Aebrʉ

Fraka ə̂në əndje tâ kə

AEBRɄ

Kumu əpʉ

Âdâ kə ta fraka səke də̂ yea

Ə̈bə̈ ngrowô ə̂në əndje tâ ə wlâ kə Ajuwufu ə̂në əndje zâ äwä Kristə kɔ kə səke. Ətshə ə̂në tshə tâ ngrowô nə kɔ, azü wûsə̂ ye wû ne, bale ərə ə̂në azü wûsə̂ nə ngâ kɔ kə də̂ əzü nə wûsə̂ Fraka nə̂ Ndjapä ə̂në ə sə̂ je tə̂ tshikɨ nə səkɔ tə ə̂rɔ̂nə (Angbrɔ Mbʉkʉ), mbrə ə̂në lə nə də̂ tshə kô alabə̈ aəpʉ aərə â yîsə̂ djatra əpʉ kə əndje kɔ.

Aangbʉlî azü nə̂ Kristə nə wû əyo ngâ lə kəna azü, ʉrrr əndje vɔ̂tə̂ kə pra äwä ndə kə pa əndje ko tə̂ əndje ə ko wû. Âdârə ə̂në əzü nə tâ ngrowô səke ə wlâ kə əndje kɔ kə sə̂, ndə kə pa kə əndje ə pa əndje ka gbʉ gbʉ gbʉ, ə tshi äwä nə tshi tʉ ne.

Tə̂ alɔ nə̂ alätä, Ndjapä djî tə̂ ye də Ajuwufu äwä bale gâ ye. Tshə pâ kə əndje ə pa kədə ə̈bə̈ əzü kə mâ ə̈bə̈ nyaka, əndje wô ə̈bə̈ agia ə tô də əkrɔ, â Ndjapä nə sə̂ kə gba tshelə nyaka lə kumu əzü nə. Fraka səke pa ənə̂ ye ə pa tafa kə dji tə̂ ə̂në Ndjapä nə djî tə̂ ye də azü ə̂në əndje zâ lɔsu əndje kə Ɨrɨ nə kɔ, ə rô angbʉlînə səkɔ gâ ye. Mbrə ə̂në ərə ə̂në Jezu Kristə mbrə̂ mbrə azü gâ ye kɔ, ə rô ərə ə̂në atrawaya nə̂ Ndjapä, də Mayizə, də Aarɔ gâ ndə Jozuwe mbrə̂ kɔ gâ ye. Jezu kə sə tə Aya Ndalimi nə̂ Ndjapä ə̂në tshə zâ ətshə ə tô əkrɔ də ətshə mbrə anyaka nə̂ azü nɔ̂ kɔ. Əzü bale bale ə̂në tshə za lɔsu ye kə ətshə, tshə ma ma əgo ndə kə pa tshə za agia ə to əkrɔ ə to də ətshə mbrə nyaka nə̂ ye ne. Ndjapä nə sə kə gba tshelə nyaka nə̂ ye nə.

Əpʉ tshelə fraka səke na rəke

1. (1.1-3) Ɨrɨ Ndjapä sə tə âgbɔ̂ əzü

2. (1.4–2.18) Jezu rô atrawaya nə̂ Ndjapä gâ ye

3. (3.1–4.13) Jezu rô Mayizə də Jozuwe gâ ye

4. (4.14–7.28) Jezu sə tə âgbɔ̂ awotokrɔ

5. (8.1–9.22) Jezu nâ də əpʉ kə dji tə̂ ə̂në ə rô angbʉlî kə dji tə̂ nə gâ ye kɔ

6. (9.23–10.39) Əkrɔ ə̂në Jezu zâ tə̂ ye to nə kɔ sə kʉ äwä kpiabale â bale bale nə kə sə̂

7. (11.1-40) Alabə̈ azü lə takpa tə̂ əgbro azü nə̂ Ndjapä tshe leme-e

8. (12.1–13.19) A mbrə̈ ərə mata Jezu

9. (13.20-25) Əpʉ kə yu Ndjapä, də bale əpʉ kə bla ətshe