Paliya Bible
1 युहन्ना 5
कळी पोर जीक
जीनो आहयो भरहो से के ईसुत मसी से, तीहयो भगवान सी पयदा हयलो से; अने जे कोय पयदा करवा वाळा सी मोंग राखे, तीहयो तीनी ह़ाते बी मोंग राखे जे तीनी सी पयदा हयलो से। जत्यार आमु भगवान सी मोंग करया, अने तीना हुकम ने मानया, ता आनी सी आमु जाणया, के भगवान नी अवल्यात सी मोंग करया। 1अने भगवान नो मोंग आहयो से, के आमु तीना हुकम ने मानया; अने तीना हुकम काठा नी हय। काहाके जे कंय भगवान सी पयदा हयलु से, तीहयो कळी ने जीक लेय; अने तीहयी जीक जीनी सी कळी ने जीक लेय तीहयो अमारो भरहो से। कळी ने जीकवा वाळो कोय से? तीहयोत के जीनो आहयो भरहो से के ईसु, भगवान नो सोरो से।
ईसु मसी ना बारा मे गवाय
आहयोत से तीहयो, जे पाणी अने लोय नी लारे आवलो; मतलब ईसु मसी: तीहयो पाणी नी लारे नी, पण पाणी अने लोय बेम नी लारे आवलो से; अने आहयी आत्मा से, जे गवाय देय काहाके आत्मा खरली से। अने जे गवाय देय, तीहयी आत्मा से; काहाके आत्मा खरली से। अने गवाय देवा वाळा तीन से; आत्मा, पाणी, अने लोय; अने तीनोव एक वात पोर राजी से। जत्यार आमु माणहु नी गवाय मान लीया, ता भगवान नी गवाय तीनी गेथी बड़ीन से; अने भगवान नी गवाय आहयी से, के तीहयो आह़फा ना सोरा ना बारा मे गवाय देदलो से। जे भगवान ना सोरा पोर भरहो करे, तीहयो आह़फा ना मन मे गवाय राखे; जे भगवान पोर भरहो नी करे, तीहयो तीने झुटो ठेरावलो से; काहाके तीहयो ते गवाय पोर भरहो नी कर्यो, जे गवाय भगवान आह़फा ना सोरा ना बारा मे देदलो से। 2अने तीहयी गवाय आहयी से, के भगवान आपणु ने अमर जीवाय आपलो से: अने आहयी जीवाय तीना सोरा ईसु मसी मे से। जीनी पांह ईसु से, तीनी पांह जीवाय से; अने जीनी पांह भगवान नो सोरो ईसु मसी नी हय तीनी पांह जीवाय बी नी हय।
अमर जीवाय
मे तमारी जुगु, जे भगवान ना सोरा ना नाम पोर भरहो कर र्या, आनीन करते लीख र्यो; के तमु जाण जावो, के अमर जीवाय तमारी से। भगवान ना बारा मे अमारो भरहो आहयो से: जत्यार आमु तीनी मरजी नी अनसारे कंय मांगया, ता तीहयो तीने ह़मळे। अने जत्यार आमु जाणया, के जे कंय आमु मांगया तीहयो अमारी ह़मळी लेय, ता आमु आहयु बी जाणया के जे कंय आमु तीनी सी मांग्या तीहयु आमने जड़ ज्यु।
कदीम कोय आह़फा ना भाय अने बेनेह ने आसम पाप करते देखे, जीनो फोळ मोत नी हय, ता वीन्ती करो, अने भगवान तीने तीनी जुगु जे एवो पाप करला से जीनो फोळ मोत नी हय, जीवाय आपहे: पाप एवो बी रेय जीनो फोळ मोत से। तीना बारा मे मे वीन्ती करवा नी केतो आखी भाती नो अधरम ते पाप से, पण एवो पाप बी से, जीनो फोळ मोत नी हय।
आमने मालम से, के जे भगवान सी पयदा हयला से, तीहया पाप नी करे; जे भगवान सी पयदा हयला से, तीने तीहयो बचाड़ीन राखे: अने तीहयो वेरी तीने छीमी नी सके।
आमने मालम से, के आमु भगवान भणी गेथा से, अने आखी कळ तीहया वेरी ना हक मे पड़ र्यी।
अने आहयु बी जाणया, के भगवान नो सोरो आय लागलो से अने तीहयो आमने ह़मज आपलो से, के आमु तीहया खरला भगवान ने ओळख्या, अने आमु तीनी मे से जे खरलो भगवान से, मतलब भगवान ना सोरा ईसु मसी मे रीया: खरलो भगवान अने अमर जीवाय आहयोत से।
ए सोरा, आह़फाम ने मुरत्या सी बचाड़ीन राखो।
Source notes (2)
- Cross-reference युहन्ना 14:15
- Cross-reference युहन्ना 3:36
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.