Jekaria 14

Jerucalem ki rok mukene

1Nen ba, nino ma Rwot bingolo iye kop tye cok, en obimiyo lumerokwu biyako jamiwu woko ki botwu ci gibipokone ka wangwu ma wun bene oneno. 2Pien Rwot bicoko rok ducu kacel ka lweny ikom Jerucalem. Ci gibimayo taunwu madit woko, gibiyako odi, dok gibimako mon ci gibutu kwedgi tektek. Nucu jo ma i taunwu madit kibiterogi woko i opii, ento jo mukene ma gudong pe gibiryemogi woko ki i taunwu madit. 3Lacene Rwot bicito ka lweny ikom rok meno ducu, kit mayam con en olwenyo inino me lwenye. 4Inino meno en bicung iwi got me Jeituni, matye inyim Jerucalem tung kunyango; ci got me Jeituni bibare iye aryo, cake ki tung kunyango dok kwede tung kupotoceng, kun weko lung malac tutwal. Nucu got tung cel bidok tung kumalo, ki nucune mukeneni bidok tung kupiny. 5Wubiringo me lwi woko ki i nota kama obar ki ikom got. Ci wubiringo kit mayam kwariwu guringo oyengyeng ikare pa rwot Ujia me Juda. Ka lacen Rwot Lubangawu bibino kacel ki lumalaika mere maleng ducu.

6Inino meno, ngico ki koyo bibedo peke. 7Pinye bene bibedo dyeceng keken labongo colpiny mo pieno i otyeno ceng biryeny aryenya. Rwot gire kene aye ngeyo kare ma gin man bitime iye. 81

Inino meno pii ma miyo kwo bimol kun a ki i Jerucalem, nucune bimol cito i nam ma tye tung kunyango2 ki nucune mukene bimol cito i nam matye tung kupotoceng; ci piine bibedo katime kumeno i oro kit macalo time kwede wa i cwir. 9Ci Rwot bidoko Rwot maloyo lobo ducu. Inino meno jo ducu biworo Rwot dok bene kibingeyo en ki nyinge acelu.

10Lobo ducu bidoko bar, cake i Geba o wa i Rimmon matye tung kupiny inget Jerucalem. Ento Jerucalem bidong ma onyede kakare cake ki i Dogcel pa Benjamin o kwede wa i Dogcel Macon, nio i Dogcel ma i Twok taun madit, ki dok cake i Lubele me Kananel o wa i bur kama kibiyo iye pig olok pa rwot. 113Dano bibedo i Jerucalem ki kuc, pien pe dok kibidyerone me ajwera woko.

12Rwot bikelo two gemo ma bipwodo ki rok ducu ma giywayo mony ikom Jerucalem. Ringo komgi bitop ma nongo pud gucung ki tyen gi, wanggi bitop woko ki i opoko wanggi, ki lebgi bene bitop ki i doggi. 13Inino meno, atiba madwong ma oa ki bot Rwot bibango komgi woko, man bimiyo ngat acel acel bipoto ikom lawote me lweny kwede. 14Kong inen, kadi Juda bene bilweny i Jerucalem me temo gwokone. Gibicoko lonyo pa rok ducu matye ingete, macalo jabu, ryal ki ginaruka mapol ata. 15Kit gemo macalo man bene bipoto ikom aguragura, kana, kinaga, ki ikom lee ducu ma i gony pa lukworgi. 164

Ngat acel acel ma obwot ki ikom rok ducu ma gubino ka lweny ikom Jerucalem, bibedo kawot i Jerucalem mwaka ki mwaka kaworo Rwot, ma en Rwot me mony, ki pi kwero Karama me nino madito me Bolo. 17Kace jo me kaka mo me wi lobo pe bicito i Jerucalem kaworo Rwot me mony macalo Rwot, ci kot pe bicwer botgi. 18Kace jo me dogola me Ejipt pe gucito, ma pe gunen kunu, ci gemo mayam Rwot ounu ki rok ma pe gucito ka kwero Karama me nino madito me Boloni bipoto ikomgi. 19Man aye kit ma kibiculu ki bal me Ejipt, ki kit ma kibiculu ki bal pa rok ducu ma pe gucito ka kwero Karama me nino madito me Bolo.

20Inino meno kibigoro coc ikom olang ma kiruku ingut aguragura ni, “Kidyero bot Rwot.” Agulu matye i Ot pa Rwot bibedo maleng macalo becen matye inyim keno tyer. 21Agulu ducu matye i Jerucalem ki Juda kibikwerogi bedo maleng pi Rwot me mony, wek jo ducu ma gityero gitum bot Lubanga gubin gukwany ki ikin gi, ci guted ki ringo lee ma gityero bot Lubanga. Lacatwil mo pe dok binen i Ot pa Rwot me mony inino meno.