Paliya Bible
1 युहन्ना 2
मसी आपणो मदत करवा वाळो
ए मारा सोरा, मे आहयी वात तमारी जुगु आनीन करते लीखु के तमु पाप नी करो; अने कदीम कोय पाप करे, ता बाह ने तां एक आपणो मदत करवा वाळो से, जे नीयाव करन्यो से तीहयो ईसु मसी से; तीहयोत आपणा पापु ने माफ करे, अने आपणा पाप ने एतरोत नी पण आखी कळी ना पापु ने माफ करे।
कदीम आपणु तीना हुकम ने मानहु, ता आनी सी आपणु जाण लेहु के आपणु तीने जाण ज्या। जे कोय आहयु केय, “मे तीने जाण लेदो” अने तीना हुकम ने नी मान्तो, तीहयो झुटो से तीनी मे सच्चाय नी हय; पण जे कोय तीना बोलु पोर चाले, तीनी मे ह़ाचलीन भगवान नो मोंग उजन्तो हयलो से। आनी सी आमु जाणया के आमु तीनी मे एक से: जे कोय आहयु केय के मे भगवान मे बणीन रेम, ता तीने बी तेमेत चालवा जोवे जेम ईसु मसी चाले।
नवलो हुकम
ए मोंगाळ्ळा, मे तमने नवलो हुकम नी लीखतो, पण जे तीहयात जुन्ला हुकम जे तमने सुरु गेथा जड़ला से; आहयो जुन्लो हुकम तीहयो बोल से जीने तु ह़मळलो से। ते बी मे तमने नवलो हुकम लीखु, अने आहयो मसी मे अने तमारी मे खरली ठेरे; काहाके अंदारलु मीटतु जाय र्यु अने सच्चाय नु वीजाळु हाव भबळवा बाज जेलु से।
जे कोय आहयु केय के मे वीजाळु मे से अने आह़फा ना भाय ह़ाते वेर राखे, ता तीहयो हजु तक अंदारलात मे से। जे कोय आह़फा ना भाय ह़ाते मोंग राखे तीहयो वीजाळा मे रेय, अने कोयनो ठोकर नो कारण नी बण सके। पण जे बी आह़फा ना भाय ह़ाते वेर राखे तीहयो अंदारला मे से अने अंदारलात मे चाले, अने नी जाणे के कां जवा बाज र्यो, काहाके अंदारलु तीना डोळा आंदळा कर देदलु से।
ए सोरा, मे तमारी जुगु आनीन करते लीखु के मसी ना नाम सी तमारा पाप माफ हयला से। ए बाहु, मे तमारी जुगु आनीन करते लीखु के जे सुरु गेथो से तीने तमु जाणो। ए जुवान्या, मे तमारी जुगु आनीन करते लीखु के तमु तीहया वेरी सी जीक जेला से। ए सोरा, मे तमारी जुगु आनीन करते लीखु के तमु बाह ने ओळखी लेदला से।
ए बाहु, मे तमारी जुगु आनीन करते लीखलो से के जे सुरु गेथो से तमु तीने ओळखी लेदला से। ए जुवान्या, मे तमारी जुगु आनीन करते लीखलो से के तमु ताखत वाळा से, अने भगवान नो बोल तमारी मे बण्लो रेत्लो, अने तमु तीहया वेरी सी जीक जेला से।
तमु नी ते कळी सी अने नी ते कळी नी चीज सी मोंग राखो। कदीम कोय कळी सी मोंग राखे, ता तीनी मे बाह नो मोंग नी हय। काहाके जे कंय कळी मे से, मतलब डील नी लालच अने डोळा नी लालच अने जीवाय नी मोटाय, तीहया बाह ने तां गेथी नी पण कळी भणी गेथी से। कळी अने तीनी हेर बेम खत्तम हयता जाय, पण जे भगवान नी मरजी पोर चाले तीहयो जलमको बणलो रेहे।
मसी ना वीरोदी
ए सोरा, आहयी आखरी टेम से; अने जेम तमु ह़मळला से के मसी नो वीरोदी आव्वा वाळो से, तीनी अनसारे हाव बी घण-जबर मसी वीरोदी बठा हय ज्या; आनी सी आमु जाणया के आहयी आखरी टेम से। तीहया नीकळ्या ते अमारी मे गेथा, पण अमारी मेना नी हता; काहाके कदीम तीहया अमारी मेना हता, ता अमारी ह़ाते रेता; पण नीकळी आनीन करते ज्या के आहयु उजन्तु हये के तीहया आखा अमारी मेना नी हय।
पण तमु ते चोखली आत्मा मे से, चोखला मसी मे से, जीने तमु जाणो। मे तमने आनीन करते नी लीख्यो के तमु सच्चाय ने नी जाणता, पण आनीन करते के तमु जाणो, अने आनीन करते के कानु झुट, सच्चाय भणी गेथु नी हय।
झुटु कोय से? तीहयोत जे केय के ईसु मसी नी हय; अने जे मसी नो वीरोदी से, जे कोय बाह अने सोरा नो नीकारो करे। जे कोय सोरा नो नीकारो करे तीनी पांह बाह बी नी हय: अने जे सोरा ने मान लेय, तीनी पांह बाह बी से।
जे खबर तमु सुरु गेथा ह़मळला से, तीहयुत तमारी मे बणलु रेय, जे तमु सुरु गेथा ह़मळला से, कदीम तीहयी तमारी मे बणलु रेय ता तमु बी सोरा मे अने बाह मे बणला रेहु। अने जीनी तीहयो अमारी पांह वायदो करलो से तीहयी अमर जीवाय से।
मे आहयी वात तमारी जुगु तीमना बारा मे लीखलो से, जे तमने भटकाड़े। तमने जे चोखली आत्मा मसी भणी गेथी जड़ली से, तीहयी तमारी बणीन रेय, करीन तमने अळी बीजा मास्तर नी जरवत नी हय। तीहयी तमने आखु कंय ह़ीकाड़े। तीनी ह़ीकापण खरली से, तमु तीहयी ह़ीकापण नी लारे मसी मे बणला रेवो।
हाव ए सोरा, तीमनी मे एक बणीन रेवो के जत्यार तीहयो उजन्तो हये ता अमारी पांह हीम्मत रेय अने आमु तीना आव्वा सी तीनी अगळ लाजे नी पड़या। कदीम तमु जाणे, के तीहयो धरमी से, ता आहयु बी जाणो के जे कोय धरम नु काम करे तीहयो भगवान मे गेथो पयदा हयलो से।
Source notes (1)
- Cross-reference युहन्ना 13:34
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.