Jekaria 13

1Inino meno kibitucu wang it pi jo me ot pa Daudi kacel ki pi jo ma gibedo i Jerucalem, wek kilwok bal ki keni ducu woko ki ikomgi. 2Inino meno, abijwayo nying cal jogi ducu woko ki i lobo, wek wi dano pe dok opo ikomgi; dok bene abikwanyo lunebi ma lugoba kacel ki cen maracu woko ki i lobo. 3Kace ngat mo pud tito lok macalo lanebi, ci wone ki mine ma gunywale gibiwace ni, ‘Pe ibibedo kwo, pien iloko lok me goba i nying Rwot’; ci wone ki mine ma gunywale gibicobe woko pil kace en bitito lok macalo lanebi.

4Inino meno lewic bimako lanebi acel acel pi ginanyutane ma en tito pire macalo lanebi bot dano. En dong bene pe biruku bongo ma obedo yeryer me bwolo jo ni ebedo lanebi me ada. 5Ento en biwaco ni, ‘An gira pe lanebi, an abedo lapur poto, pien poto man obedo mera ocake wa ka tinona.’ 6Ka ngat mo openye ni, ‘Lwak bur matye i ngeyini kono, gin ango ma otimo?’ Ci en bidok iye ni, ‘Meno ducu ret me wang odoo ma kigoya kwede ki i ot pa larema.’”

Kiciko ni kinek lakwat romi pa Lubanga woko

7Rwot Lubanga Matwero ducu owaco ni, “In pala lucwan, co woko 1 wek ilweny ikom lakwata, ikom dano ma latica. Go lakwata ci ineke woko, wek romi guket woko ata. Abilwenyo wa ikom jona ma gitye 8i lobo man ducu, dul jo aryo me adek kibinekogi woko, ci acel me adeke aye bidong makwo. 9Dul man me acel me adek abiketo i mac, ci abiliyogi kit ma dano liyo ki ryal, abitemogi kit ma dano temo ki jabu. Gibilwongo nyinga, ci abigamo doggi. Abiwaco botgi ni, ‘Wun aye jona’; gin gibigamo ni, ‘Rwot en aye Lubangawa.’”