Jekaria 1

Rwot Lubanga lwongo jone me dwogo cen bote

11

I dwe me aboro i mwaka me aryo me loc pa Dario rwot me Percia, Rwot oloko bot lanebi Jekaria wod pa Berekia, wod pa Iddo kun waco ni, 2“Kiniga yam omaka matek ikom kwariwu. 3Ento kombedi dong awaco botwu ni, ‘Dong wudwog cen bota, ci an bene abidwogo botwu. 4Pe wubed macalo kwariwu. Yam lunebi macon gubedo katito botgi lok ni guwek kit meggi maracu me timo bali woko. Ento yam pe gumedo ki winyone, pe bene gumedo ki keto cwinygi ikoma. 5Kwariwu kombedi dong gitye wa kwene mono? Kadi wa lunebi bene pe gibedo kwo nakanaka. 6Ento loka ducu mayam aciko nia ki i dog lutica ma gin lunebi gin gucayo woko dok bene pe gulubu omiyo apwodogi. Ci gin gungut kun giwaco ni an Rwot me mony dong atiyo kit mayam ayubu kwede pi timo kwariwu muporo kitgi ki timgi.’”

Kinyutu ginanyuta me aguragura bot Jekaria

7Ikom nino dwe pyere aryo wiye angwen, i dwe me apar wiye acel, ma kilwongo ni Cebat, i mwaka me loc pa Dario me aryone, Rwot dok oloko kweda i ginanyuta. 82I ginanyuta meno aneno dano mo i dyewor, ma oyito iwi aguragura makwar, ci ocung kwede ikin yadi ma ngwecgi kur ma gitye i lung; ki tung yo ngeye onongo tye iye lwak aguragura makwar ki ma opilopilo, ki matare. 9Ci apenyo ni, “Ladit, lwak aguragura magi kono telokgi ango?”

Ci lamalaika ma onongo obedo kalok kwedani owaco bota ni, “Abinyutu telok magi boti.” 10Ci dano ma onongo ocung ikin yadi ma ngwecgi kuri ogamo ni, “Magi gin aye lwak jo ma Rwot oorogi kawire pi ngiyo dye lobo ducu.”

11Ci lungwec ki aguragurani gudwoko lok bot lamalaika ma onongo ocung ikin yadi ma ngwecgi kuri kun giwaco ni, “Dong watyeko wire walongo i lobo ducu; nen, i lobo ducu tye mukwe gire mot.”

12Lacen lamalaika pa Rwot dok openyo ni, “Ai Rwot me mony, ibitero kare marom mene ma nongo peya itimo kica ki Jerucalem, kacel ki taun madito ma i Juda ducu, ma in dong ikeco ikomgi pi mwaka pyere abiro kuluni?”

13Ci Rwot odok iye ki lamalaika ma obedo kalok kwedani, kun wace lok mabeco me kica bene. 14Omiyo lamalaika ma obedo kalok kwedani owaca ni atit lok ma Rwot me mony owacani ni, “Nyeko tye kamaka matek ma okato ducu pi Jerucalem ki pi Cion. 15Dok kiniga omaka matek ikom rok mapol ma gitye mot ki kuc. Pien ikare ma akwanyo kinigana woko ki ikom jona, en aye dok obedo kare ma gin rok meno gumedo iye lwak can mapol ikom jona. 16Pieno an Rwot dong atyeko dwogo cen i Jerucalem kanyutu kicana madwong bote. Kibiroco Ot pa Rwot, dok bene kibigero taun madit me Jerucalem odoco.”

17Lamalaika dok omede kitito lok man ni Rwot me mony waco ni, “Taun mera madito ducu bipong lipim ki gin mabeco dok aye, ci dok abikweyo cwiny Cion ka dok abiyero Jerucalem aye me bedo mera.”

Ginanyuta me Tung lee

18I ginanyuta mukene dok aneno tung lee angwen. 19Ci apenyo lamalaika ma obedo kalok kwedani ni, “Tung lee magi kono telokgi ango?” En odoka iye ni, “Magi gin aye tung lee ma gukeyo i Juda woko atata, ki Icrael ki Jerucalem bene.”

20Rwot dok onyutu bota lutet angwen. 21Ci apenyo ni, “Jonu gubino katimo kit gin ango ka?” Ci en ogamo ni, “Mony ma tung lee magi ocung pirigini aye rok mayam gukeyo i Juda woko atatani, omiyo guneno can atikani. Ento lutet magi gubino kamiyo lworo ikom rok ducu mayam gubalo lobo Judani wek lworo opot ikomgi ci kityekgi woko bene.”