणु ने भगवान नी अगळ हीम्मत जड़े। अने जे कंय आमु मांगया, तीहयु आमने तीनी पांह गेथु जड़े; काहाके आपणु तीना हुकम ने मानया; अने जे तीने गमे तीहयु करया। 5अने तीना हुकम आहया से के आमु तीना सोरा ईसु मसी ना नाम पोर भरहो करया अने जेम तीहयो आपणु ने हुकम आपलो से तीनात अनसारे आखा ह़ाते मोंग राखे। अने जे भगवान ना हुकम ने माने, तीहयो भगवान मे, अने भगवान तीनी मे बणीन रेय: अने आनी सी, मतलब तीहयी आत्मा सी जे तीहयो आपणु ने आपलो से, आपणु जाणया, के तीहयो आपणी मे बणीन रेय।
Source notes (5)
- Cross-reference युहन्ना 1:12
- Cross-reference युहन्ना 1:29
- Cross-reference युहन्ना 13:34
- Cross-reference युहन्ना 5:24
- Cross-reference युहन्ना 13:34; 15:12,17
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.