Paliya Bible
1 कुरन्थी 6
ईसु नी मंडळी मे ह़मजोतो करवा
तमु जे ईसु पोर भरहो करन्या से। तमारी वच मे झगड़ो हय जाय ता तमारी मे ईसम कोय से, जे नीयाव मांगवा करीन भगवान ना चोखला माणहुन तां जवा रेवा दीन, जे भरहो नी करे तीहया माणहु नी कोरट-कचवरी मे जतो हय? भगवान ना चोखला माणहु आखी कळी ना माणहु नो नीयाव करहे। आहयी वात तमने मालम नी हय ह़ु? तमु आखी कळी नो नीयाव करहु ता तमारी वच मे नानोह झगड़ो हय जाय ता तमने नीयाव करते नी बणे ह़ु? आपणु ह़रगदुत नो लग नीयाव करहु आहयी वात तमने मालम नी हय ह़ु? ता आहयी कळी मे हयवा वाळो नानोह समजोतो करते नी अवड़े ह़ु? तमारी वच मे कंय बी झटा-पटी हय जाय, ता तमु ईसु नी मंडळी मे गेथा नी पण बीजा ने नीयाव कराव्वा बहाड़हु ह़ु? तीमनो ईसु नी मंडळी मे जरीक बी जागो नी हय। तमने लाजे पाड़वा करीन मे आहयी वात की र्यो। तमारी वच मे ह़ाचलीनेत एक बी अक्कल वाळो भाय नी हय ह़ु, जे तमारो झगड़ो भांगे ईसम हय। तमारी मे भाय-भाय पोर गुनो लगाड़ीन कोरट-कचवरी मे जाय, तीहयी बी जे ईसु पोर भरहो नी करे तीमनी पांह नीयाव मांगवा जाय।
ह़ाचलीनेत, तमारो मोट्लो गुनो आहयो से के तमु आंबा-सांबा एक-बीजा नो वीरोद करीन पेसी लड़ र्या। पेसी लड़वान बदले आखी ठगड़ी वात ने वेठीन तमु नुकसान ह़ुका नी झेलता। पण तमु ते खुद ना भाय ने ठगीन तीनु नुकसान कर र्या। पापी माणहु भगवान ना ह़रग राज ना हकदार्या नी रेय, आहयी वात तमने मालम नी हय ह़ु? आह़फा ने धोको ना देवो। छीनाळु करन्या, मुर्ती पुजण्या, रंडी अने रंडी ने राखण्या, अने अदमी-अदमी सवसार करन्या, चोट्टा, हयाळ्ळा, दारकुट्टा, गाळ देवा वाळा, बीजा ने ठगवा वाळा माणहु भगवान ना ह़रग राज ना हकदार्या नी रेय। तमारी माय्न ढेरेत जणा पेले एवात हता, पण तमु मालीक ईसु मसी ना नामे, अने अमारा भगवान नी आत्मा सी धोवायला से, अने चोखा हय जेला से, अने वारला बण जेला से।
आह़फा ना डील ने भगवान ना बड़ाय वाटु
आखी चीज मारी वाटु ताले से, पण आखी चीज नफा नी, नी हय। आखी चीज मारी वाटु ताले से, पण मे कानी बी चीज ना हक मे नी रेम। खाणु पेट जुगु से, अने पेट खाणा जुगु से, पण भगवान बेम जणा ने खत्तम करहे। अने डील छीनाळु जुगु नी हय, पण मालीक नी चाकरी जुगु से, अने मालीक डील नी देख-भाळ करे। जीसम भगवान मालीक ईसु मसी ने मर्या-ह़र्या मे गेथो पासो जीवतो कर देदो, तेमेत तीहयो आपणु आखा ने मर्या-ह़र्या मे गेथो तीना जोर नी लारे जीवतो कर देहे।
तमारु डील ईसु मसी नो आंग से आहयी वात तमने मालम नी हय ह़ु? ता आहया ईसु ना आंग ने रंडी नो आंग बणाव्वा जोवे ह़ु? कदी नी। जे रंडी ह़ाते छीनाळु करे, तीहया तीनी ह़ाते एक डील बण जाय, आहयी वात तमने नी मालम हय ह़ु? काहाके लीखलु से “तीहया बेम एक डील रेहे।” पण जे बी मालीक ह़ाते आत्मा मे जोड़ाय जाय, तीहयो तीनी ह़ाते एक आत्मा बण जाय।
छीनाळु ना करो। काहाके बीजा जेतरा बी पाप से तीहया आखा डील गेथा बारा हये, पण छीनाळ्यो ते आह़फा डील ना वीरोद मे पाप करे। 2तमारु डील चोखली आत्मा नो मंदीर से, आहयी वात तमने मालम नी हय ह़ु? आहयी चोखली आत्मा तमु आखा ने भगवान पांह गेथी जड़ली से। काहाके भगवान तमारी जुगु दाम आपीन तमने वेचातो ली लेदलो से, एतरे आह़फा ना डील नी लारे भगवान नी बड़ाय उजन्ती करो।
Source notes (2)
- Cross-reference 1 कुरन्थी 10:23
- Cross-reference 1 कुरन्थी 3:16; 2 कुरन्थी 6:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.