Rɔmə

Fraka ə̂në Palɔ tâ kə Laglizə əgɔ

RƆMƏ

Kumu əpʉ

Âdâ kə ta fraka səke də̂ yea

Fraka ə̂në Palɔ tâ ə wlâ kə azü nə̂ Ndjapä mâ Rɔmə kɔ kə səye. Tshə nâ nâ alɔ bale mâ je ne, ə̈bə̈ ata əzü kə sə̂ â yîsə̂ əpʉ kə azü tshe mâ je, â mbrə̂ azü tə azü nə Kristə mâ je kɔ. Palɔ nə tâ fraka nə kə əndje ndə kə pa əndje wusə̂ nə ə pa əne sə tə əde. Âdârə ə̂në tshə pâ kə əndje ə pa alɔ ə̂në əne sə kə na mâ Esəpanyə, əne sə kə ro djoko je ndə kə pa əne gbɔgbɔ lɔsu əndje tə̂ äwä Kristə. Tshə pâ ndje kə əndje ə pa əndje yu Ndjapä mbrə əne kanika əne sɔtə̂ äwä ndə kə pa əne na ana nə.

Palɔ nə yîsə̂ ərə ə̂në ə sə tə ə̂rɔ̂ nə ə rô ə̂dû ərə nɔ̂ lə əpʉ lɔsu ə̂në əndje zâ kə Kristə kɔ kə əndje lə fraka səke ə̂në tshə wlâ kɔ. Tshə pâ əpʉ ə pa azü nɔ̂ kə sə̂ â mbrə̂ nyaka gâ ye kɔ, â ə̂yî Ndjapä tshɔ̂ əndje gâ ye kɔ. Bale ə̂në a lə ye, əndje lï ndə kə pa əndje she tshelə takpa tə̂ əndje də Ndjapä nə gâ mandânə tə̂ äwä kə tɔ popo Jezu Kristə. Ndjapä nə kê Palɔ nə ndə kə pa tshə sə tə əzü-awla kanika ə mʉ Ə̂rɔ̂ Əpʉ kə azü. Palɔ pâ əpʉ ə pa Ə̂rɔ̂ Əpʉ nə, ə sə tə awlra nə̂ Ndjapä mbrə əzü bale bale ə̂në tshə zâ lɔsu ye kə Kristə gâ ye kɔ, ə sə sə ndə kə pa ayə sə tə Juwufu, wala tshə sə sə tə Juwufu ne ne. Ənə̂ Ndjapä, azü nə̂ ye nɔ̂ lï ə lï, ə̈bə̈ əzü bale ro ngâ nə ro ne. Tshə kô əndje tə aə̂rɔ̂ azü gâ ye, Lïndə̂ əpʉ ə̂në Fraka nə̂ Ndjapä pâ gâ ye kɔ. Ə pa əpʉ ə pa: «Ə̂rɔ̂ əzü sə kə sə də sorô tə̂ äwä lɔsu» (Rɔmə 1.17). Palɔ nə pâ ndje ə pa azü nə̂ Ndjapä nɔ̂ kə sə̂ â lï ndə kə pa əndje dji tə̂ əndje, ə̈bə̈ əzü bale lï lï ndə kə pa tshelə wəra tə̂ ye tə̂ ngâ nə ne, tshə wa ngbanga wa gâ lə kumu ye ne, ə za əpʉ za gâ lə kumu ye ndje ne kədə əpʉ nə̂ əndje nə kə sə sə kəmə kʉ bale ne.

Fraka səke ə̂në Palɔ tâ ə wlâ kə azü əgɔ Rɔmə kɔ, ə tô, â pə tə̂ alɔ nə səkɔ, azü nə̂ Kristə nə yîndə nə tə ə̂rɔ̂nə.

Əpʉ tshelə fraka səke na rəke

1. (1.1-17) Palɔ mʉ̂ Ə̂rɔ̂ Əpʉ kə azü

2. (1.18–3.20) Azü nɔ̂ kə sə̂ â mbrə̂ nyaka gâ ye kɔ

3. (3.21–4.25) Äwä ə̂në Ndjapä kô azü tə aə̂rɔ̂ azü kɔ

4. (5.1–8.39) Azü nə̂ Ndjapä ə sə də ə̈bə̈ tafa sorô je

5. (9.1–11.36) Ndjapä tshî əgɔ Isərayalə tʉ gâ ye, bale ə də̂ gbrä də̂ ne

6. (12.1–15.13) Tafa kə sə lə kə yi tə̂

7. (15.14–16.27) Ərə ə̂në Palɔ zâ ama mbrə nə, də əpʉ kə bla ətshe