गणना 19

शुध्दीकरननी पध्दत

1परमेश्वरनी मोशे अनी अहरोन यासले सांगं, 2परमेश्वरनी देयेल नियमशास्त्रनं विधी हाऊ: इस्राएल लोकेसले सांग जिले काही व्यंग अनी दोष नही शे अनी जिनावर आजुनपावोत जु ठेयेल नही शे आशे एक लाल रंगनं गाय मनाकडे लई येवानं; 3ती एलाजार याजकडे देवानं; त्यानी तिले छावनीनाबाहेर लई जावानं अनी कोणीतरी त्यानामोरे तिना बलिदान करानं. 4मंग एलाजार याजकनी आपला बोटले तिनं थोडसं रंगत लाईसनं ते सात येळा दर्शनमंडपना मोरेनां दिशाले शितडानं. 5अनी त्यानामोरे ते गायनं कातडं, मास, रंगत अनी शेण हाई कोणीतरी चेटाडी देवानं. 6मंग याजकनी गंधसरुनं लाकूड, एजोब अनी किरमिजी रंगनं हाई लईसनं गाय जळत व्हई त्या आगमां टाकानं. 7मंग याजकनी आपला कपडा धोईसनं पानीघाई आपला आंग धवानं अनी छावनीमां येवानं; पण संध्याकायले त्यानी अशुध्दसं राहावानं. 8त्याप्रमानं ज्या माणसासनी ती गायले चेटाडं व्हयी त्यानी पानीघाई आपला कपडा अनी आंग धवानं अनी संध्याकायपावोत अशुध्दसं राहावानं. 9मंग शुध्द व्हई आशे एखादा माणुसनी ती गायनी राख जमा करीसनं छावनीनाबाहेर‍ स्वच्छ जागवर ठेवानं; हाई राख इस्राएल लोकेसले वापराकरता अशुध्दतापाईन सुटका भेटानं पानीकरता ठेवानं; हाई राख पापबली शे. 10जो माणुस ती गायनी राख जमा करी त्यानी आपला कपडा धोईसनं संध्याकायपावोत अशुध्द राहावानं; इस्राएल लोके अनी त्यासमां राहानारा परदेशी यासनीबारामां हाई कायमनं विधी शे.

मृतदेहले हात लावावर व्हनारी अशुध्दता

11एखादा माणुसनं प्रेतले कोनी हात लावं तर‍ त्यानी सात दिवस अशुध्दसं राहावानं. 12आशा माणुसनी तिसरा रोजले ते पानीघाई आपला अशुध्दता दुर करानं अनी सातवा रोजले शुध्द व्हई जावानं; तरिबी तिसरा रोजले जर त्यानी अशुध्दता दुर करी नही तर सातवा रोजले तो शुध्द व्हावाऊ नही. 13कोनी मरेल माणुसनं प्रेतले हात लावानंतर आपली अशुध्दता दुर करी नही तर तो परमेश्वरना निवासमंडप भ्रष्ट करनारा व्हई; आशा माणुसनं इस्राएल लोकेसमाईन नाश व्हावाले पाहिजे; अशुध्दता दुर करानं पानी त्यानावर शितडं नही त्यामुये तो अशुध्द शे; त्यानामां अशुध्दता आजुन तशेच शे. 14एखादा माणुस डेरामा मरना व्हई त्यानाबारामा हाई नियम शे; जो त्या डेरामा जाई नाहिते त्यानामा राहात व्हई त्यानी सात रोज अशुध्दस राहावानं. 15तशेच झाकनं नही व्हई आशे उघडं भांड तठे व्हई तर त्या बठा अशुध्द समजानं. 16उघडा मैदानमा तलवारघाई मरी व्हयेल प्रेतले, माणुसनं हाडले किंवा कबरले कोणी हात लावं तर त्यानी सात रोज अशुध्द राहावानं. 17अशुध्द व्हयेल शेतस त्यासनी जाळेल पापबलीनी राख लिसन भांडामा लेवानं अनी तिनावर झरानं पाणी वतानं. 18अनी ज्या शुध्द व्हयेल माणसासनी एजोबनी जुडी लिसन पाणीमा भिजाडान अनी ते पाणी त्यानी त्या डेरावर अनी डेरामासला सर्वा भांडा अनी माणसेवर शितडानं; तशेच ज्यानी हाडले, मारेल प्रेतले, नाहिते कबरले हात लाया व्हई त्यानावरबी ते शितडानं. 19ज्या माणसे शुध्द शेतस त्यासनी अशुध्द माणससवर तिसरा रोजले अनी सातवा रोजले ते शितडानं; सातवा रोजले त्यासले शुध्द करानं; त्यानी आपला कपडा धोईसन आपला आंग पाणीघाई धवानं; तो संध्याकायले शुध्द व्हई. 20तरी कोणी अशुध्द व्हयेल व्हयी अनी तो शुध्द व्हावाऊ नहीते तर तो पवित्रस्थान भ्रष्ट करनारा शे; त्याकरता त्याना मंडळीमाईन नाश व्हावाले पाहिजे; अशुध्द दुर करानं पानी त्यानावर शितड नहीते तो अशुध्दच शे. 21त्यानाबारामा हाई नियम कायमनं शे; अशुध्द दुर करानं पाणी जो शितडी त्यानी आपला कपडा धई टाकानं, अनी जो ते अशुध्द दुर करानं पाणीले हात लाई त्यानी संध्याकाय पावोत अशुध्द राहावानं. 22ज्याले तो अशुध्द माणुस हात लाई ते अशुध्द व्हई, अनी जो कोनी त्या वस्तुले हात लाई त्यानी संध्याकाय पावोत अशुध्द राहावानं.