Paliya Bible
1 कुरन्थी 5
ईसु नी मंडळी मे छीनाळु
ह़ाचलीनेत, आहयु ह़मळवा मे आयु, के तमारी मे छीनाळु हये। अने ईसम छीनाळु ते जे भगवान ने बी नी जाणता तीहया माणहु मे बी नी हये। कानो ते आह़फा नी आय्ह ह़ाते लग छीनाळु करे। आहयी वात ने जाणीन तमने दुख बी नी लागतो, अने ईसम छीनाळु करन्या ने मंडळी मे गेथा नीकाळवा नो वीच्यार बी नी करता। अने मोटाय कर र्या। मे डील मे ते आञे से पण आत्मा मे तमारी वच मे हजुर से। अने ईसम छीनाळु करन्या नो नीयाव करीन डंड नो हुकम बी आप देदला से। अने जत्यार तमु अने मारी आत्मा मालीक ईसु मसी ना जोर भेळ अने तीना नाम सी भेळा हयहु, ता ईसम छीनाळु करन्या माणहु ने, तीना डील भेळ भुतड़ा ना हात मे ह़ोप देहु। ईसम करहु ता तीनु डील ते पाप भेळ खुट जहे, पण तीनी आत्मा मालीक ईसु ना आव्वा ना दाड़े छुटकारो हात करहे। 1
तमारु मोटाय करवा वारु नी हय; तमु आहयो कवाड़ो ते जाणो के “जरीक खमीर आखा कोहण्ला लोट ने बी खमीर नी तेम खाटो कर देय।” जुन्ला खमीर ने नीकाळीन आह़फा ना जीव ने चोखो करो: आनीन करते के तमु नवला कोहण्ला लोट ने तेम बण जावो, काहाके आपणा फसह ना तीवार नु गाडरु ते ईसु मसी से, जे बादा ना रुप मे आह़फा ने चड़ाय देदो। एतरे आवो आपणु आखा फसह ना तीवार ने कुहराय अने डहवाय ना खमीर भेळ बणला रोट्ला नी लारे नी पण हुदा हय्न सच्चाय सी खमीर वगर ना ताबला रोट्ला भेळ वाळता।
मे तमने मारी चीट्ठी मे लीखलो से के तमु छीनाळ्या ह़ाते ह़ात-ह़ंगात ना राखो। मे ईसम नी केतो के तमु आहयी कळी ना छीनाळ्या, हयाळ्ळा, लुच्चा अने मुर्ती पुजण्या ह़ाते ह़ात-ह़ंगात ना राखो। काहाके ईसम तत्यार ते तमने आहयी कळी ने सोड़वा पड़हे। खास वात आहयी से के मे तमने ईसम की र्यो के तमु एवा माणहु ह़ाते ह़ात-ह़ंगात ना राखो, जे ईसु मसी मे तमारा भाय हय्न बी छीनाळु, लालच्यो अने मुर्ती पुजण्यो, वडवा वाळो, अने दारकुट्यो, बुराय करवा वाळो हय। एवा माणहु ह़ाते बहीन खाणु बी ना खावो।
जे ईसु मसी नी मंडळी मे नी हय, तीमनो नीयाव करवा नु मारु ह़ु काम? जे ईसु नी मंडळी मे से तीमनो नीयाव तमने नी करवा जोवे ह़ु? हाव, करवा जोवे। जे ईसु नी मंडळी मे नी हय, तीमनो नीयाव ते भगवान करहे। खरला सास्तर मे बी आसम लीखलु से: “पापी माणहु ने तमारी वच मे गेथा नीकाळ देवो।”
Source notes (1)
- Cross-reference गलातीयो 5:9
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.