Aggai 2

Deyo me Ot pa Lubanga ma kigero manyen

1I mwaka me aryo me loc pa rwot Dario, inino dwe pyere aryo wiye acel me dwe me abiro, Rwot obino ci oloko bot lanebi Aggai kuman ni, 2“Tit bot Jerubabel wod pa Cealtiel, laloc me Juda, ki bot Yocwa wod pa Yekojadak, ma en ajwaka madit, ki bot jo ducu ma gudong i lobo Icrael, kun iwaco ni, 31‘Gwok tye ngat mo ma pud odong ikinwu ma ceng oneno ot man ki deyone macon ba? Kombedi kong wunen deyone tye ningning? Pe nen ki iwangwu macalo gin ma konye peke?’ 4Kadi kumeno, in Jerubabel, kombedi omyero ibed ki tekcwiny, in kacel ki Yocwa, wod pa Yekojadak, ajwaka madit; ki wun jo ducu ma wubedo i loboni, wubed ki tekcwiny, wutii ticwu ducu, pien atye kwedwu, 52macalo ceng acike kwede kwedwu ikare ma wua ki i Ejipt. Cwiny mera bibedo ikinwu; pe wulwor. 63

Dong odong kare manok mo keken, ci abiyengo polo ki lobo, nam ki ngom ma otwo. 7Dok abiyengo rok ducu, wek lonyo me rok ducu obin iye kany, ka dong abipongo Ot man ki deyo. 8Ryal ducu mera, jabu bene mera. 9Ci dong deyo me Ot man ma lacen bikato mukwongo ca; dok abimiyo kabedo man bibedo ki kuc. Man an Rwot me mony aye awaco.”

Aggai openyo tam ki bot ajwaki

10I mwaka me aryo me loc pa Dario, inino dwe pyere aryo wiye angwen me dwe me abongwen, Rwot Matwero ducu dok oloko ki lanebi Aggai kun waco ni, 11“Peny ajwaki wek gugam peny man, 12‘Kace dano mo otingo ringo ma kityero dok kilonyo odoko maleng, i dog bongone, ce dog bongonenu ogudu kwon, nyo dek, nyo kongo bwino, nyo moo, nyo kit cam mo keken, ci lonyo cam meno doko leng?’”

Ci ajwaki gugamo ni, “Pe kumeno.” 134

Ci Aggai dok openyogi ni, “Kace dano mo ma kome ki keni pien ogudu kom dano ma oto, ce en ogudu gin mo ikin jami magi, gin bene doko gin ma keni?”

Ci ajwaki gudok iye ni, “Doko gin ma keni.”

14Aggai dok owaco ni, “Lok pa jo man ki lok pa rok matye inyima tye kitmeno, man lok pa Rwot kikome. Man bene mako tic cinggi ducu; dok gin ma gityero kunu gin ma keni.”

Rwot ocike me miyo gum bot lwake

15Rwot waco kuman ni, “Kong wutam pi gin ma dong ocako time ma onongo peya kicako cano kidi iwi wadi me roco Ot pa Rwot, onongo yam kwowu obedo ningning? 16Ikare meno ka kare me kacwu oromo ci odur kalwu kama onongo wutamo ni wubinongo iye kilo miya aryo, ento wunongo maromo kilo miya acel keken; dok ka ngat ma obino i bur kongo bwino pi twomo lita miya acel, nongo lita pyere angwen keken. 17Yam apwodowu, kun abwaro camwu, dok amiyo pee ogoyo tic cingwu ducu. Atimo kumeno; ento pe wumedo ki dwogo bota. 18Tin nino dwe pyere aryo wiye angwen me dwe me abongwen, ma en nino ma dong kityeko keto iye te guti me Ot pa Rwot. Dong wuket wangwu me neno gin ma dong bibedo katime. 19Kadi bed kodiwu pud peke i dero, wa olokwu, oduruwu, ki okwer pomegranat peya gucako nyak, cake tin cito kwede anyim, an dong abimiyowu gum.”

Rwot ocike bot Jerubabel

20Inino meno kikome, inino dwe pyere aryo wiye angwen me dwe meno, Rwot dok oloko ki Aggai tyen me aryone kun waco ni, 21“Tit bot Jerubabel, laloc me Juda ni, dong acok cako yengo polo ki lobo, 22ci abituru rok mapol; dok acok tyeko teko me ker pa lurok mapol, ki abireto gadigadi lweny kacel ki jo ma ngweco kwedgi, aguragura ki wegigi, kun ngat acel acel bipoto piny ma nongo pala lucwan pa lawote aye nongo oneke. 23Ci inino meno, abitero in, Jerubabel wod pa Cealtiel ma latica, ci abiloko in ibedo macalo agit cinga ma kidiyo me lanyut, pien dong atyeko yero in woko.” Man lok pa an Rwot me mony kikome.