Skip to content
BibleKenya

Banda-Linda NT

Aebrʉ 8

Jezu sə tə âgbɔ̂ awotokrɔ nə̂ əzə̂

Kandää, əpʉ ə̂në ə sə tə âgbɔ̂ əpʉ nə lə əpʉ sə̂ ä yində kə pa ndə nə kɔ kə səye: a sə də marä tə̂ âgbɔ̂ awotokrɔ rə, ə̂në tshə sə gâ tʉ mâ lafɔ ndə ndəkɔ mbata ngerə nə̂ Ndjapä, tə Ndjapä prââ kɔ. Tshə sə kə mbrə kosəra nə tə̂ ətshe ə̂në ə sə kpî kɔ, lə djatra gbafa nə, ənə̂ sə̂ ə̂në Əyïlingû kə mbrə̂ gâ ye, â ə də̂ əzü də̂ kə mbrə̂ kɔ ne.

Əndje zâ âgbɔ̂ awotokrɔ bale bale ndə kə pa tshə ko aərə də aagia ə to əkrɔ də nə, â ətshə nə̂ əzə̂ nə lï ndje ndə kə sə də ə̈bə̈ ərə ndə kə za mbrə əkrɔ nə. Kandää, kədə tshə sə̂ kəmə gâ pâ ashɔ, tshə sə̂ sə̂ kə sə kəmə tə awotokrɔ ne, mbrə ə̂në alabə̈ aata aawotokrɔ nə sə je ə̂në əndje sə kə to əkrɔ nə je ə lï də âgbɔ̂ əpʉ nə kɔ. Aawotokrɔ nə səkɔ sə kə vrɔ Ndjapä â kosəra nə ə̂në əndje sə kə mbrə nə kɔ sə tə yîrə̂ aərə ə̂në ə sə mâ lafɔ kɔ. Äwä bale ndje, alɔ ə̂në Mayïzə sə̂ kə mbrə gbafa Ndjapä kɔ, Ndjapä nə pâ kə ətshə ə pa: «Lïshi-a! Bə sə kə mbrə ərə nɔ̂ Lïndə̂ ənə̂ sə̂ ə̂në mə yîsə̂ nə kə əbə gâ ye mâ tə̂ kumu kaga kɔ.»1 Bale kpəsəye, Jezu nə rô gâ tə̂ ə̈bə̈ âgbɔ̂ kosəra ə̂në ə rô ənə̂ ə̂dû aawotokrɔ nə gâ ye mbrə ə̂në tshə sə tə əyïkɔkɔ̂ lə mbʉkʉ ə̂në ə rô angbrɔ mbʉkʉ nə gâ ye, ə̂në əpʉ nə ka gâ pâ aəpʉ ə̂në Ndjapä nə zâ ama də nə gâ ye â rô ə̂dû aəpʉ nɔ̂ gâ ye kɔ.

Ndjapä zâ ama də əpʉ ə̈bə̈ tafa mbʉkʉ

Kədə angbʉlî mbʉkʉ2 nə kə sə̂ kəmə sə̂ də ə̈bə̈ əmbrʉ ərə lə nə ne, äwä kə pra ə̈bə̈ bishi nə sə̂ sə̂ kə sə kəmə je ne. Mbrə ə̂në Ndjapä nə ngâ kə azü nə̂ ye nə ə pâ:

«Əyïlingû pa:

Aəlo sə kə na gu nə,

ə̂në mə sə kə mbrə tafa mbʉkʉ

də azü əgɔ Isərayalə

də azü əgɔ Juda.

Ə sə sə kə sə mata mbʉkʉ

ə̂në mə mbrə̂ də alabä əndje kɔ ne,

tə̂ alɔ ə̂në mə têgbɔ kəna əndje

ndə kə pa mə wutu də əndje lə əgɔ Ejipətə kɔ.

Əyïlingû pa:

Ə̂në əndje də ə̂tə̂ əndje,

əndje dâ dâka pə lə mbʉkʉ nə̂ əmə nə ne kɔ,

əmə ndje, mə sə sə kə li tshelə əmə tə̂ əndje ne.

Əyïlingû pa:

E wü-a, mbʉkʉ nə ə̂në mə sə kə mbrə

də azü əgɔ Isərayalə nə kɔ, mandâ aəlo səkɔ kɔ, kə səye:

mə sə kə ko aâgbɔ̂ aəpʉ nə̂ əmə gâ lə akrɔ əndje,

mə sə kə ta nə gâ tə̂ lɔsu əndje;

mə sə kə sə tə Ndjapä nə̂ əndje,

â əndje sə kə sə tə azü nə̂ əmə.

Ə̈bə̈ əzü bale sə sə kə yisə̂ ərə ə yi kə əzü əgɔ nə̂ ye

wala əzü bale kə aye nə bale ne,

ndə kə pa tshə wusə̂ əmə ne.

Mbrə ə̂në azü nɔ̂ ə wusə̂ əmə je,

ə vɔtə̂ nə tə̂ aya əgblə ʉrrr ndjɔ gâ tə̂ âgbɔ̂ əzü lə takpa tə̂ əndje.

Mbrə ə̂në mə gba tshelə anyaka nə̂ əndje je,

â mə sə sə kə li tshelə əmə kwatə̂mə bale gâ tə̂ anyaka nə̂ əndje nə ne.»3

Ə̂në Ndjapä nə pâ tafa mbʉkʉ kɔ, angbʉlî mbʉkʉ nə dô tə̂ ye tə angbrɔ nə gâ ye. Kandää, ərə ə̂në ə sə tə angbrɔ nə ə gbɔ̂ gâ ye kɔ, ə sə kə li ə liwu.

Source notes (3)
  1. Footnote Wu Wutu 25.40.
  2. Footnote Wu Wutu 24.3-8.
  3. Footnote Wu Jer 31.31-34.

Banda-Linda NT. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.