Aggai 1

Rwot ociko pi gero Ot pa Lubanga odoco

11

I mwaka me aryo me loc pa rwot Dario, inino dwe acel me dwe me abicel, Rwot obino ci oloko ki Aggai, lok ma en myero otit bot Jerubabel wod pa Cealtiel, ma onongo tye laloc pa jo Juda, ki bene bot Yocwa wod pa Yekojadak.

2Rwot me mony owaco bot Aggai kuman ni, “Rok man gibedo kawaco ni, kare peya oromo me gero Ot pa Rwot odoco.” 3Ci Rwot dok oloko ki lanebi Aggai, kun waco ni, 4“Wun jona, man mono aye kare ma omyero wun wubed i odiwu ma wugero wigi mabeconi, ma kun wuneno Oda obale woko? 5Wun mono pe wutye kaneno gin matye katime botwu ikare man ikwowu? 6Wucoyo kodi madwong, ento wukayo manok; wucamo camwu, ento bene pe wuyeng; wumato matgu, ento pe romowu; dok wuruke, ento ngat mo ma kome bedo lyet bene peke; dok ngat ma camo mucara camo mucarane ento pe konye wa ki acel. 7Kong wutam pi kit gin ducu matye katime i kwowu. 8Kombedi dong wucit iwi godi, wek wukel yadi me gedo, ci wuger ki Ot man, ci biyomo cwinya, dok kibiwora iye kit ma myero.

9Wun wubedo kageno ni wubinongo cam mabup, ento wucoko manok mo. Dok ikare ma wukelo paco, amiyo orwenyo woko. Wun mono wutamo ikom gin ma omiyo man otime? Man otime pien Oda tye ma obale woko, kun ki tung botwu, ngat acel acel tye kabole abola katiyo tic me ode maber. 10Meno aye gin ma omiyo kot okwero cwer woko i lobowu ki toyo bene peke, dok lobo bene okwero ceko cam pirwu. 11An bene dong aciko ni can pii myero obed tye i lobo, ki ikom godi, ikom ngano, ikom kongo bwino manyen, ikom moo, ki ikom ginapita ducu ma gidongo i lobo, ikom dano, ki ikom dyangi, ki ikom ticgi ducu ma gitiyo.”

Dano ducu gutiyo kit ma Rwot ociko

12Meno omiyo Jerubabel wod pa Cealtiel, kacel ki Yocwa wod pa Yekojadak, ajwaka madit pa Lubanga, ki jo ducu ma gudong, guwinyo lok pa Rwot Lubangagi, ki lok pa lanebi Aggai, kit macalo Rwot Lubangagi oore kwede; ci lwak gucako bedo kilworo inyim Rwot Lubanga. 13Lacen Aggai dok otito kwena pa Rwot bot lwak ni, “An abibedo kwedwu, man aye acike iye botwu.” 14Ci Rwot otugu cwiny Jerubabel wod pa Cealtiel, laloc me Juda, ki cwiny Yocwa wod pa Yekojadak, ajwaka madit, ki cwiny lwak ducu ma gudong; cut gubino ci gucako tic ikom Ot pa Rwot me mony, ma en aye Lubangagi. 15Gin gucako tic meno inino dwe pyere aryo wiye angwen me dwe me abicel ma en aye mwaka me aryo me loc pa rwot Dario.