गणना 16

कोरह, दाथानं अनी अबीराम यासनं विरोध

1कोरह बिन इसहार बिन कहाथ बिन लेवी, अनी रऊबेन वंशमधला एलीयाबना पोर्‍या दाथान अनी अबीराम अनी ओन बिन पेलेथ. 2हया इस्राएल लोकेसमधला बाकीना माणसे म्हणजे अडिचशे सरदार संगे लिसनं मोशावर उठनातं; हया सरदार लोकप्रतिनिधी व्हतात अनी अब्रुदार माणसे व्हतात. 3त्या मोशे अनी अहरोन यासनाविरोधमां उठीसनं त्यासले बोलनात; तुम्हीन भलता मोठा समजतसं! सर्वी मंडळी पवित्र शे, तशच प्रत्येक माणुस पवित्र शे अनी परमेश्वर त्यासनाठायी शे; तर मंग तुम्हीन परमेश्वरना मंडळीवर हक्क काबर गाजाडतस? 4हाई ऐकीसनं मोशे ऊबडा पडनां, 5तो कोरह अनी त्याना जोडीदार यासले बोलना, परमेश्वरना कोण अनी पवित्र कोण शे हाई परमेश्वर सकाय दखाडी अनी त्यासले जोडे येऊ देई. 6तर आते, कोरह, तु अनी तुना बठा जोडीदार धुपाटनं ल्या; 7अनी सकाय त्यामा आग ठेईसनं परमेश्वरले धुप दखाडा; मंग परमेश्वर ज्याले निवाडी तोच पवित्र व्हई; लेव्यानं वंशवहो; तुमना आते बस व्हयनं; 8मंग मोशे कोरहले बोलना, लेव्यासना वंशहो, ऐका, 9तुम्हीन परमेश्वरनी निवासमंडनी सेवा करानी अनी मंडळीनी सेवाकरता त्यानामोरे उभं राहावानं त्याकरता परमेश्वर तुमले त्यानाजोडे येऊ दिधं; हाई कामकरता परमेश्वरनी तुमले इस्राएल लोकेसनी मंडळीमाईन येगळं करेल शे हाई का कमी व्हयनं का? 10तुले अनी तुना बठा लेवी भाऊबंदसले परमेश्वरनी आपला जोडे लिसनीबी तुम्हीन याजकनं पदबी लेवाले दखी राहिना शेतस का? 11याकरता तु अनी तुनासंगेना बठी मंडळी परमेश्वरवर उठेल शेतस; अहरोन काय शे त्यानाविरोधमां तुम्हीन कुरकुर करी राहिना शेतस? 12मोशेनी एलीयाबना पोर्‍या दाथान अनी अबीराम यासले बलावाले धाडं पण त्यासनी सांगं, आम्हीन येवावुत नही; 13तू आमले हाई जंगलमा मारी टाका करता दुधमधना प्रवाह वाही राहिंता, त्या देशमाईन काढीसन आणेल शे हाई कमी व्हयनं का तु आमनावर अधिकार गाजाडस? 14आजुन, दुधमधना प्रवाह वाहस त्या देशमा तू आमले आणेल नही शे किंवा वावरे अनी द्राक्षसना मळा हाई वतन म्हणीसन आमले दिधं नही; हया माणससना डोळासमा धूळ फेकस का? आम्हीन येवावुत नही. 15तवय मोशेले राग ऊना अनी तो परमेश्वरले बोलना, त्यासना अर्पणसकडे दखानं नही; मी त्यासना एक गदडाबी लेयेल नही शे; त्यासनी कोणताच प्रकारनी हानी नही करेल शे. 16मंग मोशे कोरहले बोलना, तु सकाय आपली बठी मंडळीसंगे अहरोननासंगे परमेश्वरना समोर हजर व्हय, 17तुम्हीन बठा ज्यानात्याना धुपाटनं लिसन त्यामा धुप टाका; प्रत्येकनी धुपाटनं ह्या प्रमानं दोनशे पन्नास धुपाटनं परमेश्वरनामोरे लई येवानं; तू अनी अहरोन यासनीबी ज्यानात्याना धुपाटनं लई येवानं; 18तवय त्यासनी आपला धुपाटनं लिसन त्यामा इस्तव ठेवं अनी त्यामा धुप घालं, तशच मोशे अनी अहरोन यासनासंगे त्या दर्शनमंडपना दारनाजोडे उभा राहीनात. 19कोरहनी त्यासना विरोधमा ज्या व्हतात बठी मंडळीले दर्शनमंडपना दारपान जमाडं, तवय परमेश्वरना तेज बठी मंडळीले दखायनं. 20परमेश्वरनी मोशे अनी अहरोन यासले सांगं, 21तुम्हीन हाई मंडळीमाईन येगळं व्हवानं म्हणजे मी त्यासले एक क्षणमा भस्म करस. 22तवय त्या उबडा पडीसन बोलनात ये देवा, सर्वा जिवसना देव, एक माणुसनी पाप करं म्हणीसन बठी मंडळीले भस्म करस का? 23मंग परमेश्वर मोशेले बोलना, 24मंडळीले सांग, तुम्हीन कोरह, दाथान अनी अबीराम यासना तंबुपाईन दुर व्हई जावा. 25तवय मोशे उठीसन दाथान अनी अबीराम यासनाकडे गया अनी इस्राएल लोकेसना वडील त्यासना मांगे गयात. 26तो मंडळीले बोलना, तुम्हीन या दुष्ट माणसासना डेरासपाईन दुर व्हयी जावा, कोणतीबी वस्तुले हात लावानं नही; लावशात ते तुम्हीन बठा त्यासना पाप पडीसनं भस्म वशात. 27मंग त्या कोरह, दाथान अनी अबीराम यासना डेराना आजुबाजूले निंघी गयात, अनी दाथान अनी अबीराम बाहेर निंघीसन आपला बायका पोर्‍यासना संगे डेराना दारपान उभा राहीनात. 28तवय मोशे बोलना, मी हया बठा काम मना मनतीन करेल नही शे; तर हाई कराले परमेश्वरनी माले धाडेल शे हाई यावरतीन तुमले दखाई. 29दुसरा माणससना मरणना प्रमानं यासले मरण भेटनं नाहिते दुसरा माणससना प्रमानं यासना नाश व्हयनं तर परमेश्वरनी माले धाडेल नही शे अश समजा; 30परमेश्वरनी बर्‍याच मोठया गोष्टी करेल शे अनी पृथ्वीनी आपलं तोंड उघाडीसन यासले अनी यासना बठासले गिळी टाकं अनी हया अधोलोकमा जीवंत जाई पडनात, तर आशे समजान की या लोकेसनी परमेश्वरले तुच्छ मानेल शे. 31हया बठा शब्द बोलीसन व्हतास त्या माणससना पायना खालनी जमीन दोन भागमा व्हई गई, 32अनी पृथ्वीनी तोंड उघडीसन त्या अनी त्यासना कुटुंब, कोरहना बठा माणसे अनी त्यासनी बठी मालमत्ता गिळी टाकी. 33त्या अनी त्यासना बठा माणसे जीवंत अधोलोकमा जाई पडनात अनी पृथ्वीनी त्यासले गडप करी टाकं अनी मंडळीमाईन त्यासना नाश व्हयनं. 34त्यासना आजुबाजूले ज्या इस्राएल लोके व्हतात त्या त्यासना आवाज ऐकीसन पळी गयात, पृथ्वी आमले बी गिळी टाकी आशे त्यासले वाटनं. 35मंग परमेश्वर पाईन आग निंघनी, त्यानी त्या धुप जाळनारा दोनशे पन्नास माणससले भस्म करी टाकात.

धुपाटने

36परमेश्वर मोशेले बोलना, 37अहरोन याजकना पोर्‍या एलाजार याले सांग धुपाटनं आगमाईन काढं अनी ती आग पसारी टाकं, कारण ती पवित्र शे; 38पाप करीसन आपला जीवले मुकनात त्यासना धुपाटनं लिसन त्यासना पत्रा ठोकीसन वेदी बनाडं, कारण त्यासनी ती परमेश्वरले समर्पण करामुये पवित्र शेतस; इस्राएल लोकेसले हाई चिन्हं व्हतीन. 39ज्या पितळना धुपाटनं आगघाई भस्म व्हयेल व्हतात त्या माणससनी अर्पण करेल व्हतं, ते लिसन एलाजार याजकनी त्यासना पत्रा ठोकात अनी वेदी बनाडी. 40याना हेतु आशे शे अहरोन वंशना नही शे अशा कोणी पारकानी परमेश्वरनामोरे धुप जाळाले जावानं नही यानी आठवन इस्राएल लोकेसले ऱ्हावाले पाहिजे; अनी परमेश्वरनी मोशे कडतीन सांगेल प्रमानं कोरहना अनी त्याना जोडीदारना मायक व्हयनी तशी कोणी व्हवाले नही पाहिजे.

अहरोन लोकसले वाचाडस

41दुसरा रोजले इस्राएल लोकेसनी बठी मंडळी मोशे अनी अहरोन यासनावर उलटीसन त्यासले बोलनात, तुम्ही परमेश्वरना लोकेसले मारी टाकेल शे. 42मंडळी मधला लोके मोशे अनी अहरोन यासना विरोधमा जमा व्हवानंतर दर्शनमंडपकडे दृष्टी करी तवय ढगनी त्यासनावर सावली करेल शे अनी परमेश्वरना तेज त्यासनावर प्रकट व्हयेल शे आशे त्यासले दखायनं. 43मंग मोशे अनी अहरोन दर्शनमंडपना समोर गयात, 44तवय परमेश्वर मोशेले सांगं, 45तुम्हीन या मंडळीमाईन एकबाजुले व्हई जावा, म्हणजे मी यासले एक क्षणमा भस्म करसं; तवय त्या उबडा पडनात. 46मंग मोशेनी अहरोनले सांगं, धुपाटनं लिसन त्यामा वेदीवरली आग घाल अनी त्यानावर धुप ठेईसन लवकर मंडळीकडे लिसन त्यासनाकरता प्रायश्चित करं कारण परमेश्वरना कोप भडकेल शे अनी मरी सुरु व्हई जायेल शे. 47मोशेनी आज्ञा प्रमानं अहरोन धुपाटनं लिसन पयत मंडळीकडे गया, अनी लोकसमा मरी पसरी राहीनी शे हाई दखीसन त्यानी धुप घालीसन लोकसकरता प्रायश्चित करं. 48मरेल अनी जीवंत यासना मजारमा तो उभा राहीना तवय मरी थांबनी. 49कोरहना प्रकारमा ज्या मरनात त्यानापेक्षा मरीनी चौदा हजार सातशे लोक मरनात. 50तवय मरी थांबनी अनी अहरोन दर्शनमंडपना दारपान मोशेपान परत गया.