अनुवाद 6

सर्वसमा मोठी आज्ञा

1तुमना देव यहोवा यानी जी आज्ञा अनी जे विधी अनं नियम तुमले शिकाडानी माले आज्ञा करेल शे ती हाई: तुम्हीन जो देश वतन करी लेवाकरता पलीकडे जाई राहिनात तठे तुम्हीन ते पाळानं. 2त्यानं ज्या सर्वा विधी अनं आज्ञा मी तुमले सांगी ऱ्हायनु शे, त्या तू अनं तुना पोऱ्यासोऱ्या यासनी तुना देव यहोवा याना भय धरीसन पाळानं म्हणजे तू दीर्घायु व्हशी. 3हे इस्त्राएल, ऐक, अनी त्या काळजीपुर्वक पाळ म्हणजे तुना कल्याण व्हई; अनी तुना पुर्वजसना देव यहोवा यानी दुधमधना प्रवाह वाहस तो देश तुले देवानं वचन देल शे त्यामा तू बहुगुणित व्हशी.

4हे इस्त्राएल, ऐक, आपला देव यहोवा हाऊ एकलाच परमेश्वर शे; 5तू आपला देव यहोवा यानावर पुर्ण मनतीन, पुर्ण जिवतीन अनं पुर्ण शक्तीतीन प्रिती कर. 6ज्या गोष्टी तुले मी आज बजाडीसन सांगी ऱ्हायनु शे त्या तुना ह्रदयमा ठसाड. 7अनी तू आपला पोऱ्यासोऱ्यासना मनवर उमटाड; अनी घरमा बसेल राहिनास, मार्गमा चाली राहिनास, उठता, बसता त्यानाईषयी बोलत जा. 8त्या आपले हातले चिन्हदाखल बांध अनी आपला डोळासना मध्यभागी कपाळपट्टी म्हणीन लाव. 9आपला दारना चौकटीसवर अनं आपला फाटकासवर त्या लिख.

आज्ञाभंगना विरूध्द चेतावणी

10तुना देव यहोवा यानी तुना पुर्वजसले म्हणजे अब्राहाम, इसहाक अनं याकोब यासले जो देश तुले देवानं वचन देल शे त्यामा तो तुले लई जायी जी मोठी नगरे तू स्वत: बसाडेल नहीत, 11तू भरेल नही अश उत्तम वस्तूघाई भरेल घरे, तू खोदेल नहीस अश खोदेल विहिरी अनी तू लाय नहीस अश द्राक्षमळा अनं जैतुन झाडं हाई सर्वा तुले देई; अनी तू त्यासना उपभोग लिसन तृप्त व्हशी. 12ज्या परमेश्वरनी तुले मिसर देशना गुलागिरीमाईन, बाहेर काढं त्यानी आठवण तुले पडाले नको म्हणीन सांभाळ. 13तू आपला देव परमेश्वर याना भय धर, त्यानी सेवा कर अनी त्यानाच नावनी शपथ ले. 14तुम्हीन अन्य देवसना म्हणजे जवळपासना राष्ट्रसना देवसना मांगे लागानं नही; 15कारण तुमनामा राहनारा तुना देव यहोवा ईर्ष्यावान देव शे तुना देव यहोवा याना क्रोध तुनावर भडकीसन त्यानी तुना संहार करीसन तुले पृथ्वीवरीन नष्ट करानं अश नको व्हवाले.

16तुम्हीन मस्सा आठे तुमना देव यहोवा यानी परीक्षा दखी तशी दखानं नही. 17तुमना देव यहोवा यानी देल आज्ञा, चेतावणी अनं विधी जपीसन पाळानं. अनं विधी जपीसन पाळानं. 18परमेश्वरना नजरमा जे योग्य अनं चांगलं शे, तेच कर, म्हणजे तुना कल्याण व्हई; अनी जो उत्तम देश देवानं वचन परमेश्वरनी तुना पुर्वजसले देल शे त्यामा तुना प्रवेश व्हईन त्यानं वतन तुले भेटी; 19अनी परमेश्वरना सांगाप्रमाणे तुना सर्वा शत्रु तुनापुढेन काढी टाकामा येतीन.

20भविष्यकाळमा जवय तुना पोऱ्या तुले विचारी की, हाई जी चेतावणी, विधी अनं नियम पाळानी आपला देव यहोवा यानी तुमले आज्ञा करेल शे त्यानं आर्थ काय? 21तवय तू आपला पोऱ्याले सांग की, आम्हीन मिसर देशमा फारोना दास व्हतात, त्या येळले परमेश्वरनी पराक्रमी हातघाई आमले मिसर देशमाईन बाहेर काढा; 22परमेश्वरनी आमनादेखत मिसर देश, फारो अनं त्याना सर्वा घराणा यासनाविरूध्दमा मोठं अनं पीडादायक चिन्ह अनं चमत्कार दखाडात; 23अनी आपला पुर्वजसले शपथपुर्वक वचनतीन देल देशमा आमले लई जावानं म्हणीन त्यानी तठेन आमले बाहेर काढं. 24आपण आपला देव यहोवा यानं भय धराले पाहिजे, आपलं कायमना कल्याण व्हवाले पाहिजे अनी परमेश्वरनी आपलाले आजनाप्रमाणेच जिवत राखाले पाहिजे म्हणीन त्यानी हाई सर्व विधी पाळानी आज्ञा दिधी. 25आपण आपला देव यहोवा यानासमोर त्याना सांगाप्रमाणे हाई सर्वी आज्ञा काळजीपुर्वक पाळी तर ते आपलं नितीमत्व ठरी.