अनुवाद 23

परमेश्वरना मेळाले येवाले ईरोध राहनारा लोके

1ज्याना अंडकोष ठेचेल शे अनी ज्यानं लिंग कापेल शे त्यानी परमेश्वरना मेळाले येवानं नही. 2कुकर्मतीन जन्मेल परमेश्वरना मेळाले येवानं नही; दहावी पिढीपावत त्यासनापाईन परमेश्वरना मेळाले येवानं नही. 3अम्मोनी अनी मवाबी यासनी परमेश्वरना मेळाले येवानं नही; दहावी पिढीपावत त्यासनापाईन कोणीबी कधीच परमेश्वरना मेळाले येवानं नही. 4कारण तुम्हीन मिसर देशतीन ई राहिंतात तवय त्या अन्नपाणी लिसन तुमले भेटाले वनात नहीत, इतलंच नही तर त्यासनी तुले विरोध करीन अराम नहराईम आठला पथोर नगरना बौराना पोऱ्या बलाम याले धन दिसन तुले शाप देवाकरता आणात, 5तरी तुना देव यहोवा हाऊ बलामना ऐकाले तयार व्हयना नही. उलट तुना देव यहोवा यानी तुनाकरता त्या शापना आशिर्वाद करा; कारण तुना देव यहोवा यानी तुनावर प्रिती व्हती. 6तुम्हीन जिवत ऱ्हास तोपावत त्यासनी शांती अनं चांगलं कराले दखानं नही. 7अदोमना तुले वीट नको रावाले, कारण तो तुना बंधू शे; मिसरीसना तुले वीट नको रावाले, कारण तू त्यासना देशले उपरी व्हतास. 8त्यासना तिसरा पिढीमा जन्मेल लोकसले परमेश्वरना मेळाले येवानी परवांगी शे.

युध्द छावणीमा राखाणी शुध्दता

9तुना शत्रूसनासंगे युध्द कराकरता तू बाहेर पडीन तू तळ दिशी तवय सर्वा दुष्कृत्यसपाईन दूर ऱ्हाय. 10जर कोणी माणुसले रातमा काही अशुध्दता आपोआप प्राप्त व्हयनी तर त्यानी छावणी बाहेर जावानं, त्यानी छावणीना मझार येवानं नही. 11पण संध्याकाळ जोडे वनी म्हणजे त्यानी आंगोळ कराले पाहिजे अनी सुर्य मावळावर त्यानी छावणीना मझार येवानं. 12तुले बाहेरदिशामा जावाकरता छावणीना बाहेर एक जागा रावाले पाहिजे; 13अनी तुना हत्यारासमा एक कुदळ रावाले पाहिजे, बाहेरदिशामा बसाना अगोदर कुदळघाई खोदीन खड्डा कराना अनी नंतर आपला मळ झाकी टाकानं. 14कारण तुना देव यहोवा तुना बचाव कराकरता अनी तुना शत्रु तुना हातमा देवाकरता छावणीमा फिरस, म्हणीन तू आपली छावणी पवित्र ठेवानी, नहीते तुनामा एकादा अनुचित प्रकार दखीन तो तुनापाईन निंघी जाई.

येगयेगळा नियम

15एकादा दास आपला मालकपाईन पळीसन तुले शरण वना तर त्याले त्याना मालकनाजोडे स्वाधीन करानं नही. 16त्यानी आपला आवडीप्रमाणं निवडेल ठिकाणले तुना एकादा गावमा तुनासोबत रावानं. त्याले त्रास देवानं नही.

17इस्त्राएल पोरीसपाईन कोणीबी वेश्या व्हवानं नही; अनी इस्त्राएल पोऱ्यासमाईन कोनीबी अश ऱ्हावानं नही. 18वेश्याना कमाईना किवा कुत्राना प्राप्तीना पैसा कोणताबी नवस फेडाकरता तू आपला देव यहोवा याना घरमा आणानं नही; कारण या दोन्हीसनाबी तुना देव यहोवा याले वीट शे. 19आपला बंधूसंगे व्‍याजबट्टाना व्यवहार करानं नही; पैशावर व्याज, अन्नधान्यसवर वाढ किंवा इतर कोणताभी पदार्थसवर वाढीदिढी करानं नही. 20वाटनात तर परदेशीसंगे वाढीदिढीना व्यवहार कर, पण आपला बंधूनासोबत करू नकोस, म्हणजे जो देश वतन करी लेवाले तू जाई राहिना शे तठे ज्या ज्या कामले तू हात लावशी त्यामा तुना देव यहोवा तुले आशिर्वाद दि. 21तू आपला देव यहोवा याले नवस करशी तवय तो फेडाले उशीर करानं नही; कारण तुना देव यहोवा तुले त्याना आवश्यक जाब ईचारी; उशीर लागना तर तुले पाप लागी. 22पण तू नवस नही करानं ठराव, तर तुले पाप लागावु नही. 23ज्याना अर्थ तू आपला तोंडघाई वचन दिसन आपला देव यहोवा याले स्वखुशीतीन नवस करेल शे, त्याना अर्थ तुना तोंडतीन निंघेल वचन काळजीपुर्वक पाळानं. 24आपला शेजारना द्राक्षमळामा गयास तर मनले वाटी तेवढा द्राक्ष खा, मात्र आपला भांडामा काही लेवू नको. 25आपला शेजारीना उभा पिकमा तू गयास तर वाटना कणसं खुडीसन हातवर चोळ, पण आपला शेजारना उभा पिकले ईळा लावानं नही.