गणना 32

यार्देनना पुर्वकडनी जमाती

(अनुवाद 3:12-22)

1रऊबेन अनी गाद वंशमधला लोकेसनाजोडे गुरेढोरे बराच व्हतात; त्यामुये त्यासनी याजेर अनी गिलाद हाई प्रांत दखं तवय ते गुराढोरासकरता चांगले शे आशे त्यासले दखायनं. 2गाद अनी रऊबेन वंशमधला लोके मोशे, एलाजार याजक अनी मंडळीना सरदार यासपान जाईसन बोलनात, 3अटारोथ, दिबोन, याजेर, निम्रा, हेशबोन, एलाले, सबाम, नबो अनी बौन, 4यासना जो प्रदेश परमेश्वरनी इस्राएल लोकेसकडतीन नाश करेल व्हतं तो गुराढोरासकरता चांगलं शे अनी दासासकडे गुरेढोरे शेतस. 5त्या बोलनात, तुनी कृपादृष्टी तुना दाससवर व्हईते हाऊ प्रदेश तुना दाससले वतन करी दे; आमले यार्देन नदिना तथ नको लई जाऊ. 6गाद अनी रऊबेन यासना वंशासले मोशे बोलना, तुमना भाऊबंद लढाईले जातीन तवय तुम्हीन आठे बसी राहशात का? 7त्याप्रमानं जो देश परमेश्वरनी इस्राएल लोकेसले देयेल शे तठे उतरीसन जावानाबारामा तुम्हीन त्यासनं मन काबर निराश करी राहीनात? 8तुमना वडीलसले मी जवय कादेश बर्ण्यातीन तो देश दखाले धाडेल व्हतं तवय त्यासनीबी तशेच करं. 9त्यासनी जवय अष्कोल ओहळपान जाईसन देश दखं तवत परमेश्वरनी जो देश इस्राएल लोकेसले देयेल व्हतं तठे जावानं नही आशे त्यासना मनमा भरं. 10त्याच रोजले परमेश्वरना क्रोध भडकनं अनी त्यानी शपथ लिधी की, 11मिसर देशमाईन निघेल लोकेसमाईन वीस वरीसना अनं त्यानापेक्षा जास्त वयना ज्या शेतस त्यासना नजरमा, अब्राहाम. इसहाक अनी याकोब यासले जो देश मी देवानाबारामा शपथ लिधी व्हती तो दखावूत नही, कारण त्या माले पुर्णपण माले अनुसरनात नही; 12पण यफुन्नेना पोर्‍या कनिज्जी कालेब अनी नुनाना पोर्‍या यहोशवा ह्या त्या देशले दखतीन, कारण त्या परमेश्वरले पुर्णपने अनुसरीन वागेल शेतस; 13यामुये परमेश्वरनं कोप इस्राएलवर भडकनं अनी ज्यासनी परमेश्वरना नजरतीन दुष्कर्म करं त्यासनी बठी पिढी नष्ट व्हस तोपावत त्यानी त्यासले चाळीस वरीस जंगलमा सैरावैरा भटकाले लावं. 14आते दख, परमेश्वरना इस्राएलवर क्रोध आजुन भडकाले पाहिजे म्हणीसन आपला वडीलना जागवर त्यासनी पापनी संतती उठेल शे. 15तुम्हीन त्याले सोडीसन आजुन बहकशात त्या त्यासले आजून जंगलमा सोडी दि तुम्हीन या सर्वा लोकेसना नाश करशात. 16तवय त्या मोशेपान जाईसन बोलनात, आम्हीन आमना गुरं ढोरेसनाकरता आठे वाडा बांधसुत अनी आमना पोर्‍यासोर्‍यासकरता नगर बसाडसुत. 17आम्हीन स्वत: इस्त्राएल लोकसनापुढे जासुत अनी त्यासले त्यासना जागे पोहचाडसुत; पण आमना पोऱ्या या देशना रहिवाशीसना भितीमुये कोट बांधेल नगरमा राहतीन. 18इस्राएल लोकसले आपआपला वतन कायम भेटस नही तोपावोत आम्हीन घर परत येवाऊत नही. 19आम्हीन त्यासनासंगे यार्देनना तिकडे अनी त्यासनापुढे आमनं वतन करावूत नही. कारण यार्देनना इकडे पुर्वले आमना हिस्सा आमले भेटेल शे. 20तवय मोशेनी त्यासले सांगं, तर मंग अश करा; तुम्हीन युध्द कराकरता परमेश्वरनामोरे हत्यारबंद व्हा; 21अनी परमेश्वर आपला शत्रुसले आपलामोरेतीन हाकली देस तोपावोत यार्देननातिकडे तुमना बठा हत्यारबंद माणसेसनी परमेश्वरनामोरे चालानं. 22देश परमेश्वरना हातमा जावानंतर तुम्हीन परत या अनी हाई कारनतीन परमेश्वरनां अनी इस्राएल लोकेसना संबंधतीन तुम्हीन निर्दोष ठरशात अनी हाऊ देश परमेश्वरनी नजरतीन तुमनं वतन व्हई. 23तुम्हीन अश करावूत नही ते दखा; तुम्हीन परमेश्वरना अपराधी व्हशात, अनी हाई पक्का ध्यानमा ठेवा की तुमनं पाप तुमले भोवी. 24तर तुम्हीन आपल्या पोर्‍यासोर्‍यासकरता नगर बसाडा अनी आपल्या शेरडामेंढराकरता वाडा बांधा अनी तुमना तोंडमाईन जे निघेल शे त्याप्रमानं तुम्हीन करानं. 25तवय गादाना वंशज अनी रऊबेनना वंशज ह्या मोशेले बोलनात, प्रभुनी आज्ञाप्रमानं तुना दास करतीन. 26आमना पोरेसोरे, बाया, शेरडामेंढरा, गुरेढोरे गिलादना नगरमा राहातीन. 27पण स्वामीनी सांगाप्रमानं तुना बठा दास युध्दकरता हत्यारबंद व्हईसन परमेश्वरनामोरे युध्द कराले तिकडे जातीन. 28तवय मोशेनी त्याबारामा एलाजार याजक, नुनाना पोर्‍या यहोशवा अनी इस्राएल लोकेसना घरानासना प्रमुख माणुस याले आज्ञा करी की, 29गादी आनी रऊबेनी लोक लढाईकरता हत्यारबंद व्हईसन तुमनासंगे यार्देननातिकडे परमेश्वरनामोरे जातीन अनी तो देश तुमना ताबामा येई तवय तुम्हीन गिलाद देश त्यासले वतन करी देवानं. 30पण हया तुमनासंगे हत्यारबंद व्हईसन तिकडनीबाजुले नही गयात तर कनान देशमा त्यासले तुमनासंगे वतन भेटी. 31तवय गादी आनी रऊबेनी बोलनात, परमेश्वरनी आमले तुना दासले सांगं तशं आम्हीन करसूत. 32आम्हीन हत्यारबंद व्हईसन परमेश्वरनामोरे तिकडनीबाजुले कनान देशमा जावू, पण आमना वतन यार्देनना पुर्व दिशाले राहावाले पाहिजे. 33मंग मोशेनी गादी, रऊबेनी अनी योसेफना पोर्‍या मनश्शे याना आर्धा वंश यासले अमोर्‍यासना राजा सीहोन अनी बाशानना राजा ओग या दोनीसना राज्यमधला देश, नगर अनी त्यासनी आजुबाजुनी जागा दिधी. 34मंग गादयासनी दिबोन, अटारोथ, अरोएर, 35अटारोथ शोफान, याजेर, यागबहा, 36बेथ-निम्रा अनी बेथ हारान ह्या नगर तटबंदी करं; अनी शेरडामेंढरासकरता वाडा करात. 37रऊबेन्यानी हेशबोन, एलाले, किर्याथाईम, 38अनी मुळना नाब बदलीसन नबो, बालमौन अनी सिब्मा ह्या नगरे बसाडात; अनी त्यानी बसाडेल दुसरा नगरले येगयेगळा नाव दिधात. 39मनश्शेना पोर्‍या माखीर याना वंशनी जाईसन गिलाद प्रांत लिधात अनी तथे अमोरी माणसे राही राहींतात त्यासले घालाडी दिधं. 40तवय मोशेनी मनश्शेना पोर्‍या माखीर याना वंशजले गिलाद प्रांत दिधा, अनी त्या तठे राहावाले लागनात. 41अनी मनश्शेना पोर्‍या याईर यानी जाईसन गिलादमासला बराच नगर लिधात अनी त्यासले हव्वोथ-याईर हाई नाव दिधं. 42नोबह यानी जाईसन कनाथ अनी त्यासना आसपासना खेडा लिधात अनी त्यासले नोबह हाई आपलं नाव ठेवं.