Jekaria 7

Rwot okwero rii kec me goba

1Rwot oloko ki Jekaria i mwaka me angwen me loc pa rwot Dario, inino dwe angwen, me dwe me abongwen ma kilwongo Kiclev.

2Jo me Betel onongo ceng guoro Carejer ki Regem-melek kacel ki lwakgi wek gucit kalego gum ki bot Rwot, 3dok bene me penyo ajwaki me Ot pa Rwot me mony kacel ki lunebi ni, “Wan mono myero wamede kakumu pi Ot pa Lubanga ma kibalo wokoni, dok karii kec i dwe me abic kit macalo yam wabedo katimo kwede pi lwak mwaka mapoli?”

4Rwot me mony odok iye bota ni, 5“Peny jo ducu me lobo kacel ki lunebi ni, ikare mayam wubedo karii kec ki kakumu i dwe me abic ki me abiro, pi mwaka pyere abiro ma okatoni, onongo yam wubedo me woro an? 6Ikare me karamagi mayam gibedo kacam ki kamat iyeni, onongo gucamo dok bene gumato pirgi ken gi gire.

7Man aye obedo lok mayam Rwot omiyo bot lunebi ni gubed katito ikare ca ma onongo dano opong i Jerucalem ki kuc, kacel ki i taun ducu ma orumugi maber, ma jo mogo yam onongo gibedo wa i Negeb bene ki i pworgu ikare ca.”

Kwero winyo dog Rwot aye omiyo kitero dano i opii

8Rwot dok oloko ki Jekaria kun waco ni, 9“Ikare ca amiyo bot jona gin ma myero gutii matye atir dok kakare, dok bene ni gutim ber ki kica ngat man bot lawote. 10Pe wubur dato, latin kic, labedo nyo lacan; pe myero ngat mo ki ikinwu oyub lok marac ki i cwinye ikom lawote.

11Ento jona gukwero winyo loka, kun gicere acera; ma guloko ngegi, dok gudingo wa itgi woko ni wek pe giwiny. 12Gin gudoko lujemo ci pe guwinyo cik ma mayam acwalo ki Cwiny mera maleng kun wok ki i dog lunebi ma gukwo ikare macon. Omiyo kiniga madit mada omako an Rwot me mony. 13Kit macalo alwongogi ci gin pe guwinya, ikare ma gin bene gilwonga, ci an bene akwero winyogi woko, man lok pa an Rwot me mony kikome. 14Ci aketogi woko ki yamo lapiru ma oterogi ikin rok ducu mayam pe gingeyo. Kitmeno omiyo lobo ma guwekoni obale woko labongo ngat mo ma bedo iye, omiyo lobo ma yomo cwiny dano odong obur.”