Jekaria 5

Ginanyuta me buk adola ma otware malo

1Ka atingo wanga malo, ci aneno buk adola ma tware! 2Ci lamalaika openya ni, “Ineno gin ango?” Ci adoke iye ni, “Aneno buk adola matye katuk malo; bore romo puti apar, ki lac iye romo puti abic.”

3Ka lamalaika dok owaca ni, “Man en lok me ceno dano, ma woto i lobo ducu, pien kicoyo tung cel ni jo ducu ma kwalo kwo kibiryemogi woko ki i lobo cake tin, dok kicoyo bene i tung mukene ni, jo ducu ma kwongo kwong me goba kibiryemogi woko bene ki i lobo cake tin. 4Rwot Matwero Ducu waco ni en dong ebicwalo buk man me ceno dano me wot woko, wek ocit odony wa i ot pa lakwo ki i ot pa ngat ma kwongo kwong i nyinge gobagoba; ci bibedo i ode nio ka otyeko woko liweng, kadi wa bao ki godi ducu ma kigero kwede.”

Ginanyuta me dako ma obedo i aduku

5Lacen lamalaika ma obedo kalok kwedani dok obino ci owaca ni, “Ting wangi malo kong inen gin mukene matye kakato wokoni.”

6Ka apenye ni, “Man kono gin ango?” Ci en odoka iye ni, “Man aduku ma kato woko.” Ka dok owaci, “Man bal matye i loboni ducu.”

7Nen, adukunu kitiyo doge ki nyonyo racac mapek ma nongo kiumu ki doge, ci aneno dako mo onongo tye obedo i aduku!

8Ci lamalaika owaco ni, “Dako man ocung pi tim marac.” Ci odiyo wi dakonu odwoko piny i aduku, ka dok odiro nyonyo mapek ca ocego ki doge woko liking. 9Atingo wanga dok malo, ci aneno mon aryo ma gitye katware ma gibino tung bota kun yamo cero bwomgi; onongo gitye ki bwomgi matek macalo bwom acebe. Ci gucako tingo aduku ca gutero ikin lobo ki polo.

10Ka dok apenyo lamalaika matye kalok kweda ni, “Gitero adukuni kono kwene?”

11Ci lamalaika odoka iye ni, “I lobo me Cinar,1 wek kiger ot pire. Ka dong kigero otum, ci kibicibo adukunu i kabedo ma kiyubu pire kunu.”