गणना 18

याजक अनी लेवी यासनं कर्तव्य

1परमेश्वरनी अहरोनले सांगं, पवित्रस्थानना बारामां एखादं अधर्म व्हयनं त्यानं दोष तुनावर अनी तुना पोर्‍यासवर. वाडवडील यासनावर; त्याप्रमानं याजकनीबारामां एखादं अधर्म व्हयनं तर तो दोष तुनावर अनी तुना पोर्‍यासवर. 2लेवी कुळनं म्हणजे तुना मुळपुरुषना कुळमाधला ज्या तुना भाऊबंद शेतस त्या तुनासंगे येईसन तुनी सेवा करानी; त्याकरता त्यासले मनाजोडे लई ये पण आज्ञापटना तंबुनामोरे तु अनी तुना पोर्‍यासनीच राहावानं. 3तुले जे काही सोपाडेल शे त्यानं अनी सर्वा तंबूना रक्षण त्यासनी करानं; पण पवित्रस्थाननं भांडापान अनी वेदीनाजोडे त्यासनी येवानं नही, ऊना ते त्या अनी तुम्हीनबी मरशात. 4त्यासनी तुनासंगे मिळीसनं दर्शनमंडपमां बठ्या सेवासनी वस्तुसनी राखन करानं; पण दुसरासनी तुनाजोडे येवानं नही. 5पवित्रस्थान अनी वेदी यासनी राखन तुम्हीनच करानी म्हणजे इस्राएल लोकेसवर परत कोप येवाऊ नही. 6मी स्वतः तुमना लेवी भाऊबंदसले इस्राएल लोकेसमाईन निवाडी लयेल शे अनी दर्शनमंडपनी सेवा कराकरता परमेश्वरले त्या वाहेल शेतस अनी मी तुमले ते दान मनीसनं देयेल शेतस; 7पण वेदीना अनी आंतरपटना मजारमा जे काही शे त्यानाकरता त्या अनी तुना पोर्‍या यासनी आपला याजकपण सांभाळानं; तुम्हीन सेवा करानी, कारण मी याजकपण हाई तुमले सेवादान मनीसनं देयेल शे; कोणी दुसरा जोडे ऊना तर त्याले मारी टाकानं;

याजकसना वाटा

8परमेश्वरनी अहरोनले सांगं, दख, माले करेल अर्पणमाईन जे भाग काढी ठेवतसं तो म्हणजे इस्राएल लोकेसनं पवित्र करेल वस्तु तुले अनी तुनं वंशजसना वाटा मनीसनं देयेल शेतस; ते तुमनं कायमनं हक्क शे. 9ज्या अतिपवित्र वस्तुसना आगमा होम करानं नही शे त्यासमाईन तुना अनी या इस्राएल लोकेसना अर्पणमाईन बठा अन्नर्पण, पापर्पण अनी बठा दोषर्पण ज्या ते माले अर्पण करतीन त्या तुन्या अनी तुन्या पोर्‍यासकरता अतिपवित्र शेतस. 10त्या वस्तु पवित्र समजीसनं खावानं; तुमनामाईन प्रत्येक माणुसनी ते खावानं: त्या तुले पवित्र शेतस. 11तशाच पुढल्या वस्तुबी तुन्याच शेतस; इस्राएल लोकेसना अर्पणमाधला ज्या समर्पित शेतस अनी अर्पण करेल अश त्या सर्वा तुले, तुना पोर्‍यासले अनी तुन्या पोरीसले कायमनं हक्क म्हणीसनं देस; तुना घरानामाधला ज्या शुध्द व्हतीन त्यासनी ते खावानं. 12सर्वा उत्तम तेल, उत्तम नवा द्राक्षरस अनी गहु यासना पहिलां पिक लोके परमेश्वरले अर्पण करतीन ते मी तुमले देयेल शे. 13त्या आपला देशमाईन कशेबी पहिलं पिक परमेश्वरकरता आणतीन ते तुनं शे. तुना घरानामा ज्या शुध्द व्हतीन त्यासनी ते खावानं. 14इस्राएल लोकेसनी देवले वाहेल बठया वस्तु तुन्या शेतस. 15मायनं पोट पहिलं जन्म व्हयेल बठा प्राणी, मंग ते माणुसनं राहो का पशुनं राहो परमेश्वरले अर्पानं त्या सर्वा तुनाच शेतस; पण पहिलं जन्म व्हयेल माणुस अनी पहिलं जन्म व्हयेल अशुध्द पशु खंड लिसनं सोडी देवानं. 16ज्याले खंड लिसनं सोडानं शे ते एक महिनानं व्हयनं म्हणजे त्याना ठरायेल मोल पवित्रस्थानमाधला शेकेलनं चलनप्रमानं पाच शेकेल म्हणजे वीस गेरा लिसनं त्यासले सोडी देवानं. 17पण गायनं, मेंढीनं नाहिते बकरीनं पहिलं वत्स सोडानं नही, तो पवित्र शे मनीसनं त्यानं रंगत वेदीवर शितडानं अनी त्यानी चरबीनं परमेश्वरकरता सुवासीक हवन मनीसनं होम करानं. 18त्यानं मास तुनं शे; ओवाळीनं ऊर अनी उजवा फरा जशे तुनं तशे हाईबी तुनं शे. 19हाई प्रकारं पवित्र वस्तुमाईन जेवढा समर्पित वस्तु मनीसनं इस्राएल लोके परमेश्वरले अर्पण करतीन त्या बठासवर तुना, तुना पोर्‍यासना अनी तुन्या पोरीसना कायमनं हक्क शे आशे मी नेमी देसं; हाई तुनासंगे अनी तुना वंशजसनासंगे परमेश्वरनी मिठनं करार कायमनं करेल शे. 20परमेश्वरनी अहरोनले सांगं, इस्राएल लोकेसनी जमीननं बाकीना वतन तुले भेटाऊ नही; इस्राएल लोकेसमा मीच तुना वाटा अनी वतन शे.

लेवीसना वाटा

21दर्शनमंडपनी सेवा लेवी वंश करस त्याकरता इस्राएल लोकेसनं जे दशमांस येस तेच वतन मनीसन त्यासले मी नेमी देयेल शेतस. 22इस्राएल लोकेसनी यानापुढे दर्शनमंडपनाजोडे येवानं नही ऊनात ते त्यासले पाप लागीसनं त्या मरतीन. 23तर लेव्यासनी दर्शनमंडपनी सेवा करानी; लोकेसना अधर्मना दोष त्यासनावर; हाई तुमनं पिढयांपिढया कायमनं विधी शे; लेव्यासले इस्राएल लोकेसमां काही वतन नही राहावाले पाहिजे. 24कारण इस्राएल लोके जे दशमांस समर्पित अंश मनीसनं परमेश्वरले अर्पण करतसं, ते लेव्यासनं भाग मनीसनं मी त्यासले नेमी देयेल शेतस; त्याकरता मी त्यासले सांगेल शे की इस्राएल लोकेसमा तुमले वतन भेटाऊ नही.

लेवीसना दशमांश

25परमेश्वर मोशेले बोलना, 26तु लेव्यासले सांग, मी इस्राएलना दशमांस तुमले वतन मनीसनं देसं, त्या तुमनाजोडे ऊना म्हणजे तुम्हीन ते दशमांसना दशमांस परमेश्वरले समर्पित अंश मनीसनं अर्पण करानं. 27तुमनं समर्पित अंश खळामाधला धान्य अनी रसकुंडमाधला द्राक्षरसना सारखा तुमना हिशोबमा मोजामा येई. 28इस्राएल लोकेसकडतीन जे दशमांस तुमले भेटी त्यामाईन बाकीना परमेश्वरले समर्पित अंश मनीसनं करेल अर्पण अहरोन याजकले देवानं. 29ज्या सर्वा अर्पण तुमले भेटी त्यामाईन बठा समर्पित अंश परमेश्वरले अर्पण करानं, हाई परमेश्वरले पवित्र करेल म्हणजे उत्तम भागमाईन लेवानं. 30तु लेव्यासले सांग जवय तुम्हीन हाई उत्तम भाग समर्पित अंश म्हणीसनं अर्पण करानं तवय हाई तुमनं खळामाधला धान्य अनी रसकुंडमधला द्राक्षरस यासना अर्पणप्रमानं मोजामां येई. 31हाई बठा अर्पण तुम्हीन अनी तुमना बठा घरानासनी कोनतेबी जागवर खावानं. कारण तुम्हीन दर्शनमंडपनी सेवा करशात त्याना मोबदला हाई शे. 32तुम्हीन त्यामाधला उत्तम भाग समर्पित अंश म्हणीसनं अर्पण करं म्हणजे त्यानामुये तुमले दोष लागाऊ नही इस्राएलनी कोनतीबी पवित्र वस्तु तुमना हातमाईन अपवित्र व्हावाऊ नही अनी तुम्हीन मराऊत नही.