Jepania 3

Bal pa Jerucalem ki kokone

1Can bipoto ikom taun madit me Jerucalem ma jone gudoko lubwami dok lujemo, ma unu jogi kikome! 2En pe winyo dwon ngat mo, dok pe ye juk pa ngat mo, pe geno Rwot, dok bene pe nyiko cok ki Lubangane. 3Ludito ma gitye iye girom ki twoni labwor ma mor; lungolkop ma mere gical ki orudi ma mako lee i dyewor ci pe giweko gin mo dong nio wa odiko. 4Lunebine gin jo ma owor. Ajwakine gibalo Ot pa Rwot giweko bedo me kwer, gin jo ma pe gene; dok bene giloko cik pa Lubanga me tiyo gin ma cwinygi mito. 5Ento Rwot ma bedo iye opore, en pe tiyo gin marac; ma odiko ducu en pe keng ngolo kop kakare, en pe keng tice bene rupiny ki rupiny, ento jo ma lubalo mede amede ki bal ma lewic bene pe makogi.

6Rwot owaco ni, “Atyeko jwero rok mapol; celgi matek odoko obur; atyeko balo yoogi woko, mamiyo ngat mo pe woto iye; taun gi madito odong obur, labongo dano i igi. 7Ci awaco ni, ‘Adada Jerucalem bilwora, biye juk; wiye pe biwil ikom loka ducu ma aciko en kwede.’ Ento gin pud gimede ameda ki mitkom me timo bal kare ducu. 8Pimeno, wukura, wukur nino ma abia iye malo ka dot. Pien amoko tama me coko rok ducu, ki pi guru ker mapol kacel, wek ato kinigana ikomgi, wek akemona malyeti otum; pien akemo me nyekona biwango lobo ducu. 9Ada, ikare meno abiloko rok ducu miyo gibiloko lok ma opore kakare, wek gin ducu gulwong nyinga an Rwot, dok gutii bota ki cwiny acel. 10Gin jona ma guket woko atani, gibikela mota ki kwacgi bene, kun gia ki loka kulu me Etiopia. 11Inino meno pe kibiketo lewic ikomi pi tim ma ijemo kwede ikoma; ikare meno abikwanyo woko ki ikinwu jo mayam ginyate ma gikete malo; pe dok wubimede ki jemo iwi got mera maleng. 12Jo mamwol ma lucan abiweko dong ikinwu, gin jo ma biyenyo kony ki bota, 131gibiyenyo kalare i nying Rwot; pe gibitimo gin marac, dok pe gibiloko lok goba; leb ma bwolo dano bene pe binonge i doggi. Gibicam, dok gibibutu piny, pe tye ngat mo ma bimiyogi lworo.”

Wer me yomcwiny

14Wuwer ki dwon malongo, wun jo Cion; wugo kijira, wun anyira Icrael!

Wubed ki yomcwiny wunyate ki cwinywu ducu, wun jo Jerucalem.

15Rwot dong okwanyo kop woko ki ikomwu,

dok bene otyeko ryemo lukworwu.

Rwot tye ikinwu, en rwot me Icrael;

pe dok wubilworo gin marac.

16Inino meno kibiwaco ki Jerucalem ni,

“Pe wulwor, wun jo Cion;

pe wuwek cingwu odok nyap!

17Rwot Lubangawu tye ikinwu,

en twon oteka lweny ma bikeliwu loc.

En bium ikomwu ki yomcwiny,

pi mar mere botwu en birocowu wudoko manyen,

binyutu yomcwiny madit ikomwu ki wer malongo

18macalo inino madito.”

Rwot waco ni,

“Abikwanyo can woko ki ikomwu,

wek pe kiyetwu pire.

19Nen, ikare meno abitiyo tica ikom dano ducu mayam giunuwu.

Abilaro lungolo, dok abicoko jo mayam kiketogi woko,

abiloko lewicgi doko pak,

ci nyinggi biwinye i lobo ducu.

20Ikare meno abikelowu paco,

ikare ma abicokowu kacel.

Eyo, abimiyo nyingwu ywek,

dok kibipakowu, ikin jo ducu ma gibedo i lobo,

en kare ma abidwoko gum botwu kun wuneno ki wangwu.”

Man an Rwot aye ma awaco.