Paliya Bible
2 युहन्ना 1
मे पेल्ना वारा नी टाळली बयर अने तीनी अवल्यात ने, तीना सोरा ना नामे जीनी सी मे खरलो मोंग करु पण मे एतरोत नी पण तीहया आखा बी मोंग करे जे सच्चाय ने जाणे। तीहयी सच्चाय जे अमारी मे टेकली रेय, अने जलम अमारी ह़ाते रेहे।
बाह भगवान, अने तीना सोरा ईसु मसी भणी गेथी संयबरकत, दया, सांती, अने सच्चाय, मोंग भेळ आपणी ह़ाते रेहे।
सच्चाय अने मोंग
मे घणो खुस हयो, के मे तारा केतरा सोरा-सोरी ने तीहया हुकम ना अनसारे, जे आपणु ने बाह भणी गेथी जड़ली हती सच्चाय पोर चालत्ला देख्यो। 1ए बयर, मे तने काना नवला हुकम नी, पण तीहयात जे सुरु गेथा अमारी पांह से, लीखु; अने तारी सी वीन्ती करु के आपणु एक-बीजा सी मोंग करया। अने मोंग आहयो से के आमु भगवान ना हुकम ना अनसारे चाले: आहया तीहयात हुकम से, जे तमु सुरु मे ह़मळला से अने तमने आहया हुकम नी अनसारे चालवा बी जोवे।
काहाके घणा भटकाड़वा वाळा आहयी कळी मे आय लागला से, जे आहयु नी मान्ता, के ईसु मसी डील मे हय्न आयो: भटकाड़वा वाळा अने मसी नो वीरोदी आहयोत से। आह़फा ना बारा मे चेतीन रेवो; के जे मेहनत आमु करला से, तीने तमु ना बगाड़ो: पण तीनो पुरो फोळ हात करो।
जे कोय मसी नी ह़ीकापण मे नी रेय, अने ईसु मसी नी ह़ीकापण पोर बणीन नी रेय, तीनी पांह भगवान नी हय: जे कोय तीनी ह़ीकापण पोर टेकलो रेय, तीनी पांह बाह बी से, अने बेटो बी से। कदीम कोय तमारी पांह आवे, आहयीत ह़ीकापण नी आपे, तीने नी ते घोर मे आव्वा देवो, अने ना वारलो से के करीन केवो। काहाके जे कोय एवा माणेह ने वारलो से के करीन केय, तीहयो तीना गलत कामु मे साजल्यो रेय।
आखरी कावा आवही अने आवजो केय
मने घणी ढेरकी वात आपणी जुगु लीखवा नी से, पण कागत अने संय वेर लीखवा नी हींडतो; पण आह से, के मे तमारीन्तां आवही, अने तमने मेळीन वात करही: जीनी सी तमारी खुसी पुरी हये।
तारी टाळली बेनेह ना सोरा-सोरी तने वारलो से के करीन केय।
Source notes (1)
- Cross-reference युहन्ना 13:34; 15:12,17
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.