Skip to content
BibleKenya

Banda-Linda NT

Rɔmə 10:9

Verse 9 is marked below, with the whole chapter around it. Read from the start

Ajuwufu də azü lə ə̂dû amarä sə kʉ də Âgbɔ̂ Əyïngerə bale

Alaye əmə, ərə ə̂në mə yində nə də lɔsu əmə nɔ̂ â sə kə yu tshuku nə kə Ndjapä mbrə Ajuwufu kɔ kə də̂ kə pa əndje tshɔ lə kuzu gâ ye. Mə lï ndə kə pa nə ə pa əndje sə də əgo ngbatshe tə̂ lɔsu əndje ndə kə pa əndje mbrə kə Ndjapä nə, bale əgo nə tə̂ lɔsu əndje nə sə sə tə̂ äwä kə wusə̂ ərə ne. Mbrə ə̂në əndje wû wûsə̂ âdâ äwä ə̂në Ndjapä nə ə mbrə azü tə aə̂rɔ̂ azü lə ala ye tə̂ nə kɔ ne â əndje prâ ənə̂ əndje äwä nə də ə̂tə̂ əndje. Rəkɔ, əndje mbrə̂ tə̂ əndje mbrə̂ Lïndə̂ äwä kosəra ə̂në Ndjapä nə mbrə̂ gâ ye ndə kə she azü lə kuzu tə̂ nə kɔ ne. Mbrə ə̂në Kristə nə nâ də âgbɔ̂ əpʉ nə̂ Mayïzə nə ndjɔ gâ tə̂ âdâ nə gâ ye, ndə kə pa azü nɔ̂ ə̂në əndje za lɔsu əndje kə Jezu Kristə nə, əndje dô tə̂ əndje tə aə̂rɔ̂ azü lə ala Ndjapä nə gâ ye.

Mbrə ə̂në Mayïzə tâ əpʉ gâ lə fraka gâ pâ äwä kə sə tə ə̂rɔ̂ əzü lə ala Ndjapä tə̂ äwä âgbɔ̂ əpʉ ə pâ: «Əzü ə̂në tshə mbrə ərə Lïndə̂ aəpʉ ə̂në ə sə lə âgbɔ̂ əpʉ nə kɔ sə kə sə də sorô tə̂ äwä nə.»1 Bale, əpʉ ə̂në ə sə gâ pâ äwä kə sə tə ə̂rɔ̂ əzü lə ala Ndjapä nə tə̂ äwä əpʉ lɔsu kɔ kə səye: Pä pä mâ lə zə-e ə pa: «Əde kə o mâ lafɔ-e je?» â jerə də Kristə nə. Pä pä ndje ə pa: «Əde kə jerə mâ ə̂sə̂ akuzu je?» Kristə nə ô gashu lə takpa tə̂ akuzu gâ ye. Rəkɔ, əpʉ sə̂ kɨ atâ a? Ə pa: «Əpʉ nə sə trö də əbə, lə ama zə, ndje tə̂ lɔsu zə.»2 Əpʉ səkɔ kə də̂ əpʉ lɔsu ə̂në ä mʉ kɔ. Kədə, də ama zə, də̂ bə pa lə ala azü ə pa Jezu sə tə Âgbɔ̂ Əyïngerə â kədə bə yində nə də lɔsu zə nɔ̂ ə pa Ndjapä shê ətshə lə takpa tə̂ akuzu gâ ye, bə sə kə she lə kuzu. Mbrə ə̂në də lɔsu ye də̂ əzü ə yində əpʉ nə, â Ndjapä nə sə kə mbrə əzü nə tə ə̂rɔ̂ əzü lə ala ye; â də ama əzü də̂ tshə sə kə pa əpʉ nə ngbʉ̂ gashu, â she lə kuzu. Mbrə ə̂në Fraka nə̂ Ndjapä pa: «Əzü nɔ̂ ə̂në tshə za lɔsu ye kə ətshə, gana sə sə kə ngɔ ətshə bale ne.»3 Rəkɔ, Ajuwufu nə sə sə kpî tə̂ azü ə̂në əndje sə sə tə Ajuwufu nə ne kɔ ne: əndje nɔ̂ sə kʉ də Âgbɔ̂ Əyïngerə bale ə̂në tshə sə kə ko aə̂rɔ̂ aərə kə azü ə̂në əndje sə kə e ətshe kə ətshə kɔ. Mbrə ə̂në Fraka nə̂ Ndjapä pa: «Əzü nɔ̂ ə̂në tshə e ətshe də əɨrɨ Âgbɔ̂ Əyïngerə, tshə sə kə tshɔ lə kuzu.»4

Kə mʉ Ə̂rɔ̂ Əpʉ

Bale, əndje sə kə e ətshe nə kə ətshə atâ ə̂në əndje za lɔsu əndje za kə ətshə ne kɔ? Â əndje sə kə za lɔsu əndje nə kə ətshə atâ ə̂në əndje dji əpʉ gâ pâ ye dji ne kɔ? Â əndje sə kə dji əpʉ nə gâ pâ ye atâ ə̂në ə̈bə̈ əzü bale mʉ əpʉ nə mʉ ne kɔ? Â əzü sə kə mʉ əpʉ nə atâ kədə əndje wla azü wla ndə kə mʉ əpʉ nə ne? Mata ə̂në Fraka nə̂ Ndjapä nə pa: «Ə̈nü aawomʉ Ə̂rɔ̂ Əpʉ fʉ ə fʉ.»5 Bale, ə də̂ azü nɔ̂ də̂ kə yində Ə̂rɔ̂ Əpʉ nə kɔ ne. Mbrə ə̂në Ezayi pâ əpʉ ə pa: «Âgbɔ̂ Əyïngerə, əde kə yində əpʉ nə ə̂në ä mʉ kɔ də lɔsu ye?»6 Rəkɔ, əpʉ lɔsu nə to tə̂ əpʉ ə̂në əzü ə dji kɔ â əpʉ nə ə̂në əzü nə ə dji kɔ sə tə əpʉ nə̂ Kristə nə.

Bale, mə yu ətshe ə pa: «Ajuwufu nə djî kəmə əpʉ səkɔ djî ne a?» Bale, əndje djî gâ ye. Fraka nə̂ Ndjapä nə pa:

«Tshema alayïawla nə kɨ̂ sɔ pâ ashɔ nɔ̂ gâ ye,

â aəpʉ ə̂në əndje pâ gâ ye kɔ wûtu ndjɔ sɔ budu ashɔ.»7

Mə yu ətshe kwatə̂mə ə pa: «Azü əgɔ Isərayalə nə djî kəmə âdâ əpʉ sə̂ djî ne a?» Bale, əpʉ ə̂në Mayïzə pâ gâ pâ nə də əɨrɨ Ndjapä kɔ kə səye:

«Mə sə kə mbrə ndə kə pa e mbrə manda

tə̂ azü ə̂në əndje sə sə tə djatra marä ne kɔ,

mə sə kə mbrə ndə kə pa e sə də əkɔ

gâ tə̂ azü lə marä ə̂në əndje wusə̂ ərə wu ne kɔ.»8

Ezayi pâ ndje əpʉ ʉrrr ndjɔ də əɨrɨ Ndjapä ə pa:

«Azü ə̂në əndje prâ əmə prâ ne kɔ,

əndje sɔ̂tə̂ əmə gâ ye,

mə mâ tə̂ əmə kə azü ə̂në əndje yû tshuku

ə̈bə̈ ərə yû bale kə əmə ne kɔ.»9

Bale, gâ pâ əpʉ nə̂ azü əgɔ Isərayalə nə, Ndjapä nə pa: «Alɔnɔ̂, mə yî kəna əmə kə azü ə̂në əndje dji əpʉ dji ne ə shera əpʉ ama əmə kɔ.»10

Source notes (10)
  1. Footnote Wu Əkrɔ 18.5.
  2. Footnote Wu Əpʉ 30.12-14.
  3. Footnote Wu Eza 28.16.
  4. Footnote Wu Jow 3.5.
  5. Footnote Wu Eza 52.7.
  6. Footnote Wu Eza 53.1.
  7. Footnote Wu Ətsh 19.5.
  8. Footnote Wu Əpʉ 32.21.
  9. Footnote Wu Eza 65.1.
  10. Footnote Wu Eza 65.2.

Banda-Linda NT. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.