Jekaria 2

Gin anyuta ikom tol lapim piny

1I ginanyuta mukene dok aneno dano mo matye ki tol lapim piny i cinge! 2Ci apenye ni, “In mono ibicito wa kwene ka?”

En odok iye bota ni, “Acito ka pimo Jerucalem, wek anen kit ma lac me iye ki bore tye rom kwede.”

3Ci aneno lamalaika ma obedo kalok kwedani ka bino anyim, ka dok lamalaika acel mukene bene obino ka rwate kwede. 4Ci lamalaika mukwongo ca owaco bot lawote ni, “Ring icit wa bot awobi ca matye ki tol lapim piny i cingeni wek iwace ni: Jerucalem bibedo apero labongo cel murume pi lwak dano mapol ma bibedo iye kacel ki lee mapol ata ma bibedo iye miyo pe dong kibiromo cweyo cel i kabedone. 5Rwot owaco ni en kikome aye ma ibibedo macalo cel gogo me mac me gwokogi, dok en aye bene ibibedo deyone manen ki i iye kunu.”

Kilwongo jo ma kiterogi i opii pi dwogo paco

6Rwot dok owaco kuman ni, “Wuring woko! Wua woko ki i lobo Babilon, pien con aketo iwu woko atata i kabedo ducu. 7Wun jo me Cion, wulwi, wuring wudwog woko cen i Jerucalem, wun jo ma wubedo i Babilon. 8Ngat ma timowu Cion marac nongo ogudu tong wanga.”

Ci Rwot me mony ma en aye Won Deyo oora bot lurok mapatpat mayam guyako Cion kun waco kuman ni, 9“An kikoma aye abilweny ikomgi, dok jo mayam gubedo opiigi aye bene gibiyakogi.” Ka man otime bimiyo wungeyoni Rwot me mony aye ma oora.

10Rwot owaco kuman ni, “Dong wuwer ki yomcwiny, wun jo Cion; pien nen an dong abibino kabedo i dyewu.”

11Ikare meno rok mapol bibino gibiloke gidok bot Rwot, ci dong gibidoko jone. En bene bibedo i dyewu, dok wubingeyo ni, Rwot me mony aye ma oora botwu. 12Lobo pa jo Juda dok bibedo lobo maleng pa Rwot; en dok biyero Jerucalem aye me bedo taun mere madit maleng makato.

13Wuling woko litik inyim Rwot wun jo ducu, pien en dong oa woko malo ki i kabedone maleng.