Jekaria 8

Rwot ocike pi roco Jerucalem odoco

1Rwot me mony oloko bota kun waco ni, 2“Abedo ka mito konyo Jerucalem pi mar madit ma atye kwede ikom jone, mar man ma atye kwede ikomgini omiyo akemo madwong omaka ikom meroke. 3An abidwogo cen i Cion, ci abibedo i dye Jerucalem, pieno Jerucalem kibilwongo ni taun madit me agena, en got pa Rwot me mony, got maleng. 4Co ma otii ki mon ma otii dok gibibedo piny mot ma komgi opye i dyekal me Jerucalem, ki jo ma otii gibikomo ki tal ma ngat acel acel omako i cinge. 5Yoo ducu ma i Jerucalem bipong ki awobe ki anyira ma gituku iye.

6Man twero nen calo gin ma pe twero time ki tung bot jo ma gudong ikare man, ento pe tye gin mo ma pe twere ki tung bota. 7An abilaro jona ki i lobo matye tung kunyango ki i lobo matye tung kupotoceng bene; 8ci abikelogi gibibedo wa i dye Jerucalem; gin gibibedo jona ki an bene abibedo Lubangagi me agena ki ma opore.

9Wubed ki tekcwiny. Wun dong wucako winyo lok acelu ma lunebi guloko botwu nia ikare ma kicako keto kwede guti me gero Ot pa Rwot Lubanga. 10Ikare macon ca yam pe kiculu mucara ki dano mo, wa pi lee bene pe kiculu, dok bene onongo kuc pe tye bot dano mo me kato woko ki me dwogo, pi lumerok; pien onongo amiyo ngat acel acel mon ki lawote. 11Ento ikare man pe dong abitimo jo ma gudongi kit mayam atimo ikom jo macon ca, man lok pa an Rwot me mony kikome. 12Pieno abimiyo gibipito kodigi ma nongo piny opye mot, dok olokgi bene binyako nyiggi mabup, lobo biceko cam, ki polo bene bimiyo toyo luk i ngom; dong abimiyo gum magi ducu bot jona ma gudongi. 13Wun jo me ot pa Juda ki jo me ot pa Icrael, yam nyingwu odoko me lacen dano ikin rok ducu; kombedi dong abilarowu, wek wubed lukel gum ikom jo mukene bene. Pe wulwor, wubed ki tekcwiny, wujing komwu wumede ki gero Ot mera”

14Pien Rwot Lubanga Matwero ducu owaco kuman ni, “Yam ka kwariwu gumiyo akemo omaka ci ayube me timogi marac, dok bene pe aloko cwinya ci atimogi kumeno. 15Kitmeno ikare man bene dok ayube me timo Jerucalem maber ki ot pa Juda bene; pe dong wulwor. 161Man gin ma myero wutim: ngat man olok lok me ada bot lawote; wungol kop me ada makelo kuc ikin dano i dog gangiwu. 17Pe myero ngat mo ikinwu oyub lok marac ki i cwinye ikom lawote; pe wumar kwongo kwong me goba, pien lok meno ducu cwinya dag matek.”

18Rwot me mony oloko bota kun waco ni, 19“Rii kec me dwe me angwen, me abic, me abiro, ki me dwe me apar, gibibedo nino madito me yomcwiny ki kwe ic pi ot pa Juda, ki me karama me yomcwiny; pieno wumar ada ki kuc.”

20Rwot Lubanga Matwero ducu owaco kuman ni, “Kare biromo ci rok mapatpat gibimede ki bino i Jerucalem. 21Jo ma gibedo i taun madit acel gibiwaco ki jo me taun madit mukene ni, ‘Wubin kacel kwedwa wek wacito wunu kaworo Rwot i Jerucalem wek walegu gum ki bot Rwot.’ 22Rok mapol ki rok matego gibibino i Jerucalem ka yenyo an Rwot me mony ki me lego kica bota. 23Ikare meno jo apar ma gua ki i lwak rok ma lebgi patpat gibimako dog kanyi pa Lajudaya, kun giwaco ni, ‘Wek wanywak wot kwedi, pien wawinyo ni Lubanga tye kwedwu.’”