गणना 31

मिद्यानी लोकसविरूध्दल लढाई

1परमेश्वर मोशेले बोलना, 2इस्राएल लोकेसना बाजूतीन मिदयानीसना बदला ले; त्यानंतर तु पुर्वजसले जाई भेटशी. 3मोशे लोकेसले बोलना, लढाई कराकरता तुमनामाईन माणसासले तयार करा म्हणजे त्या मिदयानीसवर चढाई करीसन परमेश्वरना बाजुतीन मिदयानीसना सुड लेतीन. 4इस्राएलना बठा वंशमाईन प्रतेक वंशनामांगे एक एक हजार माणसे लढाईले धाडा. 5हाई प्रकारं इस्राएलना सहस्रवधी लोकेसमाईन प्रतेक वंशनामांगे एक एक हजार माणसासले सादर करं म्हणजे बारा हजार माणसासनी लढाईकरता सशस्र धारण करं. 6मोशेनी एक एक वंशमधला हजार माणसे लिसन एलाजार याजकना पोर्‍या फिनहास यासले त्यानासंगे लढाईले धाडं अनी पवित्रस्थानमधला पात्र अनी इशारा देवाकरता रणशिंग त्यासनी हातमा लिधात. 7परमेश्वरनी मोशेले आज्ञा कराप्रमानं त्यासनी मिद्यानीसनी लढाई करीसन सर्वा पुरूषसनी कत्तल करी टाकं. 8बाकीना योद्याशिवाय त्यासनी अवी, रेकम, सूर, हूर अनी रेबा या नावसना मिदयानी पाच राजासना वध करात; बौरना पोर्‍या बलाम यालेबी तलवारघाई मारी टाकं. 9अनी इस्राएल लोकेसनी मिदयानी बाया अनी पोरेसोरे यासना पाडाव करात अनी त्यासना गायीबैल, शेरडामेंढरा अनी बठी मालमत्ता लुटी लिधात; 10अनी त्यासनी वस्तीना बठा गाव अनी छावन्या जाई टाक्यात. 11अनी बठा पाडाव करेल माणसे अनी जनावर, बठी लुटी लिधात. 12यरीहोनाजोडे यार्देनना काठनाजोडे मवाबासना मैदानना छावणीमा मोशे, एलाजार याजक अनी इस्राएल लोकेसनी मंडळी व्हती तठे त्यासनी त्या बंदीवान, धरेल पशु अनी लुट हाई लई वनात.

सैन्य परत वनात

13तवय मोशे, एलाजार याजक अनी मंडळीना बठा सरदार त्यासले छावनीना बाहेर सामोरे गयात. 14ज्या सहस्रपती, शतपती या बठा सेनापती युध्द करीसन परत येयल व्हतात त्यासनावर मोशे भलताच रागवना. 15तो त्यासले बोलना तुम्हीन बठया बाया जिवत सोडात का? 16दखा बलामना सल्लातीन या बाईसनी पौरना बाबत परमेश्वरना ईश्वासघात करा व्हता, त्यामुये परमेश्वरना मंडळीमा मरीनी साथ पसरनी व्हती. 17तर आते पोर्‍यासोर्‍यासमाईन प्रत्येक पोर्‍या अनी जिनी परुषनासंगे समागम करेल शे आशी प्रत्येक बाईले मारी टाका. 18जेवढया पोरीसनी पुरुषसनीसंगे समागम करेल नही शे त्या बठयासले आपलाकरता जिवंत राखी ठेवानं. 19तुम्हीन बठा छावनीनाबाहेर राहावानं, अनी तुमनामाईन ज्यानी एखादाले मार व्हई अनी मारेलले कोनी हात लायेल व्हई त्या बठासनी आपल्या बंदिवानसले तिसर्‍या अनी सातव्या रोजले सोताले शुध्द करानं. 20बठा कपडा, चामडासना बठया वस्तु, बकऱ्यासना केससना बठ्या वस्तु अनं सर्वा लाकडसना सामान शुध्द करानं. 21मंग एलाजार याजकनी लढाईले जायेल बठा सैनिकसले सांगं की परमेश्वरनी मोशेले आज्ञा देयेल प्रमानं नियमशास्रना विधी हाई शे; 22सोना, चांदी, पितळ, लोखंड, कथील, कांच वगैरे. 23ज्याबी आगमा टाकासारखा व्हतीन त्या आगमा टाकीसन काढं म्हणजे शुध्द व्हई, तरीबी अशुध्दता दुर करानं पाणीघाई शुध्द करानं; का काई आगमा टाकासारखं नही व्हई ते पाणीमा घालीसन काढी लेवानं. 24सातवा रोजले तुम्हीन आपला कपडा धई काढानं अनी शुध्द व्हयीसन छावनीमा येवानं.

लुटनी विभागणी

25परमेश्वर मोशेले बोलना, 26एलाजार याजक अनी मंडळीमधला येगयेगळा पुर्वजसना घरानासना मुख्य यासले संगे लिसन माणुस अनी पशु यासनी जी लुट आणेल शे तिनी गणना कर; 27त्यानी त्या लुटीसना दोन भाग करानं, लढाईला जायेल योध्दयासले आर्धा भाग अनी दुसरा भाग बठी मंडळीले देवानं. 28लढाईले जायेल योध्यासना हिस्सामाईन माणसे, गाय बैल, गाढवं अनं शेरडामेंढरा यासमाईन पाचशेनामांगे एक आशे परमेश्वरकरता करभाग म्हणीसनं लेय. 29त्याना आर्धा हिस्सामाईन तो लिसन परमेश्वरकरता समर्पित अंश म्हणीसन एलाजार याजकले दे; 30मंग इस्राएल लोकेसले भेटेल आर्धा हिस्सामाईन माणसे, गायी बैल, गाढवं, शेरडामेंढरा यासमाईन बठा पशु पन्नासनामांगे एक लिसन परमेश्वरना निवासमंडपना रक्षक ज्या लेवी शेतस त्यासले दे; 31परमेश्वरनी आज्ञाप्रमानं मोशे अनी एलाजार याजक यासनी करं. 32सैन्यमाधला शिपाईसनी‍ ज्या वस्तु लुटी लिध्यात त्यानाशिवाय सहा लाख पंचाहत्तर हजार शेरडामेंढरा, 33बहात्तर हजार गाय बैल, 34एकसष्ट हजार गदडा, 35अनी माणससमाईन ज्यासनी पुरुष दखं नही आशा बत्तीस हजार बाया एवढी ती लुट व्हती. 36लढाईले जायेल व्हतात त्यासना वाटाले हाई लुटना आर्धा हिस्सा ऊना त्यामा तीन लाख सदतीस हजार पाचशे शेरडामेंढरा व्हतात. 37त्यामाईन परमेश्वरना कर म्हणीसन सहाशे पंच्याहत्तर‍ व्हती. 38गायबैल छत्तीस हजार राहीसन त्यानामाईन बहात्तर हाई परमेश्वरना कर व्हतात. 39गदडा तीस हजार पाचशे राहीसन त्यामाईन परमेश्वरना करभाग म्हणीसन एकसष्ट व्हतात. 40माणसे सोळा हजार राहीसन त्यामाईन परमेश्वरना कर म्हणीसन बत्तीस व्हतात. 41परमेश्वरकरता समर्पित अंश म्हणीसन जो करभाग तो परमेश्वरनी आज्ञा देयेल प्रमानं मोशेनी एलाजार याजकले दिधं. 42लढाई करनारा शिवाय बाकीना इस्राएल लोकेसना आर्धा हिस्सा मोशेनी काढेल व्हतं ते हाई शे; 43तीन लाख सदतीस हजार पाचशे शेरडामेंढरा, 44छत्तीस हजार गायबैल, 45तीस हजार पाचशे गदडा, 46सोळा हजार लोकं, 47योध्दासना हिस्सामाईन येगळा करीसन मोशेनी इतर मंडळीकरता ठेयेल व्हतं त्या आर्धा हिस्सामाईन मोशेनी माणुस अनी पशु पन्नासनामांगे एक लिसन परमेश्वरना निवासमंपडना रक्षक ज्या लेवी शेतस त्यासले दिधं. 48मंग इस्राएलना सैनिकसवर नेमेल सेनापती म्हणजे सहस्रपति, शतपती मोशेकडे वनात. 49ज्या सैनिक आमना स्वाधीन व्हतात त्यासनी तुना दाससनी गणना करी; त्यामाईन कोणीच कमी व्हयनात नही. 50म्हणीसन आमले बठासले जे सोनानं दागिना भेटेल शेतस, म्हणजे तोडे, कडी आंगठया, कुंडल्या अनी बाजुबंद ह्या बठा आम्हीन आमना जीवनाकरता परमेश्वरले प्रायश्चित म्हणीसन अर्पण कराले आणेल शेतस. 51तवय मोशे अनी एलाजार याजक यासनी त्यासकडतीन त्या सोना अनी बठा नक्षीदार दागिना लिधात. 52सहस्रपति अनी शतपती यासनी जे सोनं परमेश्वरले अर्पण करं ते बठ सोळा हजार सातशे पन्नास शेकेल1 भरनात. 53या योध्दयासनी आप आपलाकरता हाई लुट मिळाडी व्हती. 54मोशे अनी एलाजार याजक यासनी हाई सोनं सहस्रपति अनी शतपती यासकडतीन लिसन इस्राएल लोकेसकरता परमेश्वरनामोरे स्मारक व्हवाले पाहिजे म्हणीसन दर्शनमंडपामा ठेयं.