Jekaria 6

Ginanyuta me gadigadi lweny angwen

1Dok aloke atingo wanga malo ci aneno gadigadi lweny angwen ma gua ki ikin godi aryo; godine onongo gubedo godi nyonyo me mola. 21Gadigadi mukwongo onongo aguragura makwar aye tye kaywayone, me aryone onongo aguragura macol aye tye kaywayone, 32 ento me adeke onongo aguragura matare, ki gadigadi me angwene onongo aguragura ma obedo abacabac aye tye kaywayone. 4Ci apenyo lamalaika ma obedo kalok kwedani ni, “Magi teloke ango ladit?” 53 Ci lamalaika odoka iye ni, “Magi yamo angwen me polo, kun gua ki inyim Rwot me lobo ducu. 6Gadigadi ma aguragura macol aye tye kateloni onongo woto dok tung kumalo kun kemo lobo Babilon, aguragura matareni gicito meggi gidok tung kupotoceng, ki ma gubedo abacabaceni onongo giwoto gidok mere tung lobo matye tung kupiny.” 7Ikare ma aguragura gikati woko, gin gurune me cako wotgi oyotoyot me longo i lobo. Ka dong lamalaika ocikogi ni, “Citu, giwu wulong i lobo.” Ci gin bene guwoto gulongo i lobo. 8Ci lamalaika ma obedo kalok kwedani dok olwonga ki dwon malongo kun waco bota ni, “Nen aguragura ma guwoto gudok tung kumalo kun gukemo lobo Babilon gukweyo akemo pa Rwot woko.”

Kiciko ni kiruk lalukana iwi Yocwa

9Rwot dok oloko kweda kun waco bota ni, 10“Kwany mot pa jo magi ki ikin jo mayam kiterogi i opii: Keldai, Tobiya ki Jedaya, gin jo ma dong gudwogo ki i Babilon; wot kacel kwedgi nio wa i ot pa Yocia wod pa Jepania. 11Gam ryal ki jabu ki botgi, ci itii kwede lalukana me ker, wek irwak iwi Yocwa wod pa Yekojadak, ma en aye ajwaka madit.” 124Dok itit bote ni, Rwot me mony owaco kuman ni. “Dano ma kilwongoni Jang Yat bidongo i kabedo kama en tye iye, dok en bigero Ot pa Rwot. 13En kikome aye bigero Ot pa Rwot; en bibedo ki deyo ma pore pi rwot, dok en bene bibedo iwi komker mere, ka bicako loyo jone. Ajwaka bene bibedo kanget komker mere, kun gin aryo ducu gibitic kacel ki kuc. 14Lalukana meno bibedo i Ot pa Rwot macalo gin me poyo wic bot Keldai, Tobiya, Jedaya ki Yocia wod pa Jepania.”

15Jo matye kamabor gibibino, gibikonyo jo ma gigero Ot pa Rwot; meno dong bimiyo wungeyo ni Rwot me mony aye ma oora botwu. Man bitime kace wubiketo cik pa Rwot ducu i tic.