गणना 33

मिसर ते मवाबपावतना प्रवास

1मोशे अनी अहरोन यासना नेतृत्वनाखाल इस्राएल लोकेसनी जी सेना मिसर देशमाईन बाहेर निंघनात त्यासना प्रवास यानाप्रमानं; 2परमेश्वरनी आज्ञातीन त्यासनी चाल करं त्याप्रमानं त्यासना प्रवास मोशेनी नोंदी लिधात त्या हया शेतस; 3पहिला महिनाना पंधरावा रोजले त्यासनी रामसेस आठेतीन चाल करं; वल्हाडणना दुसरा रोज इस्राएल लोक बठा मिसर लोकेसना देखत जयघोष करत बाहेर निंघनात; 4त्या येळले मिसरी लोक परमेश्वरनी मारेल आपला मोठा पोर्‍याले मुठमाती देत व्हतात; अनी परमेश्वरनी त्यासना देवनीसंगे त्यासले शिक्षा करी. 5इस्राएल लोकेसनी रामसेस आठेतीन चाल करीसन सुक्कोथ आठे डेरा दिधां. 6सुक्कोथ चाल करीसन जंगलना सीमापान एथाममा डेरा दिधां. 7एथामाहुन चाल करीसन बाल-सफोनसमोरले पी-हहीरोथ याले वळसा घालीसन मिगदोलनामोरे त्यासनी डेरा दिधां. 8मंग त्या पी-हहीरोथपाईन चाल करीसन समुद्र वलांडीसन जंगलमा गयात अनी एथाम जंगलमा तीन प्रवास करीसन मारा आठे डेरा दिधा. 9मारातीन चाल करीसन त्या एलीमले गयात; एलीम आठे पाणीना बारा झरा अनी सत्तर खजुरना झाडे व्हतात तठे त्यासनी डेरा दिधात. 10एलिममाईन निंघीसन त्यासनी तांबडा समुद्रपान डेरा दिधात. 11तांबडा समुद्रपाईन निंघीसन सीन जंगलमा त्यासनी डेरा दिधात. 12सीन जंगलमाईन चाल करीसनं त्यासनी दफका आठे डेरा दिदात. 13दफका आठेतीन त्यासनी चाल करीसन आलुश आठे डेरा दिधात. 14आलुशमाईन चाल करीसन त्यासनी रफीदिमा डेरा दिधात. तठे लोकेसले पाणी पेवाले भेटनं नही. 15रफीदिमाईन चाल करीसन त्यासनी सीनाय जंगलमा डेरा दिधा. 16सीनाय जंगलमाईन चाल करीसन त्यासनी किब्रोथ-हत्तवा आठे डेरा दिधात. 17किब्रोथ-हत्तवा आठेतीन चाल करीसन हसेरोथ आठे त्यासनी डेरा दिधात. 18हसेरोथ आठेतीन निंघीसन रिथमा आठे त्यासनी डेरा दिधात. 19रिथमा आठेतीन चाल करीसन त्यासनी रिम्मोन-पेरेस दिधात. 20रिम्मोन-पेरेसमाईन चाल करीसन त्यासनी लिब्ना आठे डेरा दिधा. 21लिब्ना आठेतीन चाल करीसनं त्यासनी रिस्सा आठे डेरा दिधा. 22रिस्सा आठेतीन चाल करीसन त्यासनी कहेलाथा आठे डेरा दिधा. 23कहेलाथातीन चाल करीसन त्यासनी शेफेर डोंगरजोडे डेरा दिधा. 24शेफेर डोंगरपाईन चाल करीसन त्यासनी हरादात डेरा दिधा. 25हरादा आठेन चाल करीसन त्यासनी मकहेलोथ आठे डेरा दिधा. 26मकहेलोथापाईन चाल करीसन तहथमा त्यासनी डेरा दिधा. 27तहथपाईन चाल करीसन तारहतमा त्यासनी डेरा दिधा. 28तारहतमाईन चाल करीसन मिथकामा त्यासनी डेरा दिधा. 29मिथकामाईन चाल करीसन हशमोनमा त्यासनी डेरा दिधा. 30हशमोनमाईन चाल करीसन मोसेरोथमा त्यासनी डेरा दिधा. 31मोसेरोथमाईन चाल करीसन बनेयाकानमा त्यासनी डेरा दिधा. 32बनेयाकानमाईन चाल करीसन होर-हागिदगादमा त्यासनी डेरा दिधा. 33होर-हागिदगादमाईन चाल करीसन याटबाथमा त्यासनी डेरा दिधा. 34याटबाथा आठेन चाल करीसन अब्रोनमा त्यासनी डेरा दिधा. 35अब्रोनमाईन चाल करीसन एसयोन-गेबेरमा त्यासनी डेरा दिधा. 36एसयोन-गेबेरामाईन चाल करीसन सिनाय रान म्हणजे कादेश आठे त्यासनी डेरा दिधा. 37कादेशमाईन चाल करीसन अदोम देशना सीमावरना होर पर्वतनाजोडे त्यासनी डेरा दिधा. 38इस्राएल लोक मिसर देशमाईन येवानंतर चाळीसावा वरीसना पाचवा महिनाना पहिला रोजले हाई ठिकानले अहरोन याजक परमेश्वरनी आज्ञाप्रमानं होर पर्वतवर चढना अनी तठे मरण पावना. 39अहरोन होर पर्वतवार मरना तवय एकशे तेवीस वरीसना व्हता. 40अरादना कनानी राजा जो कनान देशना दक्षिणले राही राहिंता त्यानी इस्राएल लोक ऊनात अशी बातमी ऐकी. 41होर पर्वतपाईन चाल करीसन त्यासनी सलमोनमा डेरा दिधा. 42सलमोनमाईन चाल करीसन पुनोन आठे त्यासनी डेरा दिधा. 43पुनोन माईन चाल करीसन त्यासनी ओबोथ आठे डेरा दिधा. 44ओबोथ माईन चाल करीसन मवाबना सीमापान ईये-अबारीममा त्यासनी डेरा दिधा. 45मंग ईयीममाईन चाल करीसन दिबोन-गाद आठे त्यासनी डेरा दिधा. 46दिबोन-गाद माईन चाल करीसन अलमोन-दिबलाथाईम आठे डेरा दिधा. 47अलमोन-दिबलाथाईम आठे चाल करीसन नबोसमोरना अबारीम डोंगरमा त्यासनी डेरा दिधा. 48अबारीम डोंगरपाईन चाल करीसन मवाबना जंगलमा यरीहोननाजोडे यार्देनना काठले त्यासनी डेरा दिधा. 49मवाबना जंगलमा यार्देनना काठले बेथ-यशिमोथपाईन आबेल-शिटिटमपावत त्यासनी डेरा दिधा.

कनान देशवर हामला करानी सूचना

50मवाबना मैदानमा यरीहोनाजोडे यार्देनना काठले परमेश्वर मोशेले बोलना, 51इस्राएल लोकेसले सांगं की तुम्हीन यार्देन वलांडीसन कनान देशमा जाशात. 52तवय त्या देशना बठा रहिवाशीसले तुमना समोरतीन काढी देवानं; त्यासना दगडीसना मुरत्या अनी ओतीव मुरत्या यासना नाश करानं; अनी त्यासना उंच स्थान मोडी टाका; 53तुम्हीन तो देश ताबामा लिसन त्यामा ऱ्हावानं; कारण तुम्हीन त्या देशना वतनदार व्हवाले पाहीजे म्हणीसन मी तो देश तुमले देल शे. 54तुम्हीन तो देश चिठया टाकीसन आप आपला कुळप्रमानं वाटी ल्या; ज्या कुळ मोठा व्हतीन त्यासले मोठा भाग देवानं अनी ज्या धाकला व्हतीन त्यासले धाकला भाग देवानं; ज्या जागाना बारामा जो माणुसना नावनी चिठ्ठी निंघी ते त्यानं वतन व्हई; आप आपला वाडवडीलसना कुळप्रमानं तुमले वतन भेटाले पाहिजे; 55पण तुम्हीन त्या देशना रहिवाश्यासले तुमना समोरतीन काढी देवानं जर तुम्हीन त्या लोकसले तठे ऱ्हाऊ दिशात तर तुमना डोळामा कुसळनासारखा अनी तुमनी कुशीले काटयासनासारखा टोचतीन, अनी त्या देशमा तुम्हीन राहशात तठे त्या तुमले त्रास देतीन. 56तश व्हयनं तर मी जश त्यासना करानं ठरायेल शे तशेच तुमनं करसू.