Luk 2

Kubutuka kwa Yeesu

(Mat 1.18-25)

1Mu maa masu, kolo wa Lumi Kaizalia Ogusto bya hana kilao ti bandu booso ba sinyibwe mazina moomwa mu kisi kye tangadibwa na Lumi1. 2Kokwa ku sinyibwa kwa mazina lwendo lwa busu yetebwa mukindi kyene Kilenio mukulu wa Silia. 3Bandu booso habaava mukukwisinyisha mazina, kila yowa mumukola waaye wakubutuka.

4Yozefu naiye bya nyomoka mukisi kya Galilaya mu mukola wa Nazaleti. Bya yena Yudea mumukola we butukila Daudi ukitaanibwa Bethelehemu, weyena kokwa kumona wene wa kilongo kya Daudi. 5Mukuyeena mukukwisinyisha bya yena na Malia, musika wenangiye muku musongola naiye wene na yimi tonono na kubutula. 6Habenange kokwa ku Betelehemu, mafuku maye makubutula hama bambana. 7Haŋo bya butula mwaana waaye wabusu wa mwamulume, bya muzikila ngubu ya mwaana mulebeela na kumutandibika musaani dya kudishila nyama, kumona nda bemona bua mu kyende kya baini.

Malaika wasaudila baki dindikijya mikoko kubutuka kwa Yeesu

8Mu kyakekyee kisi, kwenange baki dindikijya. Baaba badindikijyi be yakananga kumangene kwaku dindikizya nyama yaabo. 9Malaika wa Vidi-nyambi bya banyomokela mukivuku, na mwimwi wambunda ya Kabejya byawa bamunukila mbanga yooso. Haba tiina koo kwa kwinikindu. 10Ila Malaika* bya basaudla ti: «Ndamutiina, kumona ti namuvishila musau ulweela huyakana wabandu booso kuseelela kwa bule. 11Leelo diino mufuudi wiinu wabutuka mumukola wa Daudi, kitaanibwa Kilisito, lungi Vidi-nyambi wiinu. 12Kimumonesha ti niiye ni kiiki, mubanga mwaana wazikibwa ngubu ya kubutuka, na watandibikibwa musaani yakudishila nyama.»

13Mukivuku bobo, yowa malaika bya moneka na kiandu kikata kya Malaika bangi kunyomokela haulu, habasiki shisha Kabejya ti: 14«Kabejya watumbiibwe ku haulu, na bandu baaba bakivuleeye mukisi bayakane nyaa.»

Badindikijyi bayeena mukumona mwaana

15Baba Malaika habakwisamijyena na baba bakidindikijya habahaluka haulu, ni badindikijyi habasomba kukwisaudijyena ti: «Kwabiibi tweene bangu ku Bethelemu tukamone maama manyomokela, maama maava tusaudila Vidi-nyambi.» 16Haŋo haba yeena kokwa yayaya ku Bethelehemu, habaka banga Malia na Yozefu na yowa mwaana mutokatoka mutandabale musaani dyaku dishila nyama. 17Haŋa baba badindikijyi habeewa kumona mwaana haba yena kukasaula wowa mukizi webasaudila Malaika kukidila yowa mwaana. 18Bandu booso be teejya wowa mukizi waba dindikijyi haba kanya kwa bule. 19Ila Malia, we bika maa mauya mooso mutima dyaye na bya yakana mukumahejya fikidijyo. 20Kumongo baaba badindikijyi haba haluka. Beyenanga kushisha Kabejya na kumuyimbila kukidila mauya mooso mabava teejya na kumona. Kumona bava banga mauya mooso byakebee biva basaudila malaika.*

Mwaana waunikibwa zina

21Mwaana hebambanyeye mafuku muanda ya kubutuka, habamukijya mu nyoo dya kumutemba ndeezwa.2 Byaba muhunika zina dya Yeesu, zina dye moneshebwa na Malaika busu Malia ndeshwala yimi.

Yeesu wa shwadibwa ku lubunga lwa Kabejya

22Mafuku makukwitosha kwa Malia na Yozefu hamabambana kukidila bebya biki yakula Buta bwa Musa, Yozefu na Malia haba mushwala mwaana ku Yelusalemu, kwaku boya ti bamumoneshe kudi Vidi-nyambi3. 23Beeta bebya kumona yidi businyibwe mu buta* bwa Vidi-nyambi ti: «Kila mwaana wa mwamulume kibutuka wabusu muifu dyanajye uhanibwa kwa Vidi-nyambi.»4 24Na lungi habatuula tudilo kukidila bebya biki yakulanga buta ti: «Yiki bambana kutuula tutiti tubidi ao byokela bibidi bya ngudimba5.»

Busho dya Simeoni

25Mumukola wa Yelusalemu kwene mundu yumo wetaanibwanga Simeoni. Yuu Simeoni wene mundu kisumuka buludi busu bwa Kabejya na kumutiina. Wene mukudindila kufuuka kwa kisi kya Isilaeli. Na Tima dya Kabejya dyeene haulu yaye 26Lungi wene wa mumonesha ti ndakumota itu ndeemona Kilisito wayishibwa na Vidi-nyambi. 27Simeoni muku moneshebwa na Tima dya Kabejya, bya shwela mulubunga. Bashaye na Yeesu haba shweela naye munda mukuboya ti bamuteele beebya bikiboyanga buta. 28Simeoni haya shwala mwaana mu biboko byaaye, bya somba kushisha Kabejya mukuboya ti:

29«Vidi-nyambi wabambanya bindu bya weebadijya,

ukibambana kunguzama miimi muvubi woobe na kwimotele byaami bilweela.

30Kumona miimi mwinikindu na kwimonena Mufuudi* wa wavisha.

31wauva biika tonaa, wayakane Mufuudi* busu bwa bandu booso.

32yowa Mufudi mwiimwi umunukila bisi byooso.

lungi ni yiabila kisi kyobe Isilaeli mbunda.»

33Maama mauya mavayakula Simeoni uvayakula kukidila Yeesu hamakanyisha ba Shaayi. 34Ni Simeoni haya bafiiyudila,6 haya jyongodela Malia naajye na mwaana ti: «Muteejye bangu: Mwaana yuugu wabutuka uyakana kashu songo kakuzizimisha bandu babule hamukidi haba Isilaeli, na kutalusha babule hamukidi haabo. Uyakana lutondo kunyomokela kudi Kabejya yi bengebwa na bandu babule. 35Biibi, miejyo ya bandu babule yikifamishibwa yi monekanga. Na bee bunga usubanga bidi yowa wamanikibwa fumu mutima dyaaye.»

Ana washisha Kabejya kukidila Yeesu

36Ubwanangi ŋangabiloto yumu wa mwaazi,7 wetaanibwanga Ana, uvane musi'a wa Fanueli, wa kilongo kwa Asheli. Yowa Ana weta bobo misha muanda ya kutunduka, mulume waaye bya mota. 37Haya shaala mwadyangu, mupaka misha makumi muanda na yinaa.8 Wene mukuyakana mukyende kya Kabejya mukumuvubila bufuku na munyinya mukuajya kusidi kudya. 38Naiye bya sosoka mukyakekee kindi na bya somba kuta abee kudi Kabejya. Wene muku saula musau wa Yeesu kudi bandu booso benange mukudindila bebya bifuula Kabejya bandu ba Yelusalema mukusuba kwaabo.

Bashaye na Yeesu baaluka u Nazaleti

39Bashaye na Yeesu habaawa kuta bindu byooso kukidila beebya bikiyakakula buta bwa Vidi-nyambi kisha habahaluka naye mumukola waabo kya Nazaleti mukisi kya Galilaya. 40Mwaana haya kula na heekidi na butangala, na hekidi na nyinyi ya bule, na mbejya ya Kabejya yivane bobo kukumo naye.

Yeesu mu lubunga* lwa Kabejya

41Musha na musha, bashaye na Yeesu bene na bwaama bwa kuyena ku Yelusalemu ku kiandu kya Pasaka*.9 42Yeesu hefisheye misha kumi na yibidi, iye na bashaaye haba banda kukekya kiandu bebya byene bwaama bwaba Yuda.10 43Haŋa kiandu kya Pasaka* hakyeewa, bashaye na Yeesu bealuka kwaabo. Ila Yeesu uvashaala ku Yelusalema haboobwa ebu ndababuyu'a. 44Ebu babwanangi munijya tii, Yeesu gudi munda mwa 'igandu ibwanangi ayinanga na bezinaye ba luendo. Habe sumu'a lusu luzima, habakilu mukebela munda mwabezinabo na baba babekwiyukijyena nabo. 45Haboobwa ndabumumona. Ni habagalu'a 'u Yelusalema amukebanga. 46Masu gasatu ukila, habamuheta munda mwa lubunga* lwa Kabejya mukuyaana tega mubwaata bwa balangidijyi ba buta*, eyu muubatelegejya na mubayujya. 47Booso babu mutelegejya mauya maaye, babu kanya manee ga nyinyi yaayi na byeebya byebwanangi mubaluula. 48Yosefu na Madiya najyaayi haba bumumona haba kanya. Ni najyaayi haya muyuujya ti: «Mwaana waami, nyaayi kya watuteela biibi? Lola, miimi na shobe tuvanange na susu mukukukeba!» 49Yeesu haya basawiila biibi: «Nyaayi kyamudi munikebela? Ndamuluyu'a tii, yilunihaajya uyaana munda mwa yendi kya Shaami?» 50Haboobwa ebu ndababuyu'a kwakai byebwanangi mubasaudila beebya.

51Kumongo, Yeesu bya haluka nabo ku Nazaleti, uvanange mukuta beebya bye musaudilanga ba shaye. Maama mauya mooso, najyaye bya yakana mukumabiika mutima dyaaye. 52Na eyu Yeesu haya kula na heekidi na nyinyi, na haya monesha buuya kudi Kabejya na bandu. booso.