Banda-Linda NT
Aebrʉ 1
Ndjapä pâ əpʉ tə̂ äwä Ɨrɨ nə
Leme-e, Ndjapä pâ əpʉ äwä ngbatshe kə alätä əzə̂ tə̂ äwä aərə kpî kpî kpî, lə ama aawopandəma ye. Bale, lə ə̂dû alɔ səye, tshə pâ əpʉ kə əzə̂ tə̂ äwä Ɨrɨ nə, ə̂në tshə zâ ətshə tə əyïnga aərə nɔ̂ kɔ â tə̂ äwä ye də̂ tshə mbrə̂ ndje tshepashɔ kɔ. Ɨrɨ nə nə sə kə tshe ə̂yî ye â sə tə djatra kə sə Ndjapä nə də ə̂tə̂ ye. Tshə sə kə bata aərə nɔ̂ tə̂ äwä əpʉ ama ye ə̂në ə sə də awlra kɔ. Tshə yûtu anyaka nə̂ azü gâ ye â sə gâ tʉ gâ tə̂ ndəkɔ Ndjapä prââ mâ ngâ lafɔ-e.
Ɨrɨ Ndjapä rô atrawaya nə̂ Ndjapä
Ɨrɨ nə nə lʉ ə rô atrawaya nə̂ Ndjapä nə nɔ̂, ə̂në Ndjapä nə zâ əɨrɨ ə̂në ə rô ənə̂ atrawaya nə nɔ̂ gâ ye kɔ kə ətshə gâ ye. Mbrə ə̂në, trawaya nə̂ Ndjapä ətshə ənə̂ta də̂ Ndjapä nə pâ kə ətshə alɔ bale â pâ:
«Bə sə tə Ɨrɨ əmə,
kpəsəye, əmə kə zû əbə»?
 kwatə̂ye tshə pâ:
«Mə sə kə sə tə Abä mbrə ətshə,
â tshə sə kə sə tə Ɨrɨ mbrə əmə»1?
Bale, alɔ ə̂në Ndjapä nə sə̂ kə wla yiya əgblə nə̂ ye nə gâ pâ ashɔ kɔ, tshə pâ:
«Atrawaya nə̂ Ndjapä nɔ̂ vrɔ̈ ətshə!»2
Gâ pâ əpʉ nə̂ atrawaya nə, tshə pâ:
«Ətshə kə mbrə atrawaya nə̂ ye nə tə əyi,
â mbrə alayïkosəra nə̂ ye tə ala əwo kɔ.»3
Bale, tshə pâ kə Ɨrɨ nə nə ə pa:
«Wââ Ndjapä! Mbata ngerə nə̂ zə sə piii,
kə mbrə ngerə nə̂ zə sə kə sə tə kə mbrə ərə də äwänə.
Bə yî tə̂ zə də kə mbrə ərə də äwänə
â tshelə zə wə̂ra tə̂ ye tə̂ kə mbrə əmbrʉ ərə gâ ye.
Âdârə ə̂në, wââ Ndjapä, Ndjapä nə̂ zə tshê əbə də kâdâ ə̂rû
gâ pâ angâ zə gâ ye.»4
Kwatəndje, tshə pâ:
«Âgbɔ̂ Əyïngerə, əbə kə mô tshepashɔ pə tə̂ ama nə,
â tshelafɔ sə tə ərə kəna zə.
Aərə sə̂ nɔ̂ ə ndɨ je,
bale bə sə kə daka pə je;
ə luku nɔ̂ mata ləba əzɨ je.
Bə wuru gâ tə̂ nə mata əgerə ləba əzɨ je,
â ko aata nə gâ mandâ nə je.
Bale əbə, bə sə kə daka pə kpə mandânə,
â aəlo zə sə sə kə nglɔ nə bale ne.»5
 trawaya nə̂ Ndjapä ətshə ənə̂ta də̂ Ndjapä nə pâ kə ətshə alɔ bale â pâ:
«Sə̈ gâ tʉ gâ tə̂ ndəkɔ əmə,
ʉrrr ndjɔ mə mbrə alayïkowɔ nə̂ zə tə mbata ə̈nü zə6 gâ ye kane»7?
Atrawaya nə̂ Ndjapä nə sə sə nɔ̂ tə ayirə̂ mbrə kosəra nə̂ Ndjapä nə ne a? Ə̂në tshə wla əndje ndə kə pa əndje mbrə kosəra mbrə azü ə̂në əndje lï ndə kə she lə kuzu kɔ ne a?
Source notes (7)
- Footnote Wu Ətsh 2.7; 2Sam 7.14; 1Nger 17.13.
- Footnote Wu Əpʉ 32.43.
- Footnote Wu Ətsh 104.4.
- Footnote Wu Ətsh 45.7-8.
- Footnote Wu Ətsh 102.26-28.
- Footnote Mbata ə̈nü: Əpʉ səye yində kə pa tshepra ə̈nü.
- Footnote Wu Ətsh 110.1.
Banda-Linda NT. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.