गणना 21

कनानी लोकसना हल्ला

1दक्षिण देशमा राहनारा अरादना कनानी राजा यानी ऐकं की अथारीमना वाटकडतीन इस्राएल लोके येई राहीना शेतस, तवय त्यासनी त्यासनासंगे युध्द करीसनं बराच जणसले कैद करं. 2तवय इस्राएलसनी परमेश्वरनाजोडे आशे नवस करं की तु खरच या माणसासले मना ताबामा देसीते मी त्यासना नगरंसना सर्वा नाश करसु. 3इस्राएल लोकेसनं हाई म्हणनं ऐकीसन परमेश्वरनी कनानी लोकेसले त्यासना हातमा दिधं अनी त्यासनी त्यासना अनी त्यासना नगरनं सर्वा नाश करी टाका; त्यामुये त्या जागानं नाव हर्मा1 आशे पडनं.

पितळना साप

4मंग होर डोंगरपाईन चाल करीसन अदोम देशले वळसा घालीसनं जावाले पाहिजे म्हणीसन त्यासनी तांबडा समुद्रनी वाट धरी; त्या वाटमुये लोकेसनं मन भलतं व्याकूळ व्हयना. 5त्या परमेश्वरना विरोधमां अनी मोशाना विरोधमा बोलाले लागनात, तुम्हीन आमले मिसर देशमाईन काढीसनं हाई जंगलमा माराले आणेल शेतस का? आठे खावाले अन्नबी नही शे अनी पाणीबी नही, हाई हालका जेवनले जीव कटाळी ऊठेल शे. 6तवय परमेश्वरनी त्या माणससमा आग्या साप धाडं, त्यासनी दंश करामुये इस्राएलमाधला बराच लोक मरी गयात. 7तवय लोके मोशेकडे ईसनं बोलनात, परमेश्वरना विरोधमां अनी तुनाविरोधमा बोलनुत हाई पाप आम्हीन करेल शेतस तर हाई साप आमनापाईन दुर कराकरता परमेश्वरले प्रार्थना कर तवय मोशेनी लोकेसकरता प्रार्थना करी. 8परमेश्वर मोशेले बोलना, आग्या सापनी एक मुर्ती करीसनं झेंडाना खांबवर टांग, म्हणजे सापनं दंश व्हयेलसनी त्याकडे दखं म्हणजे त्या जगतीन. 9मंग मोशेनी पितळनं एक साप बनाडीसनं झेंडाले टांगं, तवय सापनं दंश व्हयेलसनी कोणी पितळना सापकडे दखं म्हणजे तो जगे.

होरमाईन मवाबले प्रवास

10मंग इस्राएल लोकेसनी चाल करीसनं ओबोथ आठे तळ दिधं. 11ओबथमाईन चाल करीसनं उगवतीले मवाबना मोरेतीन जंगलमां ईये-अबारीम खंड आठे त्यासनी तळ दिधं. 12तठेतीन चाल करीसनं त्यासनी जेरेद खोरामा तळ दिधं. 13तठेतुन निघीसनं त्यासनी जंगलमाईन वाहनारी, अमोरासना देशमाईन निघेल जी आर्णोन नदी तिनं किनाराले तळ दिधं; हाई अर्नोन नदी मवाबी अनी अमोरी यासना देशमाईन मवाब देशना सरहद्दमां शे. 14यामुये परमेश्वरनं संग्राम नावनं ग्रंथमा याप्रमानं लिखेल शे: सुफातला वाहेब, अनी आर्णोननं खोरी, 15अनी त्या खोरानी उतरण आर आठेतीन वस्तीपावोत मवाबना सरहद पावोत जासं. 16तठेतीन चाल करीसनं त्या बैर आठे गयात; जी विहिरना बारामा परमेश्वरनी मोशेले सांगं व्हतं लोकेसले एकजागे कर म्हणजे मी त्यासले पानी दिसूं तीच हाई विहिर शे. 17त्या येळले इस्राएलनी हाई गाणं म्हनं: हाई विहिर; उसळीसनं ये; तुम्हीन स्तुतीस्तोत्र म्हणानं: 18सरदारसनी हाई विहिर खंदी, इस्राएलमाधला‍ मोठा लोकेसनी त्यासना सोटयासघाई अनी काठयासघाई हाई खंदी. मंग त्या जंगलमा मत्तनाले गयात; 19अनी मत्तनामाईन नाहालीयेलसले अनी नाहालीयेलामाईन बामोथानले गयात; 20अनी बामोथामाईन चाल करीसनं मवाबना मैदाननां खोरापावोत अनी जंगलना मोरेतीन पिसगना माथावर त्या गयात.

सीहोन अनी ओग राजासनं पराभव

(अनुवाद 2:26-37)

21मंग इस्राएलसनी अमोरासना राजा सीहोन याले जासुदना हातमा सांगी धाडं, 22आमले तुना देशमाईन जाऊ दे, आम्हीन बाजुले वळीसन तुमना कोनता बी वावरमा अनी द्राक्षना मळामा पाय टाकाऊत नही अनी विहिरनं पाणी पेवावुत नही, अनी तुना देशमाईन निंघतस तोपावोत आम्हीन फक्त राजमार्गतीन जासुत; 23पण सीहोननी इस्राएलले आपला देशमाईन जाऊ दिधं नही; आपला सर्वा सैन्य जमा करीसन इस्राएलना संगे लढा करता बाहेर निंघीसन तो जंगलमा ऊना; त्यानी याहस आठे ईसन त्यासनासंगे लढाई करी. 24तवय इस्राएलनी त्यानावर तलवार चालाडी अनी आर्णोनपाईन अम्मोनी लोकसनी सरहद्दपावत यब्बोक नदी आठेपावत त्यासना देश काबीज करं; पण अम्मोनी लोकसनी सरहद्दपावत मजबुत व्हती. 25या प्रमानं इस्राएलसनी अमोर्‍यासना बठा शहरे लि टाकात अनी त्या हेशबोनमा अनी आजुबाजूना नगरमा वस्ती करीसन राहीनात. 26हेशबोन हाऊ अमोर्‍यासना राजा सीहोन यानं नगर व्हतं; त्यानी मवाबना आगोदर राजानासंगे लढाई करीसन आर्णोनपावोत त्यासना सर्वा देश त्यासना हातमाईन हिसकी लेल व्हतं. 27यावरतीन कवी गातस की; हेशबोनले या; सीहोननं नगर बसाडा; त्यानी स्थापना करा; 28कारण हेशबोन माईन आग निघेल शे, सीहोनना नगरमाईन आग निंघेल शे; तिनी मवाबना आर, अनी आर्णोनना गढयासना स्वामी भस्म करी टाकेल शेतस. 29हे मवाब! तू हाय-हाय करसी; कमोशनी प्रजा, तुम्हीन नष्ट व्हयनात, त्यानी आपला पळपुटया पोर्‍या अनी पोर अमोर्‍यासना राजा सीहोन यासना बंदीमा पडु देल शेतस. 30आम्हीन त्यासले खाल पाडेल शे; दीबोनपावोत हेशबोनना नाश व्हयेल शे, अनी नोफापाईन, मेदबापावोत बठा देश आम्हीन उजाड करेल शे. 31याप्रमानं इस्राएल लोक अमोर्‍यासना देशमा वस्ती करीसन राहिनात. 32मंग मोशेनी याजेर नगरना भेद काढाकरता जासुद धाडं; इस्राएलनी त्याना आजुबाजूना गाव ताबामा लिसन तठला अमोर्‍यासले देशमाईन हाकली दिधं. 33मंग तठेतीन वळीसन त्या बाशानना वाटतीन जावाले लागनात, तवय बाशानना राजा ओग हाऊ त्यासनासंगे लढाई करी, त्यानी आपला सर्वा लोकेसले लिसन एद्रई आठे युध्द कराले उभा राहीना. 34तवय परमेश्वरनी मोशेले सांगं, त्यासले घाबरू नको, मी त्याना सर्वा लोक अनी त्याना देश तुना हातमा देल शे; हेशबोनमा राहनारा अमोऱ्यासना राजा सीहोन यानं जश तू करं तशे यानं बी कर. 35त्यासनी त्याले, त्याना पोर्‍यासले अनी सर्वा लोकेसले अशं मारं की, त्याना कोनीच ऊरनात नही अनी त्यासनी त्याना देश काबीज करं.