गणना 30

नवसना बद्दल नियम

1मंग मोशेनी इस्राएल लोकेसना वंशमधला प्रमुखले सांगं की, परमेश्वरनी आज्ञा दिधी ती आशी: 2एखादा माणुसनी परमेश्वरले नवस करं नाहिते शपथ लिसन सोताले एखादा वचनमा बांधी ली तर त्यानी आपला वचननं भंग करानं नही, जेबी त्यासना तोंडमाईन निंघेल व्हई त्याप्रमानं त्यानी करानं. 3त्याप्रमानं एखादी बाई कुवारीपणमा तिना बापना घर राहस तवय परमेश्वरले नवस करीसन वचन देयल व्हई. 4अनी तिनं नवस अनी ज्या वचनघाई ती वचनबध्द व्हयनी ते वचन ऐकीसन तिना वडील नही बोलेल व्हई तर तिना बठा नवस कायम व्हतीन अनी ज्या वचनघाई तिने सोताले वचनबध्द करं व्हई तेबी कायम राही; 5पण ते ऐकीसन तिना वडील तिले ईरोध करी तर तिनं नवस नाहिते जेबी बंधनमा तिनी सोताले बध्द करं व्हई त्यानामाईन कोनतेबी कायमनं व्हवाऊ नही. तिना वडीलनी तिले ईरोध करेल शे म्हनीसनं परमेश्वर तिले माफ करी. 6तिनी नवस करानंतर नाहिते ती अविचारतीन एकनिष्ठ व्हयनी व्हई तर ती पतीनी व्हई, 7अनी ते ऐकीसन तिना पती काही बोलना नही तर तिना नवस कायम राही अनी ज्या बंधनमा तिनी सोताले बध्द करेल व्हई तेबी कायम राही. 8पण तिना पतीनी ते ऐकेल व्हई त्या रोज तिले ईरोध करेल व्हई तर तिनी करेल नवस अनी तिना अविचारतीन ज्या वचनासघाई सोताले बध्द करेल व्हई तर त्या वचन रद्द् व्हतीन; तर परमेश्वर त्या बाईना पापनी क्षमा करी. 9विधवासनी नाहीते काडीमोडी व्हयेल बाईनी एखादं नवस करं तर तिनी ज्या वचनसमा सोताले बांधेल व्हई ती कायम राहातीन. 10एखादी बाई आपला नवराना घर राहीसन नवस करी नाहीते शपथ लिसन सोताले बांधी ली, 11अनी तिना नवरा ते ऐकीसन काही बोलावू नही अनी तिना विरोध करावू नही, तर तिना बठा नवस कायम राहातीन, अनी ज्या बंधनघाई तिनी सोताले बांधेल व्हई तर त्या बंधनबी काय राहातीन. 12पण नवरानी ते ऐकं अनी त्या रोजच नही म्हणी दिधं तर तिना तोंडघाई जे नवस नाहीते तिले बांधी टाकनारा वचन निघेल व्हतीन त्या रद्द व्हतीन; तिना नवरानी त्या रद्द करामुये परमेश्वरनी तिले क्षमा करं. 13तिना कोनतेबी नवस अनी तिले त्रास देनारा कोणतेबी व्रत तिना नवराले वाटी ते कायम करी अनी रद्द करी. 14एक एक दिवस जास तवय तिना नवरा तिले काही बोलावू नही तर तो तिना बठा नवस अनी ज्या बंधनघाई तिनी सोताले बांधेल व्हई ती तो कायम करस; ती ऐकी त्यारोजच तो काही बोलावू नही, यावरतीन त्यानी ते नवस कायम करेल शेतस अश समजानं. 15पण त्यानी ऐका नंतर ती रद्द करं तर त्या बाईनी अपराधनी शिक्षा तिना नवराले भोगनं पडी. 16नवरा बायकोना संबंधना अनी बाप अनं त्यानी घरमा राहानारी त्यानी कुवारी पोर यानाबारामा ज्या विधीनाविषयमा परमेश्वरनी मोशेले आज्ञा दिधी त्या हया शेतस.